ফেক্টৰীটোত সংঘটিত হোৱা বিস্ফোৰণ ইমানেই শক্তিশালী আছিল যে ইয়াৰ শব্দ প্ৰায় এক কিলোমিটাৰ দূৰলৈকে শুনা গৈছিল
গুজৰাটৰ আহমেদাবাদৰ ৰামোল অঞ্চলত আজি বিয়লি এটা মুকলি ফটকা ফেক্টৰীত এক ভয়াৱহ বিস্ফোৰণ আৰু অগ্নিকাণ্ডৰ ঘটনা সংঘটিত হয় । ৰামোল-গতৰাড ৰোডত থকা এই ফেক্টৰীটোত সংঘটিত হোৱা বিস্ফোৰণ ইমানেই শক্তিশালী আছিল যে ইয়াৰ শব্দ প্ৰায় এক কিলোমিটাৰ দূৰলৈকে শুনা গৈছিল ।
এই দুৰ্ঘটনাত এতিয়ালৈকে ৮ জন শ্ৰমিকৰ মৃত্যু হৈছে আৰু ১০ জনতকৈও অধিক লোক গুৰুতৰভাৱে অগ্নিদগ্ধ হৈছে বুলি বাতৰিত প্ৰকাশ । ঘটনাৰ পিছতে অঞ্চলটোত হুৱাদুৱা পৰিস্থিতিৰ সৃষ্টি হয় । অগ্নি নিৰ্বাপক বাহিনীৰ কেইবাখনো গাড়ীয়ে ঘটনাস্থলীত উপস্থিত হৈ জুই নিয়ন্ত্ৰণৰ চেষ্টা চলাইছে আৰু ১০৮ এম্বুলেন্সৰ জৰিয়তে আহতসকলক হাস্পতাললৈ প্ৰেৰণ কৰা হৈছে । উদ্ধাৰ কাৰ্য এতিয়াও অব্যাহত আছে । বিস্ফোৰণৰ প্ৰকৃত কাৰণ জানিবলৈ আৰক্ষী আৰু বিভাগীয় সংস্থাই তদন্ত আৰম্ভ কৰিছে ।
মুখ্যমন্ত্ৰীৰ আৰ্থিক সাহায্য ঘোষণা-
গুজৰাটৰ মুখ্যমন্ত্ৰী ভূপেন্দ্ৰ পেটেলে এই ঘটনাত গভীৰ শোক প্ৰকাশ কৰিছে । তেওঁ মৃতকৰ পৰিয়াললৈ ৪ লাখ টকাকৈ আৰু আহতসকললৈ ৫০,০০০ টকাকৈ আৰ্থিক সাহায্য ঘোষণা কৰাৰ লগতে ভুক্তভোগীসকলক উপযুক্ত চিকিৎসা প্ৰদান কৰিবলৈ প্ৰশাসনক নিৰ্দেশ দিছে ।
লগতে পঢ়ক : চিকিৎসালয়ত ভৰ্তি সোনম ৱাংচুক; যন্তৰ মন্তৰ খালী কৰিবলৈ নিৰ্দেশ দিল্লী আৰক্ষী
