শিৱসাগৰ জিলাৰ দিখৌ নদীৰ ওপৰত থকা ঐতিহাসিক গেমন দলঙৰ এটা অংশ ভাঙি পৰে

শুকুৰবাৰে পুৱতি নিশা শিৱসাগৰ জিলাৰ দিখৌ নদীৰ ওপৰত থকা ঐতিহাসিক গেমন দলঙৰ এটা অংশ ভাঙি পৰাত যাতায়ত ব্যৱস্থাত এক স্থবিৰতাই বিৰাজ কৰিছে । ইয়াৰ ফলত ৩৭ নং ৰাষ্ট্ৰীয় ঘাইপথত যাতায়ত সম্পূৰ্ণৰূপে ব্যাহত হৈ পৰিছে ।

জানিব পৰা মতে শুকুৰবাৰে পুৱা প্ৰায় ৪:৩০ বজাত এই ঘটনা সংঘটিত হয় । ১৯৬৩ চনত নিৰ্মিত এই পুৰণি দলংখনৰ ভেটিৰ মাটি খহি যোৱাৰ ফলতে দলংখনৰ এটা বৃহৎ অংশ খহি পৰে বুলি জানিব পৰা গৈছে । উল্লেখযোগ্য যে, ভাঙি পৰাৰ সময়ত দলংখনত মেৰামতিৰ কাম চলি আছিল ।

এই দুৰ্ঘটনাৰ বাবে উজনি অসমৰ যাতায়ত ব্যৱস্থা সম্পূৰ্ণৰূপে স্তব্ধ হৈ পৰিছে আৰু ঘাইপথৰ দুয়োকাষে বহু বাহন আৱদ্ধ হৈ পৰিছে । প্ৰশাসনে যিমান পাৰে যান-বাহনৰ দিশ সলনি কৰি দিছে যদিও সমগ্ৰ অঞ্চলটোৰ সংযোগ ব্যৱস্থা শোচনীয় হৈ পৰিছে ।

ইফালে দলংখন ভাঙি পৰাৰ ফলত এখন ট্ৰাক নদীৰ বুকুত পৰি এক দুৰ্ঘটনাও সংঘটিত হয় । অৱশ্যে এই পৰ্যন্ত কোনো লোক হতাহত হোৱাৰ নিশ্চিত খবৰ পোৱা হোৱা নাই ।

দলংখনৰ জৰাজীৰ্ণ অৱস্থাক লৈ পূৰ্বতেও উদ্বেগ প্ৰকাশ কৰা হৈছিল । এই বছৰৰ আৰম্ভণিতে দলংখনৰ মাজৰ এটা অংশ উটি যোৱাৰ বাবে মেৰামতি আৰু যাতায়তৰ ওপৰত নিষেধাজ্ঞা আৰোপ কৰা হৈছিল । বৰ্তমান জৰুৰীকালীন উদ্ধাৰকাৰী দল আৰু স্থানীয় প্ৰশাসনৰ বিষয়াসকল ঘটনাস্থলীত উপস্থিত হৈ ক্ষয়-ক্ষতিৰ পৰিমাণ পৰীক্ষা কৰিছে আৰু মেৰামতিৰ প্ৰক্ৰিয়া আৰম্ভ কৰিছে । যাত্ৰীসকলক পৰৱৰ্তী জাননী নিদিয়া পৰ্যন্ত এই পথেৰে যাতায়ত নকৰিবলৈ পৰামৰ্শ দিয়া হৈছে ।

লগতে পঢ়ক : ৰাজ্যত নাটনি হোৱা নাই পেট্ৰল-ডিজেলৰ, উৰাবাতৰি বিয়পোৱাসকলক সাৱধানবাণী