২০২৬ চনৰ ফিফা বিশ্বকাপ ভাৰতীয় ক্ৰীড়াপ্ৰেমীৰ বাবে অধিক বিশেষ হ’বলৈ গৈ আছে
১২ জুনৰ পৰা অনুষ্ঠিত হ’ব ফিফা ফুটবল বিশ্বকাপ । অৱশ্যে এই প্ৰতিযোগিতাত আনুষ্ঠানিকভাৱে ভাৰতৰ দল নাই যদিও সমগ্ৰ দেশতে ফুটবল বিশ্বকাপক লৈ এক উছৱমুখৰ পৰিৱেশৰ সৃষ্টি হয় । ক্ৰিকেট উন্মাদনাৰ মাজতে চাহ দোকানৰ পৰা কাৰ্যালয়লৈকে এই সময়ছোৱাত কেৱল ফুটবলৰেই চৰ্চা চলে । কিন্তু এইবাৰৰ, ২০২৬ চনৰ ফিফা বিশ্বকাপ ভাৰতীয় ক্ৰীড়াপ্ৰেমীৰ বাবে অধিক বিশেষ হ’বলৈ গৈ আছে । ভাৰতীয় মূলৰ, বিশেষকৈ কেৰেলা আৰু তামিলনাডুৰ সৈতে সম্পৰ্ক থকা দুজন প্ৰতিভাশালী যুৱ ফুটবলাৰে এইবাৰ বিশ্বমঞ্চত ইতিহাস ৰচনা কৰিবলৈ সাজু হৈছে ।
কাটাৰৰ দলত কেৰেলাৰ তাহচিন : এক ঐতিহাসিক যাত্ৰা
কাটাৰৰ ৰাষ্ট্ৰীয় ফুটবল দলৰ মুখ্য প্ৰশিক্ষক হুলেন লোপেটেগুইয়ে ঘোষণা কৰা ২৬ জনীয়া বিশ্বকাপ দলত স্থান লাভ কৰিছে ভাৰতীয় মূলৰ ১৯ বছৰীয়া তৰুণ ফুটবলাৰ তাহচিন মহম্মদ জামছিদে । তাহচিনৰ এই নিৰ্বাচনে কেৰেলাৰ ফুটবল অনুৰাগীসকলৰ মাজত ব্যাপক উৎসাহৰ সৃষ্টি কৰিছে । যদি তেওঁ খেলপথাৰত নামিবলৈ সুযোগ পায়, তেন্তে তেওঁ হ’ব ফিফা বিশ্বকাপৰ মূল পৰ্বত খেলা কেৰেলাৰ শিপা থকা তথা ভাৰতীয় মূলৰ সৰ্বপ্ৰথম খেলুৱৈ ।
কান্নুৰৰ পৰা দোহালৈ :
তাহচিনৰ জন্ম আৰু ডাঙৰ-দীঘল হৈছিল দোহাত । তেওঁৰ পিতৃ জামছিদ কেৰেলাৰ থলাছেৰীৰ আৰু মাতৃ শ্বাইমা কান্নুৰ জিলাৰ ভালা পট্টনমৰ বাসিন্দা । ১৯৯৬ চনতে তেওঁলোকৰ পৰিয়ালটো কাটাৰলৈ স্থানান্তৰিত হৈছিল ।
এচ্পায়াৰ একাডেমীৰ উৎপাদন :
কাটাৰৰ বিখ্যাত ‘এচ্পায়াৰ একাডেমী’ৰ পৰা প্ৰশিক্ষণপ্ৰাপ্ত তাহচিনে ইতিমধ্যে কাটাৰৰ ১৭ বছৰ আৰু ১৯ বছৰ অনুৰ্ধ দলক প্ৰতিনিধিত্ব কৰিছে । ইয়াৰ উপৰি, তেওঁ দেশখনৰ শীৰ্ষ ফুটবল লীগ ‘কাটাৰ ষ্টাৰ্ছ লীগ’ত অল দুহাইল (Al Duhail) দলৰ হৈ খেলি ইতিহাস সৃষ্টি কৰিছিল ।
খেলৰ শৈলী :
বাওঁ উইংগাৰ (Left Winger) হিচাপে খেলা তাহচিন তেওঁৰ দ্ৰুত গতি আৰু উৎকৃষ্ট ড্ৰিবলিং ক্ষমতাৰ বাবে পৰিচিত । আফগানিস্তানৰ বিৰুদ্ধে বিশ্বকাপ কোৱালিফায়াৰ মেচত তেওঁৰ জ্যেষ্ঠ দলত অভিষেক ঘটিছিল ।
দৌৰত আছে অষ্ট্ৰেলিয়াৰ নিশান ভেলুপিল্লাইও-
কেৰেলাৰ তাহচিনৰ সমান্তৰালভাৱে ভাৰতীয় মূলৰ আন এজন খেলুৱৈয়ো এইবাৰ বিশ্বকাপৰ মঞ্চ কঁপাবলৈ সাজু হৈছে । অষ্ট্ৰেলিয়াৰ ২৬ জনীয়া বিশ্বকাপ দলত স্থান লাভ কৰিছে মেলবৰ্ণ ভিক্টৰীৰ ২৫ বছৰীয়া গতিশীল উইংগাৰ নিশান ভেলুপিল্লাই । নিশানৰ পূৰ্বপুৰুষৰ শিপা কেৰেলাৰ চুবুৰীয়া ৰাজ্য তামিলনাডুৰ সৈতে জড়িত ।
ঐতিহাসিক মুহূৰ্তৰ অপেক্ষা-
যদিও ভাৰতীয় ফুটবল দলটোৱে ৪৮ টা দলৰ এই বৰ্ধিত বিশ্বকাপলৈ যোগ্যতা অৰ্জন কৰিব নোৱাৰিলে, তথাপিও তাহচিন আৰু নিশানৰ দৰে খেলুৱৈৰ জৰিয়তে ভাৰতৰ নাম বিশ্বমঞ্চত উচ্চাৰিত হ’ব । এতিয়া ক্ৰীড়াপ্ৰেমীৰ মাজত উৎসুকতা বৃদ্ধি পাইছে যে তহচিন নে নিশান, কোনে প্ৰথমে বিশ্বকাপৰ মূল খেলপথাৰত ভৰি দি ইতিহাসৰ স্বৰ্ণিল পৃষ্ঠাত নাম লিপিৱদ্ধ কৰিব ? তাৰ বাবে এতিয়া সমগ্ৰ ক্ৰীড়া বিশ্বই অপেক্ষা কৰিব লাগিব ।
লগতে পঢ়ক : “বিশ্ব অভিযান”ৰ বাবে সাজু ক্ৰিষ্টিয়ানো ৰোনাল্ডো; ষষ্ঠবাৰৰ বাবে খেলিব বিশ্বকাপ
