পশ্চিম এছিয়াৰ ভয়ংকৰ সামৰিক উত্তেজনা : সংঘাত হ্ৰাস আৰু কূটনৈতিক সমাধানৰ বাবে ভাৰতৰ জৰুৰী আহ্বান
পশ্চিম এছিয়া অঞ্চলত শেহতীয়াকৈ তীব্ৰতৰ হৈ পৰা সামৰিক উত্তেজনাক লৈ ভাৰতে গভীৰ উদ্বেগ প্ৰকাশ কৰিছে
পশ্চিম এছিয়া আৰু উপসাগৰীয় অঞ্চলত শেহতীয়াকৈ তীব্ৰতৰ হৈ পৰা সামৰিক উত্তেজনাক লৈ ভাৰতে গভীৰ উদ্বেগ প্ৰকাশ কৰিছে । আজি সোমবাৰে নতুন দিল্লীয়ে সংঘাতৰ তাৎক্ষণিক উপশমৰ বাবে আটাইকেইটা পক্ষকে জৰুৰীভাৱে আহ্বান জনাইছে । ভাৰত চৰকাৰে অঞ্চলটোত দীৰ্ঘম্যাদী শান্তি তথা স্থিৰতা ঘূৰাই আনিবলৈ সামৰিক শক্তি প্ৰয়োগৰ পৰিৱেৰ্তে এক কূটনৈতিক সমাধানৰ ওপৰত বিশেষ গুৰুত্ব আৰোপ কৰিছে ।
সংঘাতৰ ১০০ দিন অতিক্ৰম :
ভাৰতৰ বৈদেশিক পৰিক্ৰমা মন্ত্ৰালয়ে জাৰি কৰা এক বিবৃতিত উল্লেখ কৰা হৈছে যে এই সংঘাত ইতিমধ্যে ১০০ দিনতকৈও অধিক সময় ধৰি চলি আছে । ইয়াৰ ফলত সৃষ্টি হোৱা অপৰিসীম মানৱীয় দুখ-কষ্টক লৈ ভাৰতে গভীৰ উদ্বেগ প্ৰকাশ কৰিছে । মন্ত্ৰালয়ে সতৰ্ক কৰি দি কয় যে এই যুদ্ধই কেৱল সংশ্লিষ্ট অঞ্চলটোৱেই নহয়, বৰঞ্চ সমগ্ৰ গোলকীয় অৰ্থনীতি আৰু শক্তি যোগান ব্যৱস্থাৰ ওপৰতো এক মোক্ষম আঘাত হানিছে ।
বৈদেশিক মন্ত্ৰালয়ৰ বিবৃতিত স্পষ্টকৈ কোৱা হৈছে- “আমি সকলো পক্ষকে তাৎক্ষণিকভাবে উত্তেজনা হ্ৰাস কৰিবলৈ, সাধাৰণ নাগৰিকৰ যাতে কোনো ক্ষতি নহয় সেয়া নিশ্চিত কৰিবলৈ আৰু চলি থকা কূটনৈতিক আলোচনা সফলতাৰে সমাপ্ত কৰিবলৈ আহ্বান জনাইছোঁ, যাতে অঞ্চলটোলৈ শান্তি আৰু স্থিৰতা ঘূৰি আহিব পাৰে ।”
২৪ ঘণ্টাত অভূতপূৰ্ব আক্ৰমণ-প্ৰত্যাক্ৰমণ
বিগত ২৪ ঘণ্টাত সমগ্ৰ পশ্চিম এছিয়াত এক ভয়াবহ সামৰিক পৰিস্থিতিয়ে গা কৰি উঠিছে । অঞ্চলটোৰ বহুকেইখন চহৰত সক্ৰিয় সামৰিক সংঘাত, কৌশলগত প্ৰতিষ্ঠানসমূহৰ ওপৰত তীব্ৰ বিমান আক্ৰমণ আৰু ধাৰাবাহিকভাৱে ক্ষেপণাস্ত্ৰ নিক্ষেপ কৰা দেখা গৈছে । যুদ্ধৰ ১০০ তম দিনা ইজৰাইল আৰু ইৰানে পোনপটীয়াভাৱে ইখনে সিখনৰ ওপৰত গুলীচালনা কৰে, যাৰ ফলত পূৰ্বৰ ঠুনুকা যুদ্ধবিৰতি সম্পূৰ্ণৰূপে বিপন্ন হৈ পৰিছে । এই ঘটনাই এতিয়া এক সৰ্বাত্মক আঞ্চলিক যুদ্ধৰ ৰূপ লোৱাৰ উপক্ৰম হৈছে ।
লগতে পঢ়ক : ট্ৰাম্পৰ নিৰ্দেশ ওফৰাই ইজৰাইলৰ ওপৰত পুনৰ ভয়ংকৰ আক্ৰমণ ইৰাণৰ