২০২৪-২৫ বিত্তীয় বৰ্ষত ভাৰতে ২ লাখ কোটি টকাৰো অধিক মূল্যৰ অভিলেখ সংখ্যক স্মাৰ্টফোন ৰপ্তানি কৰিছে । ২০২৩-২৪ চনৰ তুলনাত এই সংখ্যা ৫৪ শতাংশ বেছি । ইয়াত কেৱল এপলৰ অংশ ১.৫০ লাখ কোটি টকা । কেন্দ্ৰীয় ইলেক্ট্ৰনিকছ আৰু তথ্য-প্ৰযুক্তি মন্ত্ৰী অশ্বিনী বৈষ্ণৱে ছ’চিয়েল মিডিয়াত প্ৰকাশ কৰে যে প্ৰডাকচন লিংকড ইনচেন্টিভ (পি এল আই) আঁচনিৰ বাবেই এয়া সম্ভৱ হৈছে ।

মঙলবাৰে আই টি মন্ত্ৰী অশ্বিনী বৈষ্ণৱে ছ’চিয়েল মিডিয়াত লিখিছে, ৰপ্তানি বৃদ্ধিয়ে বৃহৎ পৰিসৰত কৰ্মসংস্থাপনৰ সুযোগ সৃষ্টি কৰিছে । ভাৰতৰ ক্ষুদ্ৰ আৰু মজলীয়া উদ্যোগ অৰ্থাৎ এম এছ এম ই সমূহ বিশ্বব্যাপী যোগান নেটৱৰ্কৰ অংশ হৈ পৰিছে । ইয়াৰ ফলত স্থানীয় ইলেক্ট্ৰনিকছ উৎপাদন পৰিৱেশ তন্ত্ৰ দ্ৰুতগতিত বৃদ্ধি পাইছে । ২০২৪-২৫ বিত্তীয় বৰ্ষৰ মাত্ৰ ১১ মাহত (এপ্ৰিলৰ পৰা ফেব্ৰুৱাৰীলৈকে) ভাৰতৰ স্মাৰ্টফোনৰ ৰপ্তানি ১.৭৫ লাখ কোটি টকা অতিক্ৰম কৰিছিল ।

বৈষ্ণৱে কয়, বৰ্তমান কেৱল দেশৰ ইলেক্ট্ৰনিকছ ৰপ্তানি বৃদ্ধি হোৱাই নহয়, দেশত ব্যৱহৃত ফোনসমূহৰ ৯৯ শতাংশ ভাৰতত নিৰ্মাণ কৰা হৈছে । ভাৰতৰ ৰপ্তানি বৃদ্ধিৰ ক্ষেত্ৰত এপলৰ অৱদান সৰ্বাধিক । মুঠ ৰপ্তানিত আইফোনৰ অংশ প্ৰায় ৭০ শতাংশ । কেৱল তামিলনাডুৰ ফক্সকন উদ্যোগটোৱে ৰপ্তানিৰ ৫০ শতাংশ অৰিহণা যোগাইছিল ।

এপলে ভাৰতৰ পৰা আমেৰিকালৈ অধিক আইফোন ৰপ্তানি কৰাৰ পৰিকল্পনা কৰিছে । ইয়াৰ আঁৰৰ কাৰণ আমেৰিকাৰ ৰাষ্ট্ৰপতি ড’নাল্ড ট্ৰাম্পৰ পাৰস্পৰিক শুল্ক বুলি ধাৰণা কৰা হৈছে । চীনৰ পৰা সামগ্ৰী আমদানি কৰাৰ বৰ্ধিত ব্যয় হ্ৰাস কৰাৰ বাবে এই পদক্ষেপক অস্থায়ী সমাধান হিচাপে বিবেচনা কৰিছে কোম্পানীটোৱে ।

১০ বছৰত ছয়গুণতকৈও অধিক বৃদ্ধি পালে ৰপ্তানি-

বৈষ্ণৱে কয় যে, যোৱা ১০ বছৰত দেশত ইলেক্ট্ৰনিকছ উৎপাদন পাঁচগুণতকৈ অধিক বৃদ্ধি পাইছে আৰু ৰপ্তানি ছয়গুণতকৈও অধিক বৃদ্ধি পাইছে । চৰকাৰে নিষ্ক্রিয় উপাদান পৰিকল্পনাৰ বাবে এক খচৰা বিজ্ঞপ্তি প্ৰকাশ কৰিছে, যি প্ৰায় দুটা সপ্তাপ পৰ্যন্ত পৰামৰ্শৰ বাবে খোলা থাকিব ।

মন্ত্ৰীগৰাকীয়ে পেচিভ কম্পোনেণ্ট মেনুফেকচাৰিং আঁচনি আৰু গাইডলাইনৰ কথাও ঘোষণা কৰে । ২২,৯১৯ কোটি টকাৰ প্ৰহোতসন প্ৰদানৰ ব্যৱস্থা আছে, যাৰ ফলত প্ৰায় এক লাখ প্ৰত্যক্ষ চাকৰিৰ সৃষ্টি হ’ব আৰু সম্পূৰ্ণ সামগ্ৰীৰ মূল্য সংযোজনৰ প্ৰসাৰ ঘটিব । ইয়াত ৪০০ৰো অধিক সৰু-ডাঙৰ উৎপাদন ইউনিট আছে, যিয়ে বিভিন্ন ধৰণৰ অংশ নিৰ্মাণ কৰে ।

ইলেক্ট্ৰনিক কম্পোনেণ্ট মেনুফেকচাৰিং আঁচনিৰ অধীনত এই সুবিধাসমূহ ১ এপ্ৰিলৰ পৰা আৰম্ভ কৰি ছবছৰৰ বাবে প্ৰদান কৰা হ’ব বুলিও তেওঁ কয় । টাৰ্ণঅভাৰ সংযুক্ত প্ৰহোতসনৰ বাবে কোম্পানীসমূহে ১০ কোটিৰ পৰা ১০০০ কোটি টকাৰ ভিতৰত বিনিয়োগ কৰিব লাগিব আৰু প্ৰহোতসন ১ৰ পৰা ১০ শতাংশৰ ভিতৰত হ’ব । এই আঁচনিৰ অধীনত প্ৰিণ্টেড চাৰ্কিট বৰ্ড আৰু এছএমডি পেচিভ কম্পোনেণ্টৰ বাবে ২৫ শতাংশ পৰ্যন্ত মূলধনী ব্যয়ৰ প্ৰসোতসনৰ লগতে টাৰ্ণঅভাৰ লিংকড প্ৰহোতসন প্ৰদান কৰা হ’ব ।

মাৰ্চ মাহ শেষ হওঁ হওঁ আৰু লগে লগে নতুন কৰ বৰ্ষ আৰম্ভ হ’বলৈ সাজু হৈছে । প্ৰতি মাহৰ দৰেই ২০২৫ চনৰ ১ এপ্ৰিলৰ দিনটোও বহু ডাঙৰ পৰিৱৰ্তনৰ সৈতে আৰম্ভ হ’ব । এই পৰিৱৰ্তনৰ প্ৰভাৱ আপোনাৰ পাকঘৰত ব্যৱহাৰ কৰা এল পি জি চিলিণ্ডাৰৰ দামৰ পৰা আপোনাৰ বেংক একাউণ্টলৈকে অনুভৱ হ’ব । একে সময়তে যদি আপুনি এছ বি আইকে ধৰি যিকোনো বেংকৰ ক্ৰেডিট কাৰ্ড ব্যৱহাৰ কৰে তেন্তে ইয়াৰ সৈতে জড়িত নিয়মবোৰো সলনি হ’বলৈ গৈ আছে । ১ এপ্ৰিলৰ পৰা কাৰ্যকৰী হ’বলগীয়া এই ডাঙৰ পৰিৱৰ্তনসমূহৰ বিষয়ে বিতংভাৱে জানক…

এল পি জিৰ মূল্য-

প্ৰতি মাহৰ প্ৰথম দিনাই তেল আৰু গেছ বিতৰণ কোম্পানীয়ে এল পি জি চিলিণ্ডাৰৰ মূল্য সংশোধন কৰে আৰু ২০২৫ চনৰ ১ এপ্ৰিলত ইয়াৰ পৰিৱৰ্তন দেখা যায় । শেহতীয়াকৈ ১৯ কেজি এল পি জি চিলিণ্ডাৰৰ মূল্য বৃদ্ধি আৰু হ্ৰাস পোৱাৰ বিপৰীতে দীৰ্ঘদিন ধৰি ৰন্ধন গেছৰ চিলিণ্ডাৰৰ মূল্য একেই আছে । এনে পৰিস্থিতিত নতুন বিত্তীয় বৰ্ষৰ আৰম্ভণিৰ লগে লগে ৰাইজে ১৪ কেজি চিলিণ্ডাৰৰ মূল্যৰ সকাহদায়ক পৰিৱৰ্তনৰ আশা কৰিছে ।

তদুপৰি চি এন জি আৰু পি এন জিৰ মূল্যৰ উপৰিও এয়াৰ টাৰ্বাইন ইন্ধন অৰ্থাৎ এ টি এফৰ মূল্যও সংশোধন কৰা হৈছে আৰু ২০২৫ চনৰ ১ এপ্ৰিলত ইয়াৰ পৰিৱৰ্তন দেখা যাব । চি এন জিৰ মূল্যৰ উঠা-নমাই আপোনাৰ বাহনৰ খৰচ বৃদ্ধি কৰিব বা সকাহ দিব যদিও এ টি এফৰ মূল্য বৃদ্ধিয়ে বিমান যাত্ৰা ব্যয়বহুল কৰি তুলিব পাৰে ।

ক্ৰেডিট কাৰ্ড সম্পৰ্কীয় নিয়ম-

২০২৫ চনৰ ১ এপ্ৰিলৰ পৰা ক্ৰেডিট কাৰ্ডৰ নিয়ম সলনি হ’ব । যাৰ ফলত ইয়াৰ ওপৰত উপলব্ধ পুৰস্কাৰ আৰু অন্যান্য সুবিধাসমূহৰ ওপৰত প্ৰভাৱ পৰিব । আনহাতে SBI এ ইয়াৰ SimplyCLICK ক্ৰেডিট কাৰ্ডত Swiggy পুৰস্কাৰ ৫ গুণৰ পৰা আধালৈ হ্ৰাস কৰিব । গতিকে এয়াৰ ইণ্ডিয়াৰ চিগনেচাৰ পইণ্ট ৩০ৰ পৰা ১০লৈ হ্ৰাস কৰা হ’ব । ইয়াৰ উপৰিও আই ডি এফ চি ফাৰ্ষ্ট বেংকে ক্লাব ভিষ্টাৰ মাইলষ্টোনৰ সুবিধাসমূহ বন্ধ কৰিবলৈ ওলাইছে ।

বেংক একাউণ্টৰ সৈতে জড়িত এই পৰিৱৰ্তন-

এপ্ৰিল মাহৰ প্ৰথমৰ পৰা ভাৰতীয় ষ্টেট বেংক (এছ বি আই) আৰু পঞ্জাব নেচনেল বেংক (পি এন বি)কে ধৰি বহু বেংকে গ্ৰাহকৰ সঞ্চয় একাউণ্টত নূন্যতম বেলেঞ্চৰ সৈতে জড়িত নিয়মসমূহ সংশোধন কৰিবলৈ ওলাইছে । বেংকে একাউণ্টধাৰীৰ নূন্যতম বেলেঞ্চৰ বাবে খণ্ডভিত্তিকভাৱে নতুন সীমা নিৰ্ধাৰণ কৰিব আৰু নূন্যতম বেলেঞ্চ একাউণ্টত ৰখা নহ’লে জৰিমনা বিহা হ’ব পাৰে ।

এই ইউ পি আই একাউণ্টসমূহ বন্ধ হ’ব-

১ এপ্ৰিলৰ পৰা পৰৱৰ্তী পৰিৱৰ্তন ইউ পি আইৰ সৈতে জড়িত আৰু দীৰ্ঘদিন ধৰি সক্ৰিয় নোহোৱা মোবাইল নম্বৰৰ সৈতে সংযুক্ত ইউ পি আই একাউণ্টসমূহ বেংকৰ ৰেকৰ্ডৰ পৰা আঁতৰাই দিয়া হ’ব । যদি আপোনাৰ ফোন নম্বৰ ইউ পি আই এপৰ সৈতে সংযুক্ত হৈ থাকে আৰু আপুনি ইয়াক বহুদিন ব্যৱহাৰ কৰা নাই, তেন্তে ইয়াৰ সেৱাসমূহ বন্ধ হ’ব পাৰে ।

কৰ সম্পৰ্কীয় পৰিৱৰ্তন-

২০২৫ চনৰ বাজেটত চৰকাৰে মধ্যবিত্ত শ্ৰেণীক সকাহ দিয়াৰ বাবে বহু ডাঙৰ ডাঙৰ ঘোষণা কৰিছিল, য’ত কৰ স্লেব, টি ডি এছ, কৰ ৰেহাই আদিৰ পৰিৱৰ্তন আছিল । পুৰণি আয়কৰ আইন ১৯৬১ৰ ঠাইত নতুন আয়কৰ বিধেয়ক প্ৰস্তাৱ কৰা হৈছিল ।

এই সকলো পৰিৱৰ্তন ২০২৫ চনৰ ১ এপ্ৰিলৰ পৰা কাৰ্যকৰী হ’বলৈ গৈ আছে । নতুন কৰ স্লেবৰ অধীনত বছৰি ১২ লাখ টকা পৰ্যন্ত উপাৰ্জন কৰা ব্যক্তিসকলক কৰ আদায়ৰ পৰা ৰেহাই দিয়া হ’ব । ইয়াৰ উপৰিও দৰমহাপ্ৰাপ্ত কৰ্মচাৰীসকলে ৭৫ হাজাৰ টকাৰ মানক কৰ্তনৰ যোগ্যতা অৰ্জন কৰিব । অৰ্থাৎ ১২.৭৫ লাখ টকা পৰ্যন্ত দৰমহাৰ আয় এতিয়া কৰ ৰেহাই পাব । কিন্তু এই ৰেহাই কেৱল নতুন কৰ বিকল্প বাছি লোৱাসকলৰ ক্ষেত্ৰতহে প্ৰযোজ্য ।

ইয়াৰ উপৰিও উৎসত কৰ কৰ্তন (টি ডি এছ) নিয়মসমূহো আপডেট কৰা হৈছে, য’ত অপ্ৰয়োজনীয় কৰ্তন হ্ৰাস আৰু কৰদাতাৰ বাবে নগদ ধনৰ প্ৰবাহ উন্নত কৰিবলৈ বিভিন্ন ধাৰাত সীমা বৃদ্ধি কৰা হৈছে । উদাহৰণস্বৰূপে, জ্যেষ্ঠ নাগৰিকৰ সুতৰ আয়ৰ ওপৰত টি ডি এছৰ সীমা দুগুণ কৰি ১ লাখ টকালৈ বৃদ্ধি কৰা হৈছে, যাৰ ফলত বৃদ্ধসকলৰ আৰ্থিক সুৰক্ষা বৃদ্ধি পাইছে ।

একেদৰে ভাড়াৰ আয়ৰ ৰেহাইৰ সীমা বছৰি ৬ লাখ টকালৈ বৃদ্ধি কৰা হৈছে, যাৰ ফলত ঘৰৰ মালিকৰ ওপৰত বোজা লাঘৱ হৈছে আৰু চহৰ অঞ্চলত ভাড়াৰ বজাৰখন বৃদ্ধি পাব পাৰে ।