মহাৰাষ্ট্ৰ বিধানসভা নিৰ্বাচনত প্ৰচাৰৰ সময়ত সংবিধান সন্দৰ্ভত উত্থাপিত অভিযোগ সন্দৰ্ভত বিজেপিয়ে ৰাহুল গান্ধীৰ বিৰুদ্ধে নিৰ্বাচন আয়োগক অভিযোগ দাখিল কৰিছে । সোমবাৰে বিজেপিৰ এটা প্ৰতিনিধি দলে মুখ্য নিৰ্বাচন আয়ুক্তক সাক্ষাৎ কৰে । প্ৰতিনিধি দলটোৰ অংশ হিচাপে থকা কেন্দ্ৰীয় আইন মন্ত্ৰী অৰ্জুন ৰাম মেঘৱালে কয় যে ‘আমি নিৰ্বাচন আয়োগক জনাইছো যে মহাৰাষ্ট্ৰৰ নিৰ্বাচনত ৰাহুল গান্ধীয়ে মিছা কথা কৈছে । তেওঁৰ বিৰুদ্ধে ব্যৱস্থা গ্ৰহণ কৰিব লাগে । ৬ নৱেম্বৰতো মিছা কথা কৈছে তেওঁ ।‘
তেওঁ কয় যে ‘ৰাহুল গান্ধীয়ে ৰাজ্যসমূহক ইখনে সিখনৰ বিৰুদ্ধে থিয় কৰাবলৈ চেষ্টা কৰিছিল । সংবিধান ফালি বিজেপিয়ে সংবিধান ধ্বংস কৰিবলৈ ওলাইছে বুলি মিছা কথা কৈছিল । সেইটো মিছা কথা । আমি আয়োগক কৈছো যে এইটো বন্ধ কৰিব লাগে । আমি আয়োগক এইটোও কৈছো যে ৰাহুল গান্ধী এই কাম কৰাত অভ্যস্ত আৰু সতৰ্কবাণী আৰু জাননীৰ পিছতো তেওঁ তেনে কৰাৰ পৰা বিৰত থকা নাই ।‘ মেঘৱালে লগতে কয় যে আমি ৰাহুল গান্ধীৰ বিৰুদ্ধে বি এন এছৰ ৩৫৩ ধাৰাত এফ আই আৰ পঞ্জীয়নৰ দাবী জনাইছো ।
কি কৈছিল ৰাহুল গান্ধীয়ে-
লোকসভাৰ বিৰোধী দলপতি ৰাহুল গান্ধীয়ে ৬ নৱেম্বৰত নাগপুৰত কৈছিল যে যেতিয়া ৰাষ্ট্ৰীয় স্বয়ংসেৱক সংঘ (আৰ এছ এছ) আৰু বিজেপিৰ সমৰ্থকে সংবিধানক আক্ৰমণ কৰে, তেওঁলোকে কেৱল এখন কিতাপ আক্ৰমণ নকৰে, তেওঁলোকে ভাৰতৰ কণ্ঠস্বৰক আক্ৰমণ কৰি আছে । আমাৰ প্ৰতিষ্ঠানসমূহ সংবিধানৰ দ্বাৰা সৃষ্টি কৰা হৈছে । সংবিধান নাথাকিলে নিৰ্বাচন আয়োগ নাথাকিব । আৰ এছ এছে ইয়াক পোনপটীয়াকৈ আক্ৰমণ কৰিব নোৱাৰে । যদি তেওঁলোকে আগবাঢ়ি আহি ইয়াৰ বিৰুদ্ধে যুঁজ দিয়ে তেন্তে ৫ মিনিটত পৰাস্ত হ’ব । ‘উন্নয়ন’, ‘প্ৰগতি’ আৰু ‘অৰ্থনীতি’ শব্দ দুটাৰ আঁৰত লুকাই তেওঁলোকে আক্ৰমণ কৰিবলৈ আহে ।
মহাৰাষ্ট্ৰত, এম ভি এ বনাম মহায়ুতি-
মহাৰাষ্ট্ৰ বিধান সভাৰ নিৰ্বাচন ২০ নৱেম্বৰত অনুষ্ঠিত হ’ব, ২৩ নৱেম্বৰত ২৮৮ টা সমষ্টিৰ ভোট গণনা অনুষ্ঠিত হ’ব । কংগ্ৰেছ, শিৱসেনা (ইউ বি টি) আৰু নেচনেলিষ্ট কংগ্ৰেছ পাৰ্টি (এন চি পি)ৰ দ্বাৰা গঠিত বিৰোধী এম ভি এ মিত্ৰজোঁটৰ লক্ষ্য হৈছে ৰাজ্যখনত ক্ষমতা অৰ্জন কৰা, মহাযুতি মিত্ৰজোঁটক প্ৰত্যাহ্বান জনোৱা, যাৰ ভিতৰত আছে একনাথ শিণ্ডেৰ নেতৃত্বত শিৱসেনা, ভাৰতীয় জনতা পাৰ্টি (বিজেপি), আৰু অজিত পাৱাৰৰ নেতৃত্বত এন চি পি ।
