দ্বিপাক্ষিক সম্পৰ্ক উন্নত কৰাৰ লক্ষ্যৰে ভাৰত আৰু চীনে ২০২০ চনৰ পৰা বন্ধ হৈ থকা কৈলাশ মানসৰোৱৰ যাত্ৰা পুনৰ আৰম্ভ কৰাৰ সিদ্ধান্ত লৈছে । বৈদেশিক সচিব বিক্ৰম মিশ্ৰী আৰু চীনৰ বৈদেশিক মন্ত্ৰী ৱাং য়ীৰ মাজত হোৱা বৈঠকত দুয়োখন দেশে প্ৰত্যক্ষ বিমান সেৱা পুনৰ আৰম্ভ কৰাৰ প্ৰস্তাৱৰ ওপৰতো নীতিগতভাৱে সহমত প্ৰকাশ কৰে ।
কৈলাশ মানসৰোৱৰ যাত্ৰা সন্দৰ্ভত সহমত-
বৈদেশিক পৰিক্ৰমা মন্ত্ৰালয়ে নিজৰ বিবৃতিত কয়, ‘দুয়ো পক্ষই ২০২৫ চনৰ গ্ৰীষ্মকালত কৈলাশ মনসাৰোৱৰ যাত্ৰা পুনৰ আৰম্ভ কৰাৰ সিদ্ধান্ত লৈছে । ইয়াৰ বাবে প্ৰয়োজনীয় পদ্ধতিসমূহৰ বিষয়ে আলোচনা কৰিবলৈ প্ৰাসংগিক ব্যৱস্থাসমূহে বৰ্তমানৰ চুক্তি অনুসৰি কাম কৰিব । ইয়াৰ উপৰিও দুয়োখন দেশে ভাৰত-চীন বিশেষজ্ঞ পৰ্যায়ৰ ব্যৱস্থাৰ প্ৰাৰম্ভিক বৈঠক অনুষ্ঠিত কৰি সীমা অতিক্ৰম কৰা নদীসমূহৰ সৈতে জড়িত জলবিজ্ঞানৰ তথ্য আহৰণ আৰু অন্যান্য সহযোগিতাৰ বিষয়ে আলোচনা কৰিবলৈও সন্মতি প্ৰকাশ কৰে ।
চীন ভ্ৰমণত বৈদেশিক সচিব বিক্ৰম মিশ্ৰী-
ভাৰত আৰু চীনৰ মাজত বৈদেশিক সচিব-উপমন্ত্ৰী ব্যৱস্থাৰ বৈঠকত অংশগ্ৰহণৰ বাবে বেইজিংলৈ দুদিনীয়া ভ্ৰমণলৈ গৈছে বিক্ৰম মিশ্ৰী । ৰাছিয়াৰ কাজানত অক্টোবৰ মাহত প্ৰধানমন্ত্ৰী নৰেন্দ্ৰ মোদী আৰু ৰাষ্ট্ৰপতি জি জিনপিঙৰ মাজত হোৱা চুক্তি অনুসৰি এই বৈঠক অনুষ্ঠিত হৈছিল । বৈঠকত দুয়োপক্ষই দ্বিপাক্ষিক সম্পৰ্ক সুস্থিৰ আৰু উন্নতিৰ বাবে গুৰুত্বপূৰ্ণ পদক্ষেপ লোৱাত সন্মতি প্ৰকাশ কৰে ।
বৈঠকৰ সময়ত দুয়োখন দেশে সংবাদ মাধ্যম আৰু থিংক টেংকৰ মাজত পাৰস্পৰিক ক্ৰিয়া-কলাপকে ধৰি জনসাধাৰণৰ মাজত আলোচনাৰ প্ৰসাৰ আৰু সুবিধা প্ৰদানৰ বাবে উপযুক্ত পদক্ষেপ গ্ৰহণ কৰাত সন্মতি প্ৰকাশ কৰে ।
