২০২৪ চনত মুক্তি লাভ কৰা আৰু চেন্সৰ বোৰ্ডৰ প্ৰমাণপত্ৰ লাভ কৰা শ্ৰেষ্ঠ ছবি তথা কলা-কুশলীসকলক সন্মানিত কৰিবলৈ ১৮ জুলাইত নতুন দিল্লীত এই বঁটাসমূহ ঘোষণা কৰা হয়
ভাৰতীয় চিনেমা জগতৰ আটাইতকৈ সন্মানীয় আৰু মৰ্যাদাপূৰ্ণ ৭২সংখ্যক ৰাষ্ট্ৰীয় চলচ্চিত্ৰ বঁটাৰ আনুষ্ঠানিক ঘোষণা কৰা হৈছে । ২০২৪ চনত মুক্তি লাভ কৰা আৰু চেন্সৰ বোৰ্ডৰ প্ৰমাণপত্ৰ লাভ কৰা শ্ৰেষ্ঠ ছবি তথা কলা-কুশলীসকলক সন্মানিত কৰিবলৈ ১৮ জুলাইত নতুন দিল্লীত এই বঁটাসমূহ ঘোষণা কৰা হয় ।
প্ৰখ্যাত চলচ্চিত্ৰ নিৰ্মাতা জয়ৰাজৰ নেতৃত্বত গঠিত ১১ জনীয়া এক বিশেষ জুৰীয়ে সমগ্ৰ দেশৰ পৰা অহা প্ৰতিযোগিতাসমূহ পৰ্যালোচনা কৰি এই চূড়ান্ত তালিকা প্ৰস্তুত কৰে ।
চলিত বৰ্ষৰ বঁটা লাভ কৰা উল্লেখনীয় বিজয়ীসকলৰ সবিশেষ তথ্য তলত আগবঢ়োৱা হ’ল:
কাৰ্তিক আৰয়ান আৰু মামুটীলৈ শ্ৰেষ্ঠ অভিনেতাৰ খিতাপ, শ্ৰেষ্ঠ অভিনেত্ৰী য়ামী গৌতম
‘চান্দু চেম্পিয়ন’ ছবিখনত কৰা অনবদ্য অভিনয়ৰ বাবে কাৰ্তিক আৰয়ান আৰু ‘ব্ৰহ্ময়ুগম’ ছবিৰ বাবে দক্ষিণৰ তাৰকা মামুটীয়ে যুটীয়াভাৱে লাভ কৰিছে শ্ৰেষ্ঠ অভিনেতাৰ ৰাষ্ট্ৰীয় বঁটা । আনহাতে, ‘আৰ্টীকল ৩৭০’ ছবিখনত কৰা শক্তিশালী অভিনয়ৰ বাবে য়ামী গৌতমে লাভ কৰিছে শ্ৰেষ্ঠ অভিনেত্ৰীৰ সন্মান । হিন্দী চিনেমাৰ গভীৰ বুজাবুজি আৰু নিৰপেক্ষ বিশ্লেষণৰ বাবে সঞ্জীৱ শ্ৰীৱাস্তৱক শ্ৰেষ্ঠ চলচ্চিত্ৰ সমালোচকৰ বঁটা প্ৰদান কৰা হৈছে ।
শ্ৰেষ্ঠ অসমীয়া ছবি হিচাপে বিবেচিত ‘জুইফুল’
অসমৰ বাবে এক অত্যন্ত গৌৰৱৰ খবৰ কঢ়িয়াই আনি এই বৰ্ষৰ শ্ৰেষ্ঠ অসমীয়া ছবিৰ বঁটা আজুৰি আনিবলৈ সক্ষম হৈছে ‘জুইফুল’ নামৰ চলচ্চিত্ৰখনে । উত্তৰ-পূৰ্বাঞ্চলৰ আন এখন ৰাজ্য মণিপুৰৰ ‘সুনীতা’ নামৰ ছবিখনে শ্ৰেষ্ঠ মণিপুৰী ছবিৰ বঁটা লাভ কৰিছে ।
মূল শিতানৰ বঁটাসমূহৰ সম্পূৰ্ণ তালিকা
ছবি আৰু পৰিচালনা
- শ্ৰেষ্ঠ কাহিনীচিত্ৰ (Best Feature Film): আৰ্টীকল ৩৭০ (হিন্দী)
- সম্পূৰ্ণ মনোৰঞ্জন প্ৰদান কৰা শ্ৰেষ্ঠ ছবি: কল্কি ২৮৯৮ এডি
- ৰাষ্ট্ৰীয় আৰু সামাজিক মূল্যবোধক প্ৰসাৰ কৰা শ্ৰেষ্ঠ ছবি: কেপ্তেইন মিলাৰ
- শ্ৰেষ্ঠ পৰিচালনা: আনন্দ এল ৰায়
- শ্ৰেষ্ঠ সহ অভিনেতা: সঞ্জয় মিশ্ৰ (ছবি: ভক্ষক)
- শ্ৰেষ্ঠ সহ অভিনেত্ৰী: সচনা নামিদাস (ছবি: মহাৰাজা)
- শ্ৰেষ্ঠ শিশু শিল্পী: ৰিদ্ধিমান বেনাৰ্জী, তপোময় দেব আৰু গীতালশ্ৰী চক্ৰৱৰ্তী (ছবি: অঙ্কো কী কোঠী)
সংগীত আৰু কাৰিকৰী দিশ
- শ্ৰেষ্ঠ সংগীত পৰিচালনা: শাশ্বত সচদেৱ (আৰ্টীকল ৩৭০)
- শ্ৰেষ্ঠ গীত: মনোজ মুন্তাচিৰ (গীত: ‘জানে দো’)
- শ্ৰেষ্ঠ মহিলা কণ্ঠশিল্পী: বৈকোম বিজয়লক্ষ্মী (মালয়ালম)
- শ্ৰেষ্ঠ পুৰুষ কণ্ঠশিল্পী: অভয় যোধপুৰকাৰ (মাৰাঠী)
- শ্ৰেষ্ঠ কৰিঅ’গ্ৰাফী: বিজয় গাংগুলী (গীত: ‘আজ কী ৰাত’, স্ত্ৰী ২)
- শ্ৰেষ্ঠ চিত্ৰনাট্যকাৰ: বান্দ্ৰেড্ডী সুকুমাৰ (পুষ্পা ২)
আঞ্চলিক ভাষাৰ শ্ৰেষ্ঠ চলচ্চিত্ৰসমূহ
- হিন্দী: শ্ৰীকান্ত
- তামিল: ৰায়ান
- তেলুগু: কমিটি কুল্লু
- মাৰাঠী: মুক্কাম পোষ্ট বোম্বিলবাড়ী
- মালয়ালম: ফেমিনিচী ফাতিমা
- কানাড়া: মিথিয়া
- বঙালী: চলচিত্ৰ এখন
- ওড়িয়া: লহৰী
- গুজৰাটী: মাৰান
- গড়ৱালী: ঢোলী
- চুটি ছবি: হমচফৰ (মাৰাঠী)
লগতে পঢ়ক : “ষ্টাৰডমৰ নামত ‘লাভ জেহাদ’; এইবাৰ আমিৰ খানক মৃত্যুৰ ভাবুকি
