২০৩০ চনৰ কমনৱেলথ গেমছ আয়োজনৰ বাবে দাবী উত্থাপন কৰিব ভাৰতে
বুধবাৰে ভাৰতীয় অলিম্পিক সন্থাই ২০৩০ চনৰ কমনৱেলথ গেমছ আয়োজনৰ বাবে বিশেষ সাধাৰণ সভাত দেশৰ নিবিদাত আনুষ্ঠানিকভাৱে অনুমোদন জনায় । ইতিমধ্যে ভাৰতে ২০৩০ চনৰ কমনৱেলথ গেমছৰ আয়োজক চহৰ হিচাপে আহমেদাবাদক গঢ়ি তোলাৰ উদ্দেশ্য পত্ৰ দাখিল কৰিছে । অৱশ্যে ভাৰতে ৩১ আগষ্টৰ অন্তিম তাৰিখৰ পূৰ্বে চূড়ান্ত নিবিদাৰ বাবে প্ৰস্তাৱ দাখিল কৰিব লাগিব ।
ভাৰতৰ দাবী শক্তিশালী-
কানাডা দৌৰৰ পৰা আঁতৰি অহাৰ লগে লগে ভাৰতৰ ২০৩০ চনৰ কমনৱেলথ গেমছ আয়োজনৰ সম্ভাৱনা বৃদ্ধি পাইছে । কমনৱেলথ গেমছৰ সঞ্চালক ডেৰেন হলৰ নেতৃত্বত কমনৱেলথ গেমছৰ বিষয়াৰ এটা দলে অলপতে আহমেদাবাদ ভ্ৰমণ কৰি স্থানসমূহ পৰিদৰ্শন কৰাৰ লগতে গুজৰাটৰ চৰকাৰী বিষয়াৰ সৈতে আলোচনাত মিলিত হয় ।
২০১০ চনৰ কমনৱেলথ গেমছৰ আয়োজন কৰিছিল ভাৰতে-
চলিত মাহৰ শেষৰ ফালে কমনৱেলথ গেমছৰ এটা প্ৰতিনিধি দল আহমেদাবাদত উপস্থিত হোৱাৰ সম্ভাৱনা আছে । নৱেম্বৰৰ শেষ সপ্তাহত গ্লাছগোত আয়োজক দেশৰ বিষয়ে সিদ্ধান্ত গ্ৰহণ কৰিব কমনৱেলথ গেমছ জেনেৰেল এছেম্বলিয়ে । ইয়াৰ পূৰ্বে ভাৰতে ২০১০ চনত দিল্লীত কমনৱেলথ গেমছ আয়োজন কৰিছিল ।
লগতে পঢ়ক : আই চি চিৰ জুলাই মাহৰ শ্ৰেষ্ঠ পুৰুষ খেলুৱৈ শুভমন গীল… ইংলেণ্ড ভ্ৰমণৰ সময়ত আগবঢ়াইছিল শক্তিশালী প্ৰদৰ্শন
