২৩ জুলাইৰ পৰা গ্লাছগোত আৰম্ভ হ’বলগীয়া কমনৱেলথ গেমছৰ বাবে ক্ৰীড়া মন্ত্ৰালয়ে ১৯১ জনীয়া ভাৰতীয় দলটোক মঞ্জুৰী দিছে।

খেল মন্ত্ৰালয়ে অহা ২৩ জুলাইৰ পৰা গ্লাছগোত অনুষ্ঠিত হ’বলগীয়া কমনৱেলথ গেমছৰ বাবে ১৯১ জনীয়া এটা ভাৰতীয় দলক মঞ্জুৰী দিছে। এই দলটোত মুঠ ১২৬ গৰাকী খেলুৱৈ আৰু ৫১ গৰাকী সহযোগী কৰ্মচাৰী অন্তৰ্ভুক্ত আছে। খেলুৱৈসকলৰ কথা ক’বলৈ গ’লে, এই কমনৱেলথ গেমছত অংশগ্ৰহণ কৰিবলগীয়া ভাৰতীয় দলটোত ৭৮ গৰাকী পুৰুষ খেলুৱৈ আৰু ৪৮ গৰাকী মহিলা খেলুৱৈৰ নাম আছে। ক্ৰীড়া মন্ত্ৰালয়ে স্পষ্ট কৰি দিছে যে ভাৰতীয় অলিম্পিক সংন্থা (IOA) বা কোনো ক্ৰীড়া ফেডাৰেচনৰ নিৰ্বাচিত বিষয়াসকলৰ বিদেশ ভ্ৰমণ আৰু থকা-মেলাৰ খৰচ চৰকাৰে বহন নকৰে। ভাৰতীয় দলটোৰ মুৰব্বী ৰোহিত ৰাজপাল IOA কমিটিৰ এজন সদস্যও হয়, গতিকে যদি এই নিয়ম তেওঁৰ ওপৰত প্ৰযোজ্য হয়, তেন্তে তেওঁ নিজৰ খৰচ নিজেই বহন কৰিব লাগিব। সহযোগী কৰ্মচাৰীৰ শ্ৰেণীত কেৱল প্ৰশিক্ষক (কোচ), চিকিৎসা দল আৰু সহায়ক কৰ্মচাৰীকহে ৰখা হৈছে।

গ্লাছগোলৈ যাবলগীয়া ভাৰতীয় দলটোৰ ভিতৰত আটাইতকৈ ডাঙৰ দলটো হৈছে এথলেটিক্সৰ, য’ত তাৰকা খেলুৱৈ নীৰজ চোপ্ৰাকে ধৰি ৩২ গৰাকী খেলুৱৈ অন্তৰ্ভুক্ত আছে। এই দলটোত ১০ গৰাকী মহিলা খেলুৱৈ আছে আৰু মুখ্য প্ৰশিক্ষক ৰাধাকৃষ্ণন নায়াৰৰ সৈতে আটাইতকৈ বেছি সহযোগী কৰ্মচাৰীও গৈ আছে। বক্সিঙত পদক জয়ৰ বাবে ১৪ গৰাকী বক্সাৰ গৈ আছে, যাৰ প্ৰশিক্ষক হ’ব চুইডেনৰ চেণ্টিয়াগো নীভা। ইয়াৰ উপৰিও মীৰাবাঈ চানুৰ অধিনায়কত্বত ১২ গৰাকী ভাৰোত্তোলক (ৱেইটলিফ্টাৰ)আৰু ৫ জন সাঁতোৰবিদো যাব, যাৰ তদাৰক কৰিব নিহাৰ আমিন আৰু সন্দীপ চেজৱালে। লগতে, পেৰা-খেলুৱৈসকলক সহায় কৰিবলৈ ৪২ জনীয়া এটা কৰ্মচাৰীৰ দলও গৈ আছে, য’ত আটাইতকৈ বেছি লোক এথলেটিক্সৰ পৰা আছে।

বাজেটৰ অভাৱৰ বাবে এইবাৰ গ্লাছগো কমনৱেলথ গেমছ অতি কম পৰিসৰত অনুষ্ঠিত কৰা হৈছে। ইয়াত কেৱল ১০ টা সাধাৰণ শ্ৰেণীৰ খেল আৰু ৬ টা পেৰা ক্ৰীড়াহে অন্তৰ্ভুক্ত কৰা হৈছে। ভাৰতৰ বাবে আটাইতকৈ ডাঙৰ চিন্তাৰ বিষয়টো হ’ল যে যিবোৰ খেলত দেশে সদায় আটাইতকৈ বেছি পদক জিকিছিল— যেনে শ্বুটিঙ, হকী, বেডমিণ্টন, মল্লযুঁজ আৰু ক্ৰিকেট, সেইবোৰক এইবাৰ বাদ দিয়া হৈছে। এই কাৰণেই এইবাৰ ভাৰতৰ মুঠ পদকৰ সংখ্যা হ্ৰাস পোৱাৰ আশংকা কৰা হৈছে। ভাৰতে এইবাৰ ৯ টা সাধাৰণ শ্ৰেণীৰ খেল আৰু ৫ টা পেৰা ক্ৰীড়াত অংশগ্ৰহণ কৰিব।

লগতে পঢ়ক: অনবদ্য ফুটবল যাত্ৰাত আন এক সোনালী অধ্যায় সংযোগ কিলিয়ান এমবাপেৰ