পশ্চিমবংগৰ মুৰ্ছিদাবাদত ৱাকফ আইনক লৈ হিংসাত্মক ঘটনা সংঘটিত হৈছে আৰু বিষয়টো ইতিমধ্যে আদালতত পাইছে গৈ।
এই হিংসাত্মক প্ৰতিবাদৰ সময়ত ৩ জন লোকৰ মৃত্যু হোৱাৰ লগতে আৰক্ষীয়ে ১২ জনক গ্ৰেপ্তাৰ কৰিছে। তাৰ মাজতে বাহাৰমপুৰ আসনৰ পৰা জয়ী হোৱা তৃণমূল কংগ্ৰেছৰ সাংসদ তথা প্ৰাক্তন ক্ৰিকেটাৰ ইউছুফ পাঠান সমালোচনাৰ সন্মুখীন হৈছে।
আচলতে তেওঁ মুৰ্ছিদাবাদৰ হিংসাত্মক পৰিস্থিতিৰ মাজতে ছ’চিয়েল মিডিয়াত তেওঁ কেইখনমান ছবি শ্বেয়াৰ কৰিছিল, য’ত তেওঁক আৰামত চাহ খাই থকা দেখা গৈছে।
জনতাই তেওঁৰ সেই পোষ্টটো লাইক কৰাৰ সলনি তেওঁক ট্ৰ’ল হে কৰিছে। ইউছুফ পাথানে দুদিন পূৰ্বে ইনষ্টাগ্ৰামত তিনিখন ছবি শ্বেয়াৰ কৰিছিল।
ফটোৰ লগতে কেপচনত লিখা আছিল, “এটা আৰামদায়ক দুপৰীয়া, একাপ সুন্দৰ চাহ আৰু শান্তিপূৰ্ণ পৰিৱেশ।মাত্ৰ মুহূৰ্তটো উপভোগ কৰি আছো।”
তাৰ পিছতেই পোষ্টটো ভাইৰেল হৈ পৰিছিল।মানুহে পোষ্টটোৰ পিছতেই সাংসদ গৰাকীক ট্ৰ’ল কৰা আৰম্ভ কৰিছে। অৱশ্যে হিংসাত্মক পৰিস্থিতিৰ অধিকাংশ অঞ্চল পাঠানৰ সমষ্টিৰ অংশ নহয়।কিন্তু বংগ জ্বলি থকাৰ সময়ত তেওঁ সামাজিক মাধ্যমত দিয়া পোষ্টটোক লৈ মানুহৰ মাজত ক্ষোভৰ সৃষ্টি কৰিছে।
বিজেপিৰ ৰাষ্ট্ৰীয় মুখপাত্ৰ শ্বেহজাদ পুনাৱালাই ইনষ্টাগ্ৰামত এটা পোষ্ট যোগে কয়, ‘বংগ জ্বলি আছে।উচ্চ ন্যায়ালয়ে চকু মুদি ৰাখিব নোৱাৰাৰ কথা উল্লেখ কৰি কেন্দ্ৰীয় বাহিনী মোতায়েন কৰিছে”।
‘মমতা বেনাৰ্জীয়ে ৰাষ্ট্ৰসংৰক্ষিত হিংসাৰ প্ৰচাৰত উদগনি জনাইছে , আনহাতে আৰক্ষী নিমাত হৈ আছে। ইয়াৰ মাজতে সাংসদ ইউছুফ পাথানে তৃপ্তিৰে চাহত চুমুক দিছে। এয়াই টিএমচি”।
এই সমালোচনাৰ সন্দৰ্ভত অৱশ্যে এতিয়াও কোনো প্ৰতিক্ৰিয়া প্ৰকাশ কৰা নাই ইউছুফ পাথানে।
