কি হয় বি-২ ষ্টীলথ বোম্বাৰ
বৰ্তমান চৰ্চাত আছে মহা শক্তিধৰ আমেৰিকাৰ এক ঘাতক অস্ত্ৰ বি-২ ষ্টীলথ বোম্বাৰ (B-2 Stealth Bomber) । ইজৰাইল-ইৰাণৰ উত্তেজনাৰ মাজতে চৰ্চালৈ আহিছে এই বিশেষ বিমান । কাৰণ শেহতীয়াকৈ এই বিমানেৰে ইৰাণৰ পৰমাণৱিক স্থানত আক্ৰমণ চলাইছিল আমেৰিকাই ।
আমেৰিকাৰ বি-২ ষ্টীলথ বোম্বাৰ বিমানৰ কোনো ছবি দেখিছে, তেন্তে নিশ্চয় লক্ষ্য কৰিছে যে ই দেখাত হুবহু ডাঙৰ চৰাইৰ দৰে । ডেউকা মেলি এই বিমান উৰিলেই ক’ৰবাত নহয় ক’ৰবাত প্ৰলয় নিশ্চিত । ইৰাণত আমেৰিকাই কৰা আক্ৰমণত এই বি-২ বোমাৰু বিমান ব্যৱহাৰ কৰা হৈছিল, যাক মাত্ৰ দুদিন পূৰ্বে গুৱাম বিমান ঘাটিলৈ লৈ যোৱা হৈছিল । যিকোনো যুদ্ধত আমেৰিকান বাহিনী উপস্থিত হোৱাৰ পূৰ্বেই বি ২ বোমাৰু বিমান যুদ্ধক্ষেত্ৰত উপস্থিত হয় । এনে পৰিস্থিতিত ইয়াক ইজৰাইল-ইৰাণৰ যুদ্ধত আমেৰিকাৰ প্ৰৱেশৰ সংকেত বুলিও ক’ব পাৰি ।
ইৰাকৰ পৰা লিবিয়ালৈকে-
বি-২ ষ্টীলথ বোম্বাৰ বিমানে এতিয়ালৈকে লিবিয়াত অপাৰেচন এলাইড ফৰ্চ (ছাৰ্বিয়া), অপাৰেচন এণ্ডুৰিং ফ্ৰিডম (আফগানিস্তান), অপাৰেচন ইৰাকী ফ্ৰিডম (ইৰাক) আৰু অপাৰেচন অডিচি ডন আৰু অপাৰেচন অডিচি লাইটনিঙৰ অধীনত দুবাৰকৈ শত্ৰুৰ ভূখণ্ডত আক্ৰমণ চলাইছে আৰু এই সকলোবোৰ আক্ৰমণ যুদ্ধৰ প্ৰথম নিশা সংঘটিত হৈছিল । বি-২ হৈছে আমেৰিকাৰ আটাইতকৈ উন্নত কৌশলগত অস্ত্ৰ । এই বোমাৰু বিমানে অতি অত্যাধুনিক তথা সুৰক্ষিত আকাশী অঞ্চল ভেদ কৰা আৰু ইৰাণৰ পাৰমাণৱিক গৱেষণা কেন্দ্ৰৰ দৰে নেটৱৰ্ক ধ্বংস কৰিবলৈ সক্ষম । উল্লেখ্য যে বি-২ হৈছে বিশ্বৰ আটাইতকৈ দীৰ্ঘদিনীয়া ধৰি কাৰ্যক্ষম হৈ থকা বোমাৰু জেট । লগতে, একেটা প্লেটফৰ্মতে একেলগে দীৰ্ঘ দূৰত্ব, ষ্টীলথ আৰু গধুৰ পেলোড ব্যৱহাৰ কৰিব পৰা একমাত্ৰ বিমান ।
এই বোমাৰু বিমানৰ খৰচ-
বি-২ৰ ব্যয় প্ৰায় ২.১ বিলিয়ন ডলাৰ, যাৰ ফলত বি-২ ষ্টীলথ বোম্বাৰ এতিয়ালৈকে নিৰ্মিত আটাইতকৈ দামী সামৰিক বিমান । নৰ্থৰপ গ্ৰুমেনে নিৰ্মাণ কৰা আৰু আটাইতকৈ উন্নত ষ্টীলথ প্ৰযুক্তিৰ সৈতে নিৰ্মিত এই বোমাৰু জেট বিমান ১৯৮০ চনৰ শেষৰ ফালে উৎপাদন আৰম্ভ কৰা হৈছিল যদিও ছোভিয়েট ইউনিয়নৰ পতনৰ পিছত ইয়াক বন্ধ কৰি দিয়া হৈছিল । পেন্টাগনে বোমাৰু বিমানখন নিৰ্মাণৰ কাৰ্যসূচী চুটি কৰি দিছিল, যাৰ ফলত মাত্ৰ ২১খন বিমানহে নিৰ্মাণ কৰা হৈছিল ।
সকলো ধৰণৰ অস্ত্ৰৰে সজ্জিত-
ইন্ধন অবিহনে এই বোমাৰু বিমানে ৬,০০০ নটিকেল মাইল (১১,১১২ কিলোমিটাৰ)তকৈ অধিক দূৰত্বত অৱস্থিত আমেৰিকাৰ ঘাটিৰ পৰা আক্ৰমণ চলাব পাৰে । লগতে যদি ইয়াৰ ইন্ধন থাকে তেন্তে বি-২ৰ বিশ্বৰ যিকোনো লক্ষ্যত আঘাত কৰাৰ শক্তি আছে । মিছৌৰীৰ পৰা আফগানিস্তান আৰু লিবিয়া আৰু এতিয়া ইৰাণলৈকে অভিযানত ই নিজৰ শক্তি প্ৰদৰ্শন কৰিছে । ৪০,০০০ পাউণ্ডতকৈ অধিক বা ১৮,১৪৪ কিলোগ্ৰাম অস্ত্ৰৰে উৰণৰ ক্ষমতা থকা এই বোমাৰু বিমানখনে গতানুগতিক আৰু পাৰমাণৱিক অস্ত্ৰও নিক্ষেপ কৰিব পাৰে ।
বোমাৰু বিমানত সজ্জিত জি বি ইউ বোমা-
এই বি-২ ষ্টীলথ বোম্বাৰ বিমানৰ আভ্যন্তৰীণ অস্ত্ৰসমূহ পেলোড কঢ়িয়াই নিয়াৰ সময়ত নিৰৱে মিছন সম্পন্ন কৰিব পৰাকৈ ডিজাইন কৰা হৈছে । ইয়াৰ আভ্যন্তৰীণ অস্ত্ৰসমূহৰ ভিতৰত আছে দুটা GBU-57A/B MOP (Massive Ordnance Penetrator), ৩০,০০০ পাউণ্ডৰ প্ৰিচিচন গাইডেড ‘বাংকাৰ বাষ্টাৰ’ বোমা । খবৰ অনুসৰি ইৰাণৰ ফৰ্ডো ৰিচাৰ্চ ছাইটত ছটা বাংকাৰ বাষ্টাৰ বোমা নিক্ষেপ কৰা হৈছিল । বি-২ৰ দুজন পাইলটৰ ক্ৰু কনফিগাৰেচনে অটোমেচন চিষ্টেমৰ সহায়ত কাৰ্য্যকৰী ফলপ্ৰসূতা বজাই ৰাখে আৰু লগতে অন্য কৰ্মীৰ ওপৰত নিৰ্ভৰশীলতা হ্ৰাস কৰে ।
ৰাডাৰ এবজৰ্বিং মেটেৰিয়েল আৰু এংগোলাৰ ডিজাইন বি-২ৰ ষ্টীলথ প্ৰযুক্তিত বিশেষ । এই ডিজাইনৰ বাবে বি-২ ষ্টীলথ বোম্বাৰ শত্ৰুৰ বায়ু প্ৰতিৰক্ষা ব্যৱস্থাৰ পৰা সাৰি যাবলৈ সক্ষম । ইয়াৰ ৰাডাৰৰ ক্ৰছ-ছেকচন সৰু চৰাইৰ সৈতে হুবহু সমান আৰু ইয়াৰ বাবেই ইয়াক ধৰা পেলোৱাৰ বাবে গতানুগতিক ৰাডাৰৰ ক্ষমতা শূন্য ।
এম অ’ পি-
৩০ হাজাৰ পাউণ্ড ওজনৰ এই এম অ’ পি হৈছে আমেৰিকাৰ অস্ত্ৰভাণ্ডাৰৰ আটাইতকৈ ডাঙৰ গতানুগতিক বোমা । ইয়াক বিশেষভাৱে কঠিন মাটিৰ তলৰ বাংকাৰ ভেদ কৰিবলৈ ডিজাইন কৰা হৈছে । ইয়াৰ বিশাল আকাৰৰ বাবে বি-২ বিমানে প্ৰতিটো মিছনত মাত্ৰ এটা বা দুটা এম অ’ পি কঢ়িয়াই নিব পাৰে । কিন্তু ইয়াৰ বাংকাৰত ভেদ কৰা শক্তিৰ কোনো তুলনা নাই । এই অস্ত্ৰৰ ২০.৫ ফুট (৬.২৫ মিটাৰ) দৈৰ্ঘ্য আৰু জি পি এছ-নিৰ্দেশিত নিখুঁত ব্যৱস্থাই ইয়াক ভূগৰ্ভস্থ সুবিধাসমূহৰ বিৰুদ্ধে নিখুঁত আক্ৰমণ প্ৰদান কৰিবলৈ বিশেষভাৱে সক্ষম কৰি তুলিছে । মাটিৰ ২০০ ফুট তলৰ বেছমেণ্ট এটা নিমিষতে ধ্বংস কৰিব পাৰে এই বোমাৰু বিমানে ।
লগতে পঢ়ক : GBU-57 মাৰাত্মক অস্ত্ৰৰে ইৰাণক আক্ৰমণ আমেৰিকাৰ!কোনটো প্ৰযুক্তিৰে কৰে কাম
