ভাৰত এখন উন্নয়নশীল দেশ হ’ব পাৰে, কিন্তু আৰবপতি বা বিলিয়নেয়াৰৰ সংখ্যাৰ ক্ষেত্ৰত আমেৰিকা আৰু চীনৰ দৰে দেশক প্ৰতিযোগিতা দিছে দেশখনে । আপুনি জানি আচৰিত হ’ব যে ২০২৪ চনত ভাৰতত আৰবপতিৰ সংখ্যা ১৮৫ লৈ বৃদ্ধি পাইছে । আমেৰিকাত আৰবপতিৰ সংখ্যা ৮৩৫ জন আৰু চীনত ৪২৭ জন । শেহতীয়াকৈ প্ৰকাশিত এক প্ৰতিবেদনত এই কথা পোহৰলৈ আহিছে ।
যোৱা এবছৰত ২১ শতাংশ বৃদ্ধিৰে ভাৰতৰ আৰবপতিৰ তালিকাত যোগদান কৰিছে ৩২জন নতুন লোকে । আনহাতে ২০১৫ চনৰ পৰা এই সংখ্যা ১২৩ শতাংশ বৃদ্ধি পাইছে । যোৱা এবছৰত ভাৰতত আৰবপতিৰ মুঠ সম্পদ ৪২.১ শতাংশ বৃদ্ধি পাই ৯০৫.৬ বিলিয়ন ডলাৰ হৈছেগৈ ।
আমেৰিকা আৰু চীনো এই দৌৰত আছে-
যোৱা এবছৰত আমেৰিকাত আৰবপতিৰ তালিকাত ৮৪ জন নতুন লোক সংযোজন হোৱাৰ বিপৰীতে চীনত ৯৩ জন লোকক তালিকাৰ বাহিৰত ৰখা হৈছে । আমেৰিকাত আৰবপতিৰ মুঠ সম্পদ ৪.৬ ট্ৰিলিয়ন ডলাৰৰ পৰা ৫.৮ ট্ৰিলিয়ন ডলাৰলৈ বৃদ্ধি পাইছে, আনহাতে চীনৰ কথা ক’লে ইয়াত আৰবপতিৰ মুঠ সম্পত্তি ১.৮ ট্ৰিলিয়ন ডলাৰৰ পৰা ১.৪ ট্ৰিলিয়ন ডলাৰলৈ হ্ৰাস পাইছে ।
২০২৪ চনত সমগ্ৰ বিশ্বতে আৰবপতিৰ সংখ্যা বৃদ্ধি পাইছে । ২০১৫ চনত এই সংখ্যা আছিল ১,৭৫৭, যি এই বছৰ ২,৬৮২ লৈ বৃদ্ধি পাইছে । তেওঁলোকৰ মুঠ সম্পত্তিও ৬.৩ ট্ৰিলিয়ন ডলাৰৰ পৰা ১৪ ট্ৰিলিয়ন ডলাৰলৈ বৃদ্ধি পাইছে, যি ১২১ শতাংশ বৃদ্ধি দেখুৱাইছে ।
ভাৰতৰ আৰু অধিক অগ্ৰগতিৰ সম্ভাৱনা আছে-
প্ৰতিবেদনত এইটোও প্ৰকাশ কৰা হৈছে যে ২০১৫ চনৰ পৰা ২০২০ চনলৈকে বিশ্বজুৰি আৰবপতিৰ সম্পদ বছৰি ১০ শতাংশ বৃদ্ধি পাইছে, আনহাতে ২০২০ চনৰ পৰা ই ১ শতাংশত সুস্থিৰ হৈ আছে । কিন্তু আমেৰিকা, ইউৰোপ, মধ্যপ্ৰাচ্য, আফ্ৰিকা আৰু এছিয়াৰ কিছু অংশৰ তথ্য ইয়াত অন্তৰ্ভুক্ত কৰা হোৱা নাই ।
এইবাৰ ২৬৮২ ভিতৰত ১৮৭৭ জন আৰবপতি নিজাববীয়াকৈ এই স্থানত উপনীত হোৱাৰ বিপৰীতে ৮০৫ জনেই হৈছে যিসকলে নিজৰ ধন-সম্পত্তি উত্তৰাধিকাৰী সূত্ৰে লাভ কৰিছে । ভাৰতৰ বাবে আন এক ভাল খবৰ হ’ল যে আগন্তুক দশকত আৰবপতি উদ্যোগীৰ সংখ্যাত বৃদ্ধি পৰিলক্ষিত হোৱাৰ সম্ভাৱনা আছে ।
