প্ৰায় দুটা দশক পূৰ্বৰ এই বিৰল ছবিখনৰ অস্তিত্বক লৈ স্বয়ং লিয়নেল মেছিয়েও আশ্চৰ্য প্ৰকাশ কৰিছে
ফুটবল বিশ্বই এতিয়া এক ঐতিহাসিক ক্ষণৰ বাবে অধীৰ আগ্ৰহেৰে অপেক্ষা কৰিছে । ২০২৬-ৰ ফিফা বিশ্বকাপৰ ফাইনেলত মুখামুখি হ’বলৈ সাজু হৈছে ডিফেণ্ডিং চেম্পিয়ন আৰ্জেণ্টিনা আৰু ইউৰোপীয় চেম্পিয়ন স্পেইন । কিন্তু এই মেগা ফাইনেল মেচখনৰ পূৰ্বে সমগ্ৰ বিশ্বতে চৰ্চাৰ কেন্দ্ৰবিন্দু হৈ পৰিছে আৰ্জেণ্টিনাৰ মহান খেলুৱৈ লিয়নেল মেছি আৰু স্পেইনৰ কিশোৰ চাঞ্চল্য লামিনে ইয়ামালৰ প্ৰায় ১৮ বছৰ পুৰণি এখন বিশেষ ছবি ।
প্ৰায় দুটা দশক পূৰ্বৰ এই বিৰল ছবিখনৰ অস্তিত্বক লৈ স্বয়ং লিয়নেল মেছিয়েও আশ্চৰ্য প্ৰকাশ কৰিছে । ‘ডি স্পৰ্টছ’-এ শ্বেয়াৰ কৰা আৰু এক্সত ‘প্লেনেটা ডো ফুটেবল’ (Planeta do Futebol)-এ উদ্ধৃত কৰা এটা ভিডিঅ’ত মেছিয়ে কয় যে ইয়ামাল কেঁচুৱা হৈ থাকোঁতে তোলা এখন ছবিয়ে ফুটবলৰ আটাইতকৈ ডাঙৰ খেলখনৰ প্ৰাকমুহূৰ্তত কেনেকৈ এক নতুন তাৎপৰ্য লাভ কৰিছে, সেয়া দেখিবলৈ সঁচাকৈয়ে অপূৰ্ব ।
মেছিয়ে কয়- “প্ৰকৃততে এই ছবিখনৰ অস্তিত্বই আচৰিত, কাৰণ যেতিয়া ফটোখন তোলা হৈছিল তেতিয়া তেওঁ মাত্ৰ এটা কেঁচুৱা আছিল আৰু এতিয়া আমি দুয়ো বিশ্বকাপৰ ফাইনেলত প্ৰতিযোগিতা কৰি আছো । এই সকলোবোৰ সঁচাকৈয়ে অবিশ্বাস্য !”
কেনেকৈ তোলা হৈছিল এই ঐতিহাসিক ছবিখন?
২০০৮ চনত বাৰ্চিলোনাৰ হৈ খেলি থকাৰ সময়তে কেটেলান বাতৰি কাকত ‘ডিয়াৰিঅ’ স্পৰ্ট’ (Diario Sport)-এ এটা দাতব্য ফটোশ্বুটৰ আয়োজন কৰিছিল । ক্লাবটোৰ আইকনিক কেম্প ন্যু ষ্টেডিয়ামত অনুষ্ঠিত হোৱা এই ফটোশ্বুটৰ সময়ত, তেতিয়াৰ ২০ বছৰীয়া আৰ্জেণ্টিনীয় তাৰকা মেছিয়ে এটি শিশু ইয়ামালৰ সৈতে পোজ দিছিল, যি তেওঁৰ মাতৃ শ্বেইলা এবানাৰ সৈতে এটা সৰু প্লাষ্টিকৰ টাৱত বহি আছিল । ফ্ৰীলেঞ্চ ফটোগ্ৰাফাৰ জোয়ান মনফৰ্টে কেমেৰাত বন্দী কৰা এই ছবিখন যে এদিন ফুটবল ইতিহাসৰ আটাইতকৈ চৰ্চিত ছবি হৈ পৰিব, সেয়া কোনেও কল্পনাও কৰা নাছিল ।
ইউনিচেফৰ বিশেষ পোষ্ট:
ফিফা বিশ্বকাপ ২০২৬-ৰ ফাইনেলৰ পূৰ্বে, ইউনিচেফে এই ছবিখন শ্বেয়াৰ কৰি দুয়োগৰাকী তাৰকাৰ অপূৰ্ব যাত্ৰাৰ কথা আলোকপাত কৰে । এক্সৰ এটা পোষ্টত ইউনিচেফে লিখে- “হয়, আপোনালোকে দেখা সেই ছবিবোৰ সঁচা । ১৮ বছৰতকৈও অধিক সময়ৰ আগতে, লামিনে ইয়ামাল নামৰ এটি শিশু আৰু তেওঁৰ মাতৃ শ্বেইলাই ইউনিচেফৰ এক পুঁজি সংগ্ৰহকাৰী ফটোশ্বুটত লিয়নেল মেছিক লগ পাইছিল ।” উল্লেখ্য যে, খেলপথাৰৰ বাহিৰতো মেছি আৰু লামিনে ইয়ামাল দুয়োজনে ইউনিচেফৰ সদিচ্ছা দূত হিচাপে বিশ্বজুৰি শিশুসকলৰ সমৰ্থনত কাম কৰি আহিছে ।
লগতে পঢ়ক : বাথটাবৰ সেই কণমানি কেঁচুৱাটো এতিয়া মেছিৰ বাবে ডাঙৰ প্ৰত্যাহ্বান!
