কলকাতাৰ ছল্টলেকস্থিত প্ৰদেশ বিজেপি কাৰ্যালয়ত বংগ বিজেপিৰ সভাপতি শমিক ভট্টাচাৰ্যৰ উপস্থিতিত তিনিওগৰাকী নেতাই আনুষ্ঠানিকভাৱে গেৰুৱা বসন পিন্ধে

পশ্চিমবংগত বিজেপিৰ চৰকাৰ গঠন হোৱাৰ পিছৰে পৰা ৰাজ্যখনৰ ৰাজনৈতিক সমীকৰণ অতি দ্ৰুতগতিত সলনি হ’বলৈ ধৰিছে । শেহতীয়াকৈ মমতা বেনাৰ্জীৰ তৃণমূল কংগ্ৰেছ দলত এক ডাঙৰ খহনীয়া সৃষ্টি কৰি দলটোৰ তিনিগৰাকী প্ৰাক্তন ৰাজ্যসভাৰ সাংসদে বৃহস্পতিবাৰে ভাৰতীয় জনতা পাৰ্টীত যোগদান কৰে । বিজেপিত যোগদান কৰা এই জ্যেষ্ঠ নেতা তিনিগৰাকী হ’ল- সুখেন্দু শেখৰ ৰায়, সুস্মিতা দেৱ আৰু প্ৰকাশ চিক বৰাইক ।

বৃহস্পতিবাৰে কলকাতাৰ ছল্টলেকস্থিত প্ৰদেশ বিজেপি কাৰ্যালয়ত বংগ বিজেপিৰ সভাপতি শমিক ভট্টাচাৰ্যৰ উপস্থিতিত তিনিওগৰাকী নেতাই আনুষ্ঠানিকভাৱে গেৰুৱা বসন পিন্ধে । উল্লেখযোগ্য যে বংগ বিধানসভা নিৰ্বাচনত তৃণমূল কংগ্ৰেছৰ শোচনীয় পৰাজয় আৰু দলৰ ভিতৰত সৃষ্টি হোৱা তীব্ৰ বিদ্ৰোহৰ মাজতে যোৱা মাহত এই তিনিওগৰাকী নেতাই ৰাজ্যসভাৰ সদস্যপদ আৰু তৃণমূল কংগ্ৰেছ দল- দুয়োটাৰে পৰা পদত্যাগ কৰিছিল ।

বিজেপিয়ে প্ৰক্ষেপ কৰিলে ৰাজ্যসভা উপ-নিৰ্বাচনৰ প্ৰাৰ্থী

বিজেপিত যোগদান কৰাৰ মাত্ৰ কেইঘণ্টামান পিছতে দলটোৱে তিনিওগৰাকী নেতাকে এক ডাঙৰ পুৰস্কাৰ প্ৰদান কৰে । বৃহস্পতিবাৰে পলমকৈ সন্ধিয়া বিজেপিয়ে বংগত খালী হোৱা ৰাজ্যসভাৰ তিনিখন আসনৰ বাবে হ’বলগীয়া উপ-নিৰ্বাচনত এই তিনিওজনকে নিজৰ প্ৰাৰ্থী হিচাপে ঘোষণা কৰে । এই তিনিখন আসনৰ বাবে অহা ২৪ জুলাইত উপ-নিৰ্বাচন অনুষ্ঠিত হ’ব আৰু ইয়াৰ বাবে ১৪ জুলাইলৈকে মনোনয়ন দাখিল কৰিব পৰা যাব ।

নিৰ্বাচন আয়োগে উপ-নিৰ্বাচনৰ অধিসূচনা জাৰি কৰাৰ মাত্ৰ দুদিন পিছতে এই ৰাজনৈতিক ঘটনা সংঘটিত হৈছে । বংগ বিধানসভাত বৰ্তমান বিজেপিৰ যি শক্তি বা বিধায়কৰ সংখ্যা আছে, সেই অনুসৰি তিনিওগৰাকী প্ৰাৰ্থীৰে জয় একপ্ৰকাৰ নিশ্চিত বুলি ধৰা হৈছে ।

সংখ্যাত বংগ বিধানসভা আৰু ৰাজ্যসভাৰ অংক:

বংগত মুঠ বিজেপি বিধায়কৰ সংখ্যা: ২০৮ গৰাকী

ৰাজ্যসভাৰ এখন আসনৰ বাবে প্ৰয়োজনীয় ভোট: ৬৯ ৰ পৰা ৭০ টা

বিজয়ৰ পিছত ৰাজ্যসভাত বিজেপিৰ স্থিতি: এই তিনিখন আসনত জয়লাভ কৰাৰ পিছত বংগৰ পৰা ৰাজ্যসভাত বিজেপি সাংসদৰ সংখ্যা ৫ গৰাকীলৈ বৃদ্ধি পাব । বৰ্তমান ৰাজ্যসভাত বংগৰ পৰা বিজেপিৰ দুগৰাকী সদস্য আছে- শমিক ভট্টাচাৰ্য আৰু ৰাহুল সিনহা ।

তৃণমূলত তীব্ৰ ভাঙোন: এনচিপিআই লৈ গ’ল ২০ সাংসদ

বংগত মমতা বেনাৰ্জীৰ শিবিৰত কেৱল বিধায়ক বা ৰাজ্যসভাৰ সাংসদৰে খহনীয়া হোৱা নাই, বৰঞ্চ লোকসভাতো ইয়াৰ ডাঙৰ প্ৰভাৱ পৰিছে । ইয়াৰ পূৰ্বে তৃণমূলৰ ২৮ গৰাকী লোকসভা সাংসদৰ ভিতৰত ২০ গৰাকীয়ে ইতিমধ্যে কাকলি ঘোষ দস্তিদাৰৰ নেতৃত্বত ‘নেচনেলিষ্ট চিটিজেনছ পাৰ্টী অৱ ইণ্ডিয়া’ত যোগদান কৰি এনডিএ-ৰ মিত্ৰদল হিচাপে চামিল হৈছে । আনহাতে, বিদ্ৰোহী গোটৰ নেতা ঋতব্ৰত বেনাৰ্জীৰ নেতৃত্বত তৃণমূলৰ ৮০ গৰাকী বিধায়কৰ ভিতৰত ৬০ গৰাকীতকৈও অধিক বিধায়কে এটা সুকীয়া গোট গঠন কৰি মমতা বেনাৰ্জীৰ সংগ ত্যাগ কৰিছে ।

লগতে পঢ়ক : মমতা বেনাৰ্জীক মোক্ষম আঘাত; বিজেপিত যোগদান সুস্মিতা দেৱৰ

বৃহস্পতিবাৰে চাৰিখন গুৰুত্বপূৰ্ণ ৰাজ্যৰ প্ৰদেশ সভাপতি সলনি কৰাৰ কথা ঘোষণা কৰিছে বিজেপিয়ে

ভাৰতীয় জনতা পাৰ্টিয়ে সাংগঠনিক ভেটি শক্তিশালী কৰাৰ লক্ষ্যৰে বৃহস্পতিবাৰে চাৰিখন গুৰুত্বপূৰ্ণ ৰাজ্যৰ প্ৰদেশ সভাপতি সলনি কৰাৰ কথা ঘোষণা কৰিছে । দলৰ ৰাষ্ট্ৰীয় সাধাৰণ সম্পাদকে প্ৰকাশ কৰা অনুসৰি, ৰাষ্ট্ৰীয় সভাপতি নিতিন নবীনে এই নতুন নিযুক্তিৰ তালিকাখন অনুমোদন জনাইছে ।

দিল্লীত নতুন দায়িত্বত কেন্দ্ৰীয় মন্ত্ৰী হৰ্ষ মালহোত্ৰা দিল্লী বিজেপিৰ সভাপতি হিচাপে দায়িত্বভাৰ গ্ৰহণ কৰিছে কেন্দ্ৰীয় মন্ত্ৰী হৰ্ষ মালহোত্ৰাই । তেওঁ বিদায়ী সভাপতি বীৰেন্দ্ৰ সচদেৱাৰ ঠাই লৈছে । বিজেপিৰ এগৰাকী জ্যেষ্ঠ নেতা তথা দিল্লীৰ সাংসদ মালহোত্ৰা কেন্দ্ৰীয় চৰকাৰৰ মন্ত্ৰী হিচাপে কাৰ্যনিৰ্বাহ কৰি আছে । সাংগঠনিক ৰাজনীতিত দীৰ্ঘদিন ধৰি সক্ৰিয় মালহোত্ৰাৰ জনসম্পৰ্ক আৰু সাংগঠনিক দক্ষতাৰ ওপৰত আস্থা ৰাখি দলৰ শীৰ্ষ নেতৃত্বই তেওঁক এই গুৰু দায়িত্ব প্ৰদান কৰিছে ।

অন্যান্য ৰাজ্যত নতুন নেতৃত্ব :

হাৰিয়ানা : ড° অৰ্চনা গুপ্তাক হাৰিয়ানাৰ প্ৰদেশ সভাপতিৰ দায়িত্ব অৰ্পণ কৰা হৈছে । এগৰাকী সক্ৰিয় নেত্ৰী হিচাপে তেওঁ মহিলা নেতৃত্বক শক্তিশালী কৰাত বিশেষ অৰিহণা যোগাই আহিছে । তেওঁৰ পৰা সংগঠনৰ সম্প্ৰসাৰণ আৰু কৰ্মীসকলক একত্ৰিত কৰাৰ আশা কৰা হৈছে ।

পঞ্জাব : পঞ্জাবৰ নতুন প্ৰদেশ সভাপতিৰ দায়িত্ব দিয়া হৈছে উদ্যোগপতি কেৱল সিং ধিলোনক । বাৰ্নালাৰ পৰা দুবাৰকৈ বিধায়ক হিচাপে নিৰ্বাচিত হোৱা ধিলোনক পঞ্জাবৰ ৰাইজে ‘বিকাশ পুৰুষ’ হিচাপে গণ্য কৰে । তেওঁৰ পৰিচ্ছন্ন ৰাজনৈতিক প্ৰতিচ্ছবিয়ে পঞ্জাবত দলক গতি প্ৰদান কৰিব বুলি ধাৰণা কৰা হৈছে ।

ত্ৰিপুৰা : ত্ৰিপুৰা বিজেপিৰ নতুন প্ৰদেশ সভাপতি হিচাপে নিযুক্তি পাইছে অভিষেক দেৱৰয়ে । দীৰ্ঘদিন ধৰি সংগঠনত কাম কৰি অহা দেৱৰয়ক ৰাজ্যখনত দলৰ জনপ্ৰিয়তা বৃদ্ধি আৰু সাংগঠনিক ভেটি মজবুত কৰাৰ লক্ষ্যৰে এই দায়িত্ব দিয়া হৈছে ।

দলৰ এই নতুন নিযুক্তিৰ পাছতেই ৰাজনৈতিক মহলত চৰ্চা আৰম্ভ হৈছে যে আগন্তুক দিনবোৰত এই চাৰিওখন ৰাজ্যত বিজেপিৰ সাংগঠনিক গাঁথনি অধিক শক্তিশালী কৰিবলৈ দলটোৱে নতুন কৌশল গ্ৰহণ কৰিব ।

লগতে পঢ়ক : কৰ্ণাটকত ক্ষমতা সলনিৰ স্পষ্ট সংকেত! সিদ্ধাৰামাইয়াৰ ভৰি চুই আশীৰ্বাদ ল’লে ডি কে শিৱকুমাৰে

বিজেপি নেতাজনে অসম চৰকাৰক উষ্ম অভিনন্দন জ্ঞাপন কৰে । তেওঁ উল্লেখ কৰে যে বিজেপি দলৰ মূল আদৰ্শ আৰু নীতি সদায় “সৰ্বাত্মক ন্যায় আৰু কাৰো তোষণ নকৰা” নীতিৰ ওপৰত প্ৰতিষ্ঠিত ।

অসমৰ সংসদীয় ইতিহাসত এক গুৰুত্বপূৰ্ণ অধ্যায়ৰ সূচনা কৰি বুধবাৰে (২৭ মে’) অসম বিধানসভাত বহু প্ৰত্যাশিত অভিন্ন দেৱানী বিধি (UCC) বিধেয়কখন গৃহীত কৰা হয় । ৰাজ্য চৰকাৰৰ এই পদক্ষেপক এক “ঐতিহাসিক” সিদ্ধান্ত বুলি অভিহিত কৰিছে ভাৰতীয় জনতা পাৰ্টীৰ ৰাষ্ট্ৰীয় অধ্যক্ষ নীতিন নবীনে । তেওঁ কয় যে এই ঐতিহাসিক পদক্ষেপে সমগ্ৰ দেশতে সমান অধিকাৰ সুনিশ্চিত কৰাৰ লগতে এক অভিন্ন দেৱানী ব্যৱস্থা গঢ়ি তোলাৰ ক্ষেত্ৰত এক মাইলৰ খুঁটি হিচাপে প্ৰমাণিত হ’ব ।

সামাজিক মাধ্যম ‘X’ -ত কৰা এটা পোষ্টৰ জৰিয়তে বিজেপি নেতাজনে অসম চৰকাৰক উষ্ম অভিনন্দন জ্ঞাপন কৰে । তেওঁ উল্লেখ কৰে যে বিজেপি দলৰ মূল আদৰ্শ আৰু নীতি সদায় “সৰ্বাত্মক ন্যায় আৰু কাৰো তোষণ নকৰা” নীতিৰ ওপৰত প্ৰতিষ্ঠিত । নবীনে কয়, “অসম বিধানসভাত অভিন্ন দেৱানী বিধি বিধেয়ক গৃহীত হোৱাটো সমগ্ৰ দেশতে সমান অধিকাৰ আৰু এক উমৈহতীয়া দেৱানী ব্যৱস্থাৰ দিশত এক অত্যন্ত গুৰুত্বপূৰ্ণ তথা প্ৰশংসনীয় পদক্ষেপ ।”

দেশৰ তৃতীয়খন ৰাজ্য হিচাপে অসমৰ অভিলেখ-

এই আইনখন পাছ হোৱাৰ লগে লগে অসমে দেশৰ ভিতৰতে এক বিশেষ স্থান লাভ কৰিবলৈ সক্ষম হৈছে । দেৱভূমি উত্তৰাখণ্ড আৰু গুজৰাটৰ পিছত অভিন্ন দেৱানী বিধি আইনখন পাছ কৰা অসম সমগ্ৰ দেশৰ ভিতৰতে তৃতীয়খন ৰাজ্য হিচাপে পৰিগণিত হৈছে ।

“দেৱভূমি উত্তৰাখণ্ড আৰু গুজৰাটৰ খোজ অনুসৰণ কৰি অসমেও অভিন্ন দেৱানী বিধি ৰূপায়ণ কৰিছে, যাৰ জৰিয়তে সামাজিক সম্প্ৰীতি আৰু সকলো নাগৰিকৰ বাবে সমান ন্যায় নিশ্চিত কৰাৰ প্ৰতি থকা দায়বদ্ধতা চৰকাৰে শক্তিশালীভাৱে প্ৰদৰ্শন কৰিছে ।” — নীতিন নবীন

মোদী আৰু শৰ্মাৰ নেতৃত্বক প্ৰশংসা-

বিজেপি নেতা নবীনে এই যুগান্তকাৰী পদক্ষেপৰ সম্পূৰ্ণ কৃতিত্ব প্ৰধানমন্ত্ৰী নৰেন্দ্ৰ মোদী আৰু অসমৰ মুখ্যমন্ত্ৰী ড° হিমন্ত বিশ্ব শৰ্মাৰ সবল নেতৃত্বক প্ৰদান কৰে । তেওঁ দৃঢ়তাৰে প্ৰকাশ কৰে যে অসম চৰকাৰৰ এই সাহসী আৰু দূৰদৰ্শী সিদ্ধান্তই দেশৰ অখণ্ডতা ৰক্ষা কৰাৰ লগতে কেন্দ্ৰীয় চৰকাৰৰ সপোন “এক ভাৰত, শ্ৰেষ্ঠ ভাৰত”ৰ মৰ্মবাণীক ভৱিষ্যতে অধিক শক্তিশালী আৰু সাকাৰ কৰি তুলিব ।

লগতে পঢ়ক : ঐতিহাসিক সিদ্ধান্ত; বিধানসভাত গৃহীত হ’ল UCC

পশ্চিমবংগত এক ঐতিহাসিক পৰিৱৰ্তনৰ সূচনা কৰি ভাৰতীয় জনতা পাৰ্টিয়ে চৰকাৰ গঠন কৰিবলৈ সাজু হৈছে

পশ্চিমবংগত এক ঐতিহাসিক পৰিৱৰ্তনৰ সূচনা কৰি ভাৰতীয় জনতা পাৰ্টিয়ে চৰকাৰ গঠন কৰিবলৈ সাজু হৈছে । অহা ৯ মে’ত ৰবীন্দ্ৰনাথ ঠাকুৰৰ জন্মজয়ন্তী অৰ্থাৎ ‘পঁচিছ ব’হাগ’ৰ পবিত্ৰ দিনটোত ৰাজ্যখনৰ নতুন চৰকাৰৰ শপত গ্ৰহণ অনুষ্ঠান অনুষ্ঠিত হ’ব । ভৱানীপুৰ সমষ্টিত তৃণমূল কংগ্ৰেছৰ নেত্ৰী মমতা বেনাৰ্জীক ১৫,১০৫ টা ভোটৰ বৃহৎ ব্যৱধানত পৰাস্ত কৰা শুভেন্দু অধিকাৰী বৰ্তমান মুখ্যমন্ত্ৰী পদৰ আটাইতকৈ শক্তিশালী দাবীদাৰ হিচাপে চৰ্চালৈ আহিছে ।

ৰাজ্যিক বিজেপিৰ সভাপতি শমিক ভট্টাচাৰ্যই এই সন্দৰ্ভত সংবাদ মাধ্যমৰ আগত কয়, “প্ৰধানমন্ত্ৰীয়ে ইতিমধ্যে ৯ মে’ৰ দিনটো নিৰ্ধাৰণ কৰিছে । কবি গুৰুৰ জন্মদিনৰ এই শুভ ক্ষণতে নতুন চৰকাৰে কাৰ্যভাৰ গ্ৰহণ কৰিব ।” উল্লেখ্য যে নিৰ্বাচনী প্ৰচাৰৰ সময়তে প্ৰধানমন্ত্ৰী নৰেন্দ্ৰ মোদীয়ে ঘোষণা কৰিছিল যে তেওঁ নতুন চৰকাৰৰ শপত গ্ৰহণ অনুষ্ঠানত অংশ ল’বলৈ পুনৰ কলকাতালৈ আহিব ।

বিজেপিৰ বিপুল বিজয়, ধৰাশায়ী তৃণমূল-

সোমবাৰে ঘোষিত নিৰ্বাচনী ফলাফলত বিজেপিয়ে মুঠ ২৯৪খন আসনৰ ভিতৰত ২০৬খন আসনত জয়লাভ কৰি একক সংখ্যাগৰিষ্ঠতা লাভ কৰে । আনহাতে, বিগত এক দশক ধৰি শাসনত থকা মমতা বেনাৰ্জীৰ নেতৃত্বাধীন তৃণমূল কংগ্ৰেছে মাত্ৰ ৮১খন আসনতে সীমাবদ্ধ থাকিবলগীয়া হয় । নিৰ্বাচনী প্ৰক্ৰিয়া সম্পূৰ্ণ হোৱাৰ পিছত ৰাজ্যৰ মুখ্য নিৰ্বাচনী বিষয়াই অহা ৬ মে’ত ৰাজ্যপাল আৰ এন ৰবিক সাক্ষাৎ কৰি আনুষ্ঠানিকভাৱে ফলাফলৰ প্ৰতিবেদন দাখিল কৰিব ।

২০২১ বনাম ২০২৬-

২০২১ চনৰ বিধানসভা নিৰ্বাচনত মমতা বেনাৰ্জীয়ে নন্দীগ্ৰামত শুভেন্দু অধিকাৰীৰ হাতত পৰাস্ত হৈছিল যদিও পিছত ভৱানীপুৰৰ উপ-নিৰ্বাচনত জয়ী হৈ মুখ্যমন্ত্ৰীৰ পদ ৰক্ষা কৰিছিল । সেইবাৰ টিএমচিয়ে ২১১খন আসন লাভ কৰি চৰকাৰ গঠন কৰিছিল । কিন্তু এইবাৰৰ নিৰ্বাচনত বিজেপিয়ে সেই পৰিসংখ্যা ওলোটা কৰি ২০১১ চনৰ পৰা চলি থকা তৃণমূলৰ শাসন ওফৰাই গেৰুৱা পতাকা উৰুৱাবলৈ সক্ষম হৈছে ।

এইবাৰ দুটা পৰ্যায়ত অনুষ্ঠিত হোৱা নিৰ্বাচনত (২৩ এপ্ৰিল আৰু ২৯ এপ্ৰিল) ৰাজ্যখনৰ ভোটাৰে বিজেপিৰ ‘পৰিৱৰ্তন’ৰ শ্লোগানত মোহৰ মাৰিলে । ৩৪ বছৰীয়া বামপন্থী শাসন ওফৰাই শাসনলৈ অহা তৃণমূল কংগ্ৰেছ এইবাৰ পুনৰ বিৰোধীৰ আসনত বহিবলগীয়া হোৱাটো বংগৰ ৰাজনীতিত এক বিৰল পৰিঘটনা হিচাপে বিবেচিত হৈছে ।

লগতে পঢ়ক : পশ্চিমবংগত গেৰুৱা ছুনামিত বিধ্বস্ত তৃণমূল, ধৰাশায়ী মমতা বেনাৰ্জীসহ ২২ গৰাকী মন্ত্ৰী