অসমৰ পঞ্চায়ত নিৰ্বাচনত ৰাষ্ট্ৰীয় গণতান্ত্ৰিক মিত্ৰজোঁটৰ “ঐতিহাসিক বিজয়”ৰ বাবে প্ৰধানমন্ত্ৰী নৰেন্দ্ৰ মোদীয়ে অসমবাসীক ধন্যবাদ জনাইছে । লগতে প্ৰধানমন্ত্ৰী মোদীয়ে অসমৰ মুখ্যমন্ত্ৰী হিমন্ত বিশ্ব শৰ্মাৰ এক্স পোষ্ট পুনৰ পোষ্ট কৰি কয় যে অসমৰ প্ৰগতিৰ প্ৰসাৰৰ বাবে আমাৰ প্ৰচেষ্টা সম্পূৰ্ণ জোৰদাৰে অব্যাহত থাকিব । তদুপৰি কেন্দ্ৰীয় গৃহমন্ত্ৰী অমিত শ্বাহে কয় যে প্ৰধানমন্ত্ৰী মোদীৰ জনকেন্দ্ৰিক নীতিয়ে লাভ কৰা সমৰ্থনৰ এইটো নিশ্চিতি ।
প্ৰধানমন্ত্ৰী মোদীয়ে এক্স পোষ্টযোগে কয়, “এন ডি এৰ উন্নয়নমূলক কাৰ্যসূচীৰ প্ৰতি স্পষ্ট সমৰ্থন আগবঢ়োৱাৰ বাবে অসমৰ ৰাইজক ধন্যবাদ । অসমৰ প্ৰগতিৰ প্ৰসাৰৰ বাবে আমাৰ প্ৰচেষ্টা সম্পূৰ্ণ জোৰদাৰে অব্যাহত থাকিব । জনসাধাৰণৰ মাজত কাম কৰা আৰু ফলপ্ৰসূভাৱে আমাৰ উন্নয়নৰ কাৰ্যসূচী ৰাইজৰ মাজলৈ প্ৰেৰণ কৰা এন ডি এৰ সকলো কৰ্মকৰ্তাক মই শলাগ লৈছো ।”
জিলা পৰিষদৰ ৩৯৭ খন আসনৰ ভিতৰত ৩০০ খনত জয়ী-
অসমৰ মুখ্যমন্ত্ৰী হিমন্ত বিশ্ব শৰ্মাই এটা পোষ্টত কয় যে ‘জিলা পৰিষদ’ নিৰ্বাচনত এন ডি এয়ে ৭৬.২২ শতাংশ ভোটৰে ৩৯৭খন আসনৰ ভিতৰত ৩০০খন আসন লাভ কৰাৰ বিপৰীতে ‘আঞ্চলিক পঞ্চায়ত’ নিৰ্বাচনত শাসকীয় মিত্ৰজোঁটে ২১৯২খন আসনৰ ভিতৰত ৬৬ শতাংশ ভোট লাভ কৰি ১৪৩৬খন আসন লাভ কৰে ।
একে সময়তে কেন্দ্ৰীয় গৃহমন্ত্ৰী অমিত শ্বাহে এক্সৰ এটা পোষ্টত কয়, “২০২৫ চনৰ পঞ্চায়ত নিৰ্বাচনত এন ডি এক ঐতিহাসিক জয় দিয়াৰ বাবে অসমৰ ৰাইজক ধন্যবাদ । এই জয় প্ৰধানমন্ত্ৰী নৰেন্দ্ৰ মোদীৰ জনকেন্দ্ৰিক নীতিৰ সমৰ্থন, যিয়ে অসমত শান্তি আৰু সমৃদ্ধিৰ নতুন যুগ কঢ়িয়াই আনিছে ।”
আমি মিলি এখন উন্নত অসম গঢ়িমঃ শ্বাহ
অসমৰ মুখ্যমন্ত্ৰী হিমন্ত বিশ্ব শৰ্মা, বিজেপিৰ ৰাজ্যিক সভাপতি দিলীপ শইকীয়া আৰু দলীয় কৰ্মী সকলক প্ৰধানমন্ত্ৰী মোদীৰ উন্নয়নৰ বাৰ্তা প্ৰতি ঘৰলৈ লৈ যোৱাৰ বাবে নিষ্ঠাৰে প্ৰচেষ্টা চলোৱাৰ বাবে কেন্দ্ৰীয় গৃহমন্ত্ৰী অমিত শ্বাহে অভিনন্দন জ্ঞাপন কৰে । শ্বাহে কয়, “আমি একেলগে সকলোৰে বাবে এখন উন্নত অসম গঢ়িম ।”
