ঝেলাম নদীৰ জলপৃষ্ঠ হঠাতে বৃদ্ধি পোৱাৰ বাবে শনিবাৰে পাকিস্তান অধীকৃত কাশ্মীৰত আতংকৰ সৃষ্টি হয় । জলপৃষ্ঠ বৃদ্ধিৰ বাবে মুজাফৰাবাদৰ লগতে ইয়াৰ দাঁতিকাষৰীয়া অঞ্চলত বানপানীৰ আশংকাই দেখা দিছে । ইফালে ভাৰতে অনন্তনাগৰ অতিৰিক্ত পানী পূৰ্ব কোনো জাননী অবিহনে মুকলি কৰি দিয়াৰ অভিযোগ উত্থাপন কৰিছে পাকিস্তানে ।
চাকোঠি সীমান্তৰ পৰা মুজাফৰাবাদ চহৰলৈকে নদীখনৰ জলপৃষ্ঠ বৃদ্ধিয়ে হাটিয়ান বালা, ঘৰী দুপাট্টা, মাঝোই আদি গাঁৱত আতংকৰ সৃষ্টি কৰিছে । মছজিদৰ পৰা জৰুৰী সতৰ্কবাণী প্ৰচাৰ কৰা হৈছে আৰু জনসাধাৰণক নিৰাপদ স্থানলৈ যাবলৈ কোৱা হৈছে ।
