বাস্তাৰ পাণ্ডুম মহোৎসৱত অংশগ্ৰহণ কৰিবলৈ আজি চত্তীশগড়ৰ দন্তেৱাড়াত উপস্থিত হয় কেন্দ্ৰীয় গৃহমন্ত্ৰী অমিত শ্বাহ । এই সময়ছোৱাত কেন্দ্ৰীয় গৃহমন্ত্ৰীগৰাকীয়ে কয়, “আজি চ’ত নৱৰাত্ৰীৰ অষ্টমীৰ তিথি । মই মা দন্তেশ্বৰীৰ আশীৰ্বাদ লৈ আহিছো । প্ৰাৰ্থনা কৰিছো যে, পৰৱৰ্তী চ’ত নৱৰাত্ৰীৰ ভিতৰত ইয়াৰ পৰা ৰঙা আতংক (মাওবাদী ভাবুকি) শেষ হৈ আমাৰ বাস্তাৰ সম্পূৰ্ণ সমৃদ্ধিশালী হওক ।”
অমিত শ্বাহে কয়, “এতিয়া গুলী চলা আৰু ইয়াত বোমা বিস্ফোৰণ হোৱাৰ সময় গ’ল । যিসকলৰ হাতত অস্ত্ৰ-শস্ত্ৰ আছে, সকলো নক্সালবাদী ভাই-ভনীক অস্ত্ৰ-শস্ত্ৰ ত্যাগ কৰিবলৈ মই আহ্বান জনাই আহিছো । এজন নক্সালবাদীৰ মৃত্যু হ’লে কোনো সুখী নহয়, কিন্তু এই অঞ্চলটোৰ উন্নয়নৰ প্ৰয়োজন ।”
তেওঁ কয়, “মুখ্যমন্ত্ৰী বিষ্ণু দেৱ ছাই আৰু উপ-মুখ্যমন্ত্ৰী বিজয় শৰ্মাই ঘোষণা কৰিছে যে প্ৰতিজন নক্সালবাদী আত্মসমৰ্পণ কৰা গাঁৱক নক্সালমুক্ত ঘোষণা কৰা হ’ব আৰু উন্নয়নৰ পুঁজি হিচাপে ১ কোটি টকা দিয়া হ’ব । গতিকে আপোনালোক সকলোৱে নক্সালবাদ ত্যাগ কৰি মূলসুঁতিত যোগদান কৰক, ভাৰত চৰকাৰ আৰু ছত্তীশগড় চৰকাৰে আপোনালোকক সম্পূৰ্ণ নিৰাপত্তা প্ৰদান কৰিব ।”
কংগ্ৰেছক লক্ষ্য কৰি লয় কেন্দ্ৰীয় গৃহমন্ত্ৰীয়ে-
কেন্দ্ৰীয় গৃহমন্ত্ৰীগৰাকীয়ে কয়, “কংগ্ৰেছে গৰিবি হাটাওৰ শ্লোগান দিলে, কিন্তু দৰিদ্ৰতা নিৰ্মূল কৰা নাছিল । মোদী জীয়ে দুখীয়াৰ বাবে কাম কৰি আছে, দুখীয়াক ৰেচন দিছে । আমি সমগ্ৰ অঞ্চলটো ৰঙা সন্ত্ৰাসৰ পৰা মুক্ত কৰাৰ বাবে কাম কৰিম । অহা বছৰৰ ভিতৰত নক্সালবাদৰ অন্ত পৰিব । প্ৰতিখন গাঁও নক্সালমুক্ত হ’ব । ইয়াৰ কাম চলি আছে ।”
বিজেপি চৰকাৰে বাস্তাৰৰ উন্নয়নৰ বাবে কাম কৰি আছে- অমিত শ্বাহ
তেওঁ কয়, ‘অস্ত্ৰৰে উন্নয়ন হ’ব নোৱাৰে । নৰেন্দ্ৰ মোদীয়ে বাস্তাৰক সলনি কৰিব বিচাৰে । বিষ্ণু দেৱ ছাই ৰাজ্যৰ প্ৰথম জনজাতীয় মুখ্যমন্ত্ৰী হৈ পৰিছে । তেন্দুপট্টৰ পৰা ধন এতিয়া মধ্যভোগীৰ হাতলৈ নাযায় । বাস্তাৰৰ প্ৰতিটো অঞ্চলৰ উন্নয়ন হৈছে । বিজেপি চৰকাৰে বাস্তাৰৰ উন্নয়নৰ বাবে কাম কৰিছে । আমি বিচাৰো বাষ্টাৰৰ যুৱক-যুৱতীসকল আগবাঢ়ি যাওক, নিজৰ ভাষা আৰু পৰম্পৰা আগুৱাই লৈ গৈছে । আজি সমগ্ৰ বাষ্টাৰ ৰঙা আতংকৰ পৰা মুক্ত হোৱাৰ পথত আগবাঢ়িছে ।”
