ইজৰাইলে শৰণাৰ্থী শিবিৰত সংঘটিত কৰিলে ভয়ংকৰ কাণ্ড, ৬৯ জনৰ মৃত্যু !

গাজাৰ বিৰুদ্ধে যুদ্ধত আনুষ্ঠানিকভাৱে মৃত্যু হোৱা পেলেষ্টাইনীসকলৰ সংখ্যা ৪৫ হাজাৰৰ কাষ চাপিছে, ইজৰাইলে গাজাৰ উত্তৰ পাৰত জনসংখ্যাহীন কৰি বাফাৰ জ’ন সৃষ্টি কৰাত গণহত্যা আৰু জাতিগত শুদ্ধিকৰণৰ অভিযোগ উত্থাপন কৰিছে। গাজাত ইজৰাইলৰ বিধ্বংসী অব্যাহত আছে। যোৱা ২৪ ঘন্টাত আইডিএফে ৰাফাহকে ধৰি গাজাৰ বহু অঞ্চলৰ শৰণাৰ্থী শিবিৰত ব্যাপক আক্ৰমণ চলাইছে। য’ত কমেও ৬৯ জন লোকৰ মৃত্যু হৈছে। আনহাতে শ শ লোক আহত হৈছে। যাৰ ভিতৰত এজন সাংবাদিক আৰু উদ্ধাৰ কৰ্মীও আছে। হামাছৰ স্বাস্থ্য মন্ত্ৰালয়ে এই তথ্য প্ৰদান কৰিছে। দেওবাৰে দক্ষিণ গাজাৰ খান ইউনিছত ৰাষ্ট্ৰসংঘৰ দ্বাৰা পৰিচালিত বিদ্যালয় এখনত আক্ৰমণ চলাই মহিলা আৰু শিশুসহ কমেও ২০ জন স্থানচ্যুত পেলেষ্টাইনী নিহত হয়। ইয়াৰ পূৰ্বে মধ্য গাজাৰ নুছৰেট বজাৰ অঞ্চলৰ এটা অসামৰিক জৰুৰীকালীন কেন্দ্ৰত বিমান আক্ৰমণত ভিডিঅ’ সাংবাদিক আহমেদ আল ল’য়া আৰু আন পাঁচজন লোকৰ মৃত্যু হৈছিল।