ধাৰাষাৰ বৰষুণৰ ফলত ব্ৰহ্মপুত্ৰ আৰু ইয়াৰ উপনৈসমূহৰ জলস্তৰ বৃদ্ধি পোৱাৰ পিছতে অসমৰ ১৬খন জিলাৰ প্ৰায় ৩.৬৩ লাখ লোক এতিয়া সংহাৰী বানৰ কৱলত
ৰাজ্যত বান পৰিস্থিতিয়ে লৈছে ভয়াৱহ ৰূপ । ধাৰাষাৰ বৰষুণৰ ফলত ব্ৰহ্মপুত্ৰ আৰু ইয়াৰ উপনৈসমূহৰ জলস্তৰ বৃদ্ধি পোৱাৰ পিছতে অসমৰ ১৬খন জিলাৰ প্ৰায় ৩.৬৩ লাখ লোক এতিয়া সংহাৰী বানৰ কৱলত । অসম ৰাজ্যিক দুৰ্যোগ ব্যৱস্থাপনা প্ৰাধিকৰণ (ASDMA)-ৰ শেহতীয়া প্ৰতিবেদন অনুসৰি, বিগত ২৪ ঘণ্টাত বানপানীত আবদ্ধ হৈ তিনিজন পুৰুষ আৰু দুটিক শিশুকে ধৰি আৰু ৫ জন লোকে কৰুণভাৱে প্ৰাণ হেৰুৱাইছে । ইয়াৰে যোৰহাট জিলাত ৪ জন আৰু কাৰ্বি আংলঙত এজন লোকৰ মৃত্যু হৈছে । আনহাতে, চৰাইদেউ আৰু কাৰ্বি আংলঙত এটি শিশুকে ধৰি দুজন লোক এতিয়াও সন্ধানহীন হৈ আছে ।
জলমগ্ন বিস্তীৰ্ণ অঞ্চল-
চৰকাৰী তথ্য অনুসৰি, বৰ্তমান ৪৫টা ৰাজহ চক্ৰৰ অন্তৰ্গত ৭৯৪খন গাঁও সম্পূৰ্ণৰূপে পানীৰ তলত থকাৰ লগতে ১৯,০৯৯.৫৯৪৪ হেক্টৰ কৃষিভূমি জলমগ্ন হৈ পৰিছে । জিলাভিত্তিক হিচাপত কেৱল শিৱসাগৰ জিলাতে সৰ্বাধিক ১.৫৭ লাখ লোক প্ৰভাৱিত হৈছে । ইয়াৰ পিছতে চৰাইদেউত ১.০৪ লাখ আৰু যোৰহাটত ৫০ হাজাৰৰো অধিক লোক বানৰ কৱলত পৰিছে । কেৱল মানুহেই নহয়, চলিত বানৰ ঢৌত প্ৰায় ৩.৮৯ লাখ পশুধনো ভয়াৱহভাৱে প্ৰভাৱিত হৈছে ।
বিপদসীমাৰ ওপৰেৰে বৈছে নদী, ব্যাহত যোগাযোগ
অসমৰ লগতে চুবুৰীয়া ৰাজ্য অৰুণাচল আৰু নাগালেণ্ডত হোৱা ধাৰাষাৰ বৰষুণৰ ফলত নদীসমূহৰ জলস্তৰ অভাৱনীয়ভাৱে বৃদ্ধি পাইছে । যোৰহাটৰ নিয়ামতিঘাটত ব্ৰহ্মপুত্ৰ, খোৱাঙত বুঢ়ীদিহিং, নাংলামুৰাঘাটত দিচাং আৰু নোমলগড়ত ধনশিৰী নদী বিপদসীমাৰ ওপৰেৰে বৈ আছে । আনহাতে, শিৱসাগৰত দিখৌ নদীৰ জলস্তৰে সৰ্বোচ্চ সীমা অতিক্ৰম কৰিছে । বিগত ২৪ ঘণ্টাত বানৰ সংহাৰী ৰূপে ২৯টা পথ ক্ষতিগ্ৰস্ত কৰাৰ লগতে ৬টা স্থানত মথাউৰি ছিঙি পেলাইছে, যাৰ ফলত যাতায়ত ব্যৱস্থা সম্পূৰ্ণ ব্যাহত হৈ পৰিছে ।
যুদ্ধকালীন ক্ষিপ্ৰতাৰে উদ্ধাৰ আৰু সাহায্য অভিযান
পৰিস্থিতি চম্ভালিবলৈ জিলা প্ৰশাসনে ইতিমধ্যে ১০১টা সাহায্য শিবিৰ আৰু বিতৰণ কেন্দ্ৰ মুকলি কৰিছে, য’ত প্ৰায় ৪৫,০০০ লোকে আশ্ৰয় গ্ৰহণ কৰিছে । ভাৰতীয় সেনা, NDRF, SDRF, অৰ্ধসামৰিক বাহিনী আৰু অগ্নি তথা জৰুৰীকালীন সেৱাৰ দলসমূহে যুদ্ধকালীন ক্ষিপ্ৰতাৰে উদ্ধাৰ অভিযান চলাই সোমবাৰে প্ৰায় ৭,০০০ লোকক নিৰাপদ স্থানলৈ স্থানান্তৰ কৰে ।
মুখ্যমন্ত্ৰী ড° হিমন্ত বিশ্ব শৰ্মাৰ বিশেষ নিৰ্দেশ মৰ্মে ৰাজ্য চৰকাৰৰ কেইবাজনো কেবিনেট মন্ত্ৰীয়ে সোমবাৰে বানাক্ৰান্ত অঞ্চলসমূহত উপস্থিত হৈ ক্ষয়-ক্ষতিৰ বুজ লোৱাৰ লগতে সাহায্য বিতৰণ প্ৰক্ৰিয়াৰ তদাৰক কৰে ।
লগতে পঢ়ক : উজনিৰ ৪ জিলাত ভয়াৱহ বান পৰিস্থিতি, মুকলি হেল্পলাইন নম্বৰ
