শনিবাৰে সন্ধিয়াৰ পৰা আমেৰিকাত বন্ধ হৈ আছে টিকটক এপ । আচলতে আমেৰিকাত টিকটক নিষিদ্ধ কৰা হৈছে, তাৰ পিছত এই আইন কাৰ্যকৰী হোৱাৰ আগতেই আমেৰিকাত টিকটকৰ কাম-কাজ বন্ধ হৈ গৈছে । ব্যৱহাৰকাৰীয়ে এপটোত ভিডিঅ’ চাব পৰা নাই । ব্যৱহাৰকাৰীসকলে এপটোত এটা বাৰ্তা দেখিছে, য’ত তেওঁলোকক এপটোৰ ওপৰত নিষেধাজ্ঞাৰ বিষয়ে অৱগত কৰা হৈছে । যি কি নহওক বাৰ্তাটোত কোৱা হৈছে আমাৰ সৈতে সংযুক্ত হৈ থাকক । এনে পৰিস্থিতিত অতি সোনকালে ই পুনৰ কাৰ্ক্ষম হৈ উঠিব পাৰে বুলি আশা কৰা হৈছে ।
প্ৰধান প্লে ষ্ট’ৰৰ পৰা আঁতৰোৱা হ’ল এপ-
প্ৰধান প্লে ষ্ট’ৰৰ পৰাও আঁতৰাই দিয়া হৈছে টিকটক । এপল আৰু গুগল প্লে ষ্ট’ৰত দৃশ্যমান হোৱা নাই টিকটক এপ । শেহতীয়াকৈ আমেৰিকা চৰকাৰে আইন প্ৰণয়ন কৰি টিকটক নিষিদ্ধ কৰিছিল । আমেৰিকাৰ উচ্চতম ন্যায়ালয়েও টিকটকৰ মূল কোম্পানী বাইটেডেন্সক আমেৰিকাত এই এপটো চলোৱা বন্ধ কৰিবলৈ নিৰ্দেশ দিছে । অৱশ্যে এইটোও কোৱা হৈছে যে যদি কোনো আমেৰিকান কোম্পানীয়ে বাইটডান্সৰ শ্বেয়াৰ ক্ৰয় কৰি টিকটক চলায় তেন্তে আমেৰিকাত এই এপটোৱে কাম কৰি যাব পাৰে । এই আইন অনুসৰি ১৯ জানুৱাৰীৰ পৰা আমেৰিকাত টিকটক নিষিদ্ধ কৰা হৈছে । অৱশ্যে আমেৰিকাৰ এটা কোম্পানীক বাইটডান্সৰ শ্বেয়াৰ বিক্ৰী কৰাৰ প্ৰচেষ্টা অব্যাহত আছে ।
ট্ৰাম্পে অব্যাহত ৰখাৰ ইংগিত দিয়ে-
পূৰ্বে ড’নাল্ড ট্ৰাম্পে টিকটক নিষিদ্ধ কৰাৰ পক্ষত আছিল যদিও এতিয়া তেওঁ আমেৰিকাত টিকটক অব্যাহত ৰাখিব পাৰিব বুলি ইংগিত দিছে । সংবাদ মাধ্যমৰ বাতৰিতো দাবী কৰা হৈছে যে ইলন মাস্কে বাইটডান্সৰ শ্বেয়াৰ ক্ৰয় কৰিব পাৰে, কিন্তু এই কথা এতিয়াও নিশ্চিত হোৱা নাই । নিৰাপত্তাজনিত চিন্তাৰ বাবে আমেৰিকাত নিষিদ্ধ কৰা হৈছে টিকটক । আমেৰিকাৰ অভিযোগ যে চীনে টিকটক ব্যৱহাৰকাৰীৰ তথ্য সংগ্ৰহ কৰি আছে । আমেৰিকাত টিকটকৰ ১৭ কোটি ব্যৱহাৰকাৰী আছে ।
