সিন্ধু জল চুক্তিক লৈ ভীৰু পাকিস্তানৰ ভাবুকি, ভাৰতৰ হাত কটাৰো হুংকাৰ
এইবাৰ পাকিস্তানৰ আন এজন জ্যেষ্ঠ মন্ত্ৰীয়ে ভাৰতক উদ্দেশ্যি অতি আপত্তিজনক আৰু আক্ৰমণাত্মক মন্তব্য কৰিছে
পাকিস্তানৰ প্ৰতিৰক্ষা মন্ত্ৰী খাজা আচিফে ভাৰতক সামৰিক আক্ৰমণৰ ভাবুকি দিয়াৰ এসপ্তাহ নৌহওঁতেই, এইবাৰ পাকিস্তানৰ আন এজন জ্যেষ্ঠ মন্ত্ৰীয়ে ভাৰতক উদ্দেশ্যি অতি আপত্তিজনক আৰু আক্ৰমণাত্মক মন্তব্য কৰিছে । সন্ত্ৰাসবাদৰ পৃষ্ঠপোষক পাকিস্তানৰ জলবায়ু পৰিৱৰ্তন মন্ত্ৰী মুচাদিক মালিকে মুকলি সংবাদমেলত ভাবুকি দি কয় যে এই চুক্তিৰ অধীনত ইছলামাবাদৰ পানীৰ অংশ কাঢ়ি ল’ব বিচৰা “সেই হাতবোৰ কাটি পেলোৱা হ’ব”।
পহলগাম আক্ৰমণৰ পিছৰে পৰা বন্ধ চুক্তি
উল্লেখ্য যে, ২০২৫ চনত জম্মু-কাশ্মীৰৰ পহলগামত এক ভয়াৱহ সন্ত্ৰাসবাদী আক্ৰমণ সংঘটিত হৈছিল, য’ত ২৬ জন নিৰীহ লোক নিহত হৈছিল । এই আক্ৰমণৰ পিছতে ভাৰত চৰকাৰে কেইবাদশক পুৰণি সিন্ধু জল চুক্তি স্থগিত ৰখাৰ এক ঐতিহাসিক সিদ্ধান্ত গ্ৰহণ কৰিছিল । ভাৰতে স্পষ্ট কৰি দিছিল যে যেতিয়ালৈকে ইছলামাবাদে নিজৰ মাটিত চলি থকা সন্ত্ৰাসবাদী আন্তঃগাঁথনি সম্পূৰ্ণৰূপে ধ্বংস নকৰে, তেতিয়ালৈকে এই পানী চুক্তি স্থগিত থাকিব । ভাৰতৰ এই কঠোৰ স্থিতিৰ পিছৰে পৰা পাকিস্তান তীব্ৰ সংকটত পৰিছে ।
“প্ৰধানমন্ত্ৰী মোদীৰ হাতত পানীৰ নল”- পাক মন্ত্ৰী
পাকিস্তানৰ সংবাদ মাধ্যম ‘ডন’ৰ প্ৰতিবেদন অনুসৰি, মন্ত্ৰী মুচাদিক মালিকে অভিযোগ কৰিছে যে ভাৰতে এতিয়া পাকিস্তানৰ পানীৰ অংশ নিয়ন্ত্ৰণ কৰিছে । তেওঁ কয়, “এখন চুবুৰীয়া দেশৰ প্ৰধানমন্ত্ৰীৰ দ্বাৰা আমাৰ পানীৰ নল নিয়ন্ত্ৰণ কৰা হৈছে । তেওঁ পাকিস্তানলৈ এটোপাল পানীও বব নিদিয়ে বুলি কৈছে ।” মালিকে লগতে কয় যে পাকিস্তানৰ ৪০-৫০% জনসংখ্যা জীৱিকাৰ বাবে কৃষিৰ ওপৰত নিৰ্ভৰশীল । গতিকে ভাৰতে কেৱল পানীয়েই বন্ধ কৰা নাই, বৰঞ্চ পাকিস্তানৰ খাদ্য সুৰক্ষা, ৫০% কৰ্মসংস্থাপন আৰু ২৫% অৰ্থনীতি নিয়ন্ত্ৰণ কৰিবলৈ চেষ্টা চলাইছে ।
“আমি কেৱল ঘোষণাই কৰা নাই, বৰঞ্চ প্ৰমাণো কৰি দেখুৱাইছোঁ যে যদি কোনোবাই আমাৰ পানীৰ অংশত হাত দিয়ে, তেন্তে আমি সেই হাত কাটি পেলাম ।”- মুচাদিক মালিক, পাক জলবায়ু পৰিৱৰ্তন মন্ত্ৰী
আন্তঃৰাষ্ট্ৰীয় মঞ্চৰ কাষ চাপিব পাকিস্তান
পাক মন্ত্ৰীগৰাকীৰ মতে, বিশ্বৰ আন বহু ঠাইত কোনো চুক্তি নোহোৱাকৈ কেৱল আন্তঃৰাষ্ট্ৰীয় নিয়মৰ আধাৰত পানী প্ৰবাহিত হয় । গতিকে চুক্তি থকাৰ পিছতো ভাৰতে কেনেকৈ পানী বন্ধ কৰিব পাৰে, সেই বিষয়টো তেওঁলোকে আন্তঃৰাষ্ট্ৰীয় ন্যায়ালয় বা গোলকীয় মঞ্চত উত্থাপন কৰিব ।
একেখন সংবাদমেলতে পাকিস্তানৰ তথ্য মন্ত্ৰী আতাউল্লাহ তাৰাৰে কয় যে এই চুক্তি আইনগতভাৱে বাধ্যতামূলক আৰু ভাৰতে ইয়াক একপক্ষীয়ভাৱে বাতিল বা সংশোধন কৰিব নোৱাৰিব । পাকিস্তানৰ প্ৰধানমন্ত্ৰী শ্বেহবাজ শ্বৰীফ আৰু সেনা প্ৰধান জেনেৰেল চয়দ আছিম মুনিৰৰ মন্তব্যৰ পুনৰুক্তি কৰি তেওঁ কয়, “পানী আমাৰ জীৱনৰেখা হোৱাৰ লগতে আমাৰ ‘ৰেড লাইন’ (চূড়ান্ত সীমা)।”
কি এই সিন্ধু জল চুক্তি?
১৯৬০ চনত বিশ্ব বেংকৰ মধ্যস্থতাত ভাৰত আৰু পাকিস্তানৰ মাজত এই ঐতিহাসিক ‘সিন্ধু জল চুক্তি’ স্বাক্ষৰিত হৈছিল । এই চুক্তি অনুসৰি সিন্ধু নদী আৰু ইয়াৰ উপনৈসমূহৰ পানী দুয়োখন দেশৰ মাজত বিতৰণ কৰা হৈছিল ।
লগতে পঢ়ক : দেশজুৰি আজানৰ ওপৰত নিষেধাজ্ঞা আৰোপৰ প্ৰস্তুতি চৰকাৰৰ!