প্ৰধানমন্ত্ৰী নৰেন্দ্ৰ মোদীয়ে আগন্তুক বাজেটৰ বাবে তেওঁলোকৰ মতামত আৰু পৰামৰ্শ জানিবলৈ আজি বিশিষ্ট অৰ্থনীতিবিদ আৰু বিশেষজ্ঞসকলক সাক্ষাৎ কৰে । বৈঠকত বিত্তমন্ত্ৰী নিৰ্মলা সীতাৰমণ আৰু নিটি আয়োগৰ উপাধ্যক্ষ সুমন বেৰী উপস্থিত থাকে । ইয়াৰ উপৰিও পলিচি থিংক টেংকৰ আন সদস্যসকলো এই বৈঠকত উপস্থিত থকা দেখা যায় ।
প্ৰকৃততে বাজেটৰ পূৰ্বে সদায় বিভিন্ন বিশেষজ্ঞৰ মতামত লোৱা হয় । এই সন্দৰ্ভত আজি প্ৰধানমন্ত্ৰী মোদীয়ে অৰ্থনীতিবিদ আৰু বিশেষজ্ঞৰ সৈতে আলোচনাত মিলিত হয় । অর্থনীতি উন্নীতকৰণৰ বিকল্প সন্দৰ্ভত বিশেষজ্ঞৰ সৈতে আলোচনা কৰে প্ৰধানমন্ত্ৰী মোদীয়ে ।
উল্লেখ্য যে, কেন্দ্ৰীয় বিত্তমন্ত্ৰী নিৰ্মলা সীতাৰমণে ২০২৫-২৬ চনৰ বাজেট ১ ফেব্ৰুৱাৰীত লোকসভাত দাখিল কৰিব । ২০ ডিচেম্বৰত বিত্তমন্ত্ৰী সীতাৰমণৰ অধ্যক্ষতাত ৰাজ্য আৰু কেন্দ্ৰীয় শাসিত অঞ্চলৰ সৈতে বাজেটৰ পূৰ্বে আলোচনা বৈঠক অনুষ্ঠিত হয় । পঞ্জাৱ, কেৰালাৰ দৰে আৰ্থিকভাৱে সংকটগ্ৰস্ত ৰাজ্যৰ বিত্তমন্ত্ৰীসকলে চৰকাৰৰ পৰা সকাহ বিচাৰে ।
