অসমত পৰ্যাপ্ত পৰিমাণৰ পেট্ৰল আৰু ডিজেল মজুত আছে । আতংকিত হৈ প্ৰয়োজনতকৈ অধিক ইন্ধন সংগ্ৰহ নকৰিবলৈ আহ্বান ।
অসমত ইন্ধনৰ নাটনি হোৱাৰ উৰাবাতৰিৰ মাজতে ৰাজ্যৰ মুখ্য সচিবগৰাকীয়ে স্পষ্ট কৰি দিছে যে অসমত পৰ্যাপ্ত পৰিমাণৰ পেট্ৰ’ল আৰু ডিজেল মজুত আছে । তেওঁ জনসাধাৰণক আতংকিত হৈ প্ৰয়োজনতকৈ অধিক ইন্ধন সংগ্ৰহ নকৰিবলৈ আহ্বান জনাইছে ।
চৰকাৰী এক্স হেণ্ডেলযোগে মুখ্য সচিবগৰাকীয়ে জনায় যে অসমত থকা ৪টা তেল শোধনাগাৰত উৎপাদিত মুঠ ইন্ধনৰ মাত্ৰ ২৭ শতাংশহে ৰাজ্যখনত ব্যৱহৃত হয় । বাকী ৭৩ শতাংশ ইন্ধন অতিৰিক্ত হিচাপে থাকে ।
প্ৰকাশিত তথ্য অনুসৰি, ৰাজ্যখনত প্ৰতি মাহে গড়ে ১৬৮ হাজাৰ মেট্ৰিক টন পেট্ৰ’ল আৰু ৪০৩ হাজাৰ মেট্ৰিক টন ডিজেল উৎপাদন হয় । ইয়াৰ বিপৰীতে, ৰাজ্যখনত মাহেকীয়া ব্যৱহাৰৰ পৰিমাণ যথেষ্ট কম- পেট্ৰ’লৰ ব্যৱহাৰ ৬৩ হাজাৰ মেট্ৰিক টন আৰু ডিজেলৰ ব্যৱহাৰ ৯২ হাজাৰ মেট্ৰিক টন । ফলস্বৰূপে, প্ৰতি মাহে প্ৰায় ১০৫ হাজাৰ মেট্ৰিক টন পেট্ৰ’ল আৰু ৩১১ হাজাৰ মেট্ৰিক টন ডিজেল ৰাহি হয় ।
পৰ্যাপ্ত যোগান থকাৰ পাছতো ৰাজ্যৰ বিভিন্ন প্ৰান্তত একাংশ লোকে হাহাকাৰ কৰি পেট্ৰ’ল পাম্পসমূহত ভিৰ কৰা পৰিলক্ষিত হৈছে । মুখ্য সচিবগৰাকীয়ে ৰাইজক খোলা পাত্ৰত ইন্ধন ক্ৰয় নকৰিবলৈ সাৱধান কৰি দিছে আৰু জনাইছে যে এনে কৰিলে কঠোৰ আইনী ব্যৱস্থা গ্ৰহণ কৰা হ’ব ।
প্ৰশাসনে সদৰী কৰা মতে, এনে কাৰ্যত লিপ্ত থকা লোকৰ বিৰুদ্ধে ভাৰতীয় ন্যায় সংহিতাৰ বিশেষকৈ ২৮৫ নং ধাৰাৰ অধীনত (জুই বা দাহ্য পদাৰ্থৰ সৈতে জড়িত অসাৱধানতা) গোচৰ ৰুজু কৰা হ’ব । ইয়াৰ উপৰি অনুজ্ঞাপত্ৰ অবিহনে অবৈধ মজুতকৰণৰ বাবে ‘পেট্ৰ’লিয়াম এক্ট ১৯৩৪’ আৰু বিপদজনক মজুতকৰণৰ বাবে ‘এক্সপ্লচিভ এক্ট ১৮৮৪’ ৰ অধীনতো ব্যৱস্থা লোৱা হ’ব ।
লগতে পঢ়ক : অহা জনমতো বৰপেটা মেডিকেলৰ নাম সলনি কৰিব নোৱাৰেঃ গৌৰৱ গগৈক প্ৰত্যাহ্বান মুখ্যমন্ত্ৰীৰ
