ৰাজ্যসভাৰ পৰা পদত্যাগ কৰিলে তৃণমূল কংগ্ৰেছৰ সাংসদ কোয়েল মল্লিকে। মমতাৰ বাবে এয়া এক ডাঙৰ বিপৰ্যয়।
আন এক বিপৰ্যয়ৰ সন্মুখীন হৈছে মমতা বেনাৰ্জীৰ তৃণমূল কংগ্ৰেছ। পশ্চিম বংগৰ অভিনেত্ৰীৰ পৰা ৰাজনীতিবিদলৈ পৰিণত হোৱা টিএমচিৰ ৰাজ্যসভাৰ সাংসদ কোয়েল মল্লিকে নিজৰ পদৰ পৰা পদত্যাগ কৰিছে। দলীয় পদৰ পৰা পদত্যাগ কৰা চতুৰ্থগৰাকী সাংসদ হৈছে কোয়েল মল্লিক। ইতিমধ্যে তেওঁৰ পূৰ্বে আন তিনিজন সাংসদে তৃণমূল কংগ্ৰেছ এৰি থৈ গৈছিল।
বুধবাৰে দলৰ নেতা মদন মিত্ৰও মমতাৰ সৈতে বিচ্ছেদ ঘটাই ঋতব্ৰত শিবিৰত যোগদান কৰে। আজি সাংসদ কোয়েল মল্লিকে ৰাজ্যসভাৰ পৰা পদত্যাগ কৰে। কোয়েল মল্লিকৰ প্ৰকৃত নাম ৰুক্মিনি মল্লিক।তেওঁ এগৰাকী বিখ্যাত বাঙালী অভিনেত্ৰী।মূলতঃ তেওঁক টলিউডৰ “টলী-কুইন” বুলিও জনা যায়।
ৰাজ্যসভাৰ অধ্যক্ষ চি পি ৰাধাকৃষ্ণনলৈ প্ৰেৰণ কৰা এখন পত্ৰত কোয়েল মল্লিকে নিজৰ পদৰ পৰা পদত্যাগ কৰা বুলি উল্লেখ কৰিছে।তেওঁ ৰাজ্যসভাৰ সকলো বিষয়ববীয়া আৰু সদস্যক ধন্যবাদ জ্ঞাপন কৰিছে।
কোয়েল মল্লিকৰ পদত্যাগৰ আঁৰৰ কাৰণ এতিয়ালৈকে পোহৰলৈ অহা নাই, ৰাজ্যসভাৰ অধ্যক্ষলৈ প্ৰেৰণ কৰা চিঠিখনতো এই কথা উল্লেখ কৰা নাই। কোয়েল মল্লিকৰ পদত্যাগৰ লগে লগে ৰাজ্যসভাৰ পৰা পদত্যাগ কৰা টিএমচিৰ সাংসদৰ সংখ্যা ৪লৈ বৃদ্ধি পাইছে।ইয়াৰ পূৰ্বে সুখেন্দু শেখৰ ৰায়, সুস্মিতা দেৱ, আৰু প্ৰকাশ চিক বৰাইকে ৰাজ্যসভাৰ পৰা পদত্যাগ কৰিছিল।
