তৃতীয় টেষ্টৰ পূৰ্বে এডিলেইডত ৰঙা বলৰ সৈতে অনুশীলন কৰে ভাৰতীয় দলে, ভিডিঅ’ শ্বেয়াৰ কৰিলে বি চি চি আইয়ে

অষ্ট্ৰেলিয়াৰ বিৰুদ্ধে পিংক বল টেষ্টত ১০ উইকেটত পৰাজয়ৰ পাছত ৰোহিত শৰ্মা আৰু বিৰাট কোহলীৰ নেতৃত্বত ভাৰতীয় বেটছমেনে ৰেড বলৰ সৈতে অনুশীলন কৰে । ১৪ ডিচেম্বৰৰ পৰা ব্রিছবেনত ভাৰত আৰু অষ্ট্ৰেলিয়াৰ মাজত অনুষ্ঠিত হ’ব তৃতীয়খন টেষ্ট । মাত্ৰ ডেৰ-দুই দিনৰ ভিতৰতে দ্বিতীয়খন টেষ্ট শেষ হয়, গতিকে প্ৰস্তুতি চলাবলৈ ভাৰতৰ হাতত অতিৰিক্ত সময় আছে । বুধবাৰে ব্রিছবেনত উপস্থিত হ’ব ভাৰতীয় দলটো ৷

কৌশলত গুৰুত্ব দিছিল ভাৰতে-

ভাৰতে এই সময়খিনি ব্যৱহাৰ কৰি মঙলবাৰে অনুশীলনত অংশ লৈ বৰ্ডাৰ-গাভাস্কাৰ ট্ৰফীৰ বাকী খেলসমূহৰ বাবে প্ৰস্তুতি চলায় । শনিবাৰৰ পৰা আৰম্ভ হ’বলগীয়া তৃতীয়খন টেষ্টৰ বাবে অষ্ট্ৰেলিয়াৰ দলটো যদিও ব্রিছবেনত উপস্থিত হৈছে, তথাপিও ভাৰতে এডিলেইডত ৰঙা বলৰ সৈতে অনুশীলন কৰাৰ সিদ্ধান্ত লৈছে ৷ ভাৰতীয় দলটোৱে অনুশীলনৰ সময়ত নিজৰ ডিফেন্সিভ টেকনিক আৰু বল ড্ৰপিংৰ ওপৰত গুৰুত্ব আৰোপ কৰে । ভাৰতীয় ক্ৰিকেট নিয়ন্ত্ৰণ ব’ৰ্ডে (বি চি চি আই) দলটোৰ অনুশীলনৰ ভিডিঅ’ টুইটাৰত শ্বেয়াৰ কৰাৰ সময়তে লিখিছে, ‘এতিয়া ভৱিষ্যতৰ কথা চিন্তা কৰাৰ সময় । এডিলেইডত ব্রিছবেন টেষ্টৰ প্রস্তুতি আৰম্ভ হৈছে’ ৷

ৰোহিতে নেটত অনুশীলন কৰে-

দুৰ্বল ফৰ্মৰ সৈতে যুঁজি থকা ভাৰতীয় অধিনায়ক ৰোহিত শৰ্মাই যোৱা ১২টা ইনিংছত এটা অৰ্ধশতক (৫২)ৰে মাত্ৰ ১৪২ ৰানহে কৰিবলৈ সক্ষম হৈছে । পুত্ৰৰ জন্মৰ বাবে প্ৰথমখন টেষ্টত অংশ ল’ব পৰা নাছিল তেওঁ । মঙলবাৰে ভাৰতীয় স্পীনাৰ আৰু বেগী বলাৰ উভয়ৰে মুখামুখি হোৱাৰ সময়তে তেওঁ শীঘ্ৰে নিজৰ ছন্দ পুনৰ লাভ কৰাৰ লক্ষ্য লয় । দ্বিতীয় টেষ্টত ছয় নম্বৰত বেটিং কৰিবলৈ অহা ৰোহিতে দুটা ইনিংছত ৩ আৰু ৬ ৰান সংগ্ৰহ কৰে । প্ৰথম ইনিংছত তেওঁ এল বি ডব্লিউ হোৱাৰ বিপৰীতে অষ্ট্ৰেলিয়াৰ অধিনায়ক পেট কামিন্সে দ্বিতীয় ইনিংছত তেওঁক বল্ড কৰে ।

কোহলীৰ অনুশীলন-

পাৰ্থত অনুষ্ঠিত প্ৰথমখন টেষ্টত ১৬ মাহৰ শতকৰ খৰাং পৰিস্থিতিৰ অন্ত পেলোৱা কোহলীয়ে পিংক বল টেষ্টত দুয়োটা ইনিংছতে উইকেটৰ পিছফালে আউট হৈছিল । প্ৰথম ইনিংছত দ্বিতীয় শ্লিপ, দ্বিতীয় ইনিংছত উইকেটকীপাৰৰ হাতত উইকেট বিসৰ্জন দিছিল তেওঁ । ষ্টাৰ ইণ্ডিয়ান বেটছমেন কোহলীয়ে সম্পূৰ্ণ উৎসাহেৰে অনুশীলন কৰে । নেট অধিবেশনৰ আৰম্ভণিতে তেওঁ সতৰ্ক আছিল যদিও তাৰ পিছত লাহে লাহে ছন্দৰ মাজলৈ সোমাই যায় তেওঁ ।

নেটত সময় অতিবাত কৰে ৰাহুল-পন্টে-

কে এল ৰাহুলক শান্ত যেন লাগিছিল । তেওঁ নিজৰ ডিফেন্সত অধিক মনোনিৱেশ কৰিছিল, আনহাতে ঋষভ পণ্টে কিছুমান পিক আপ শ্বট খেলিছিল । প্ৰথম টেষ্টত ভাৰতৰ ২৯৫ ৰানৰ বিশাল জয়ত ১৬১ ৰান সংগ্ৰহ কৰা যুৱ অ’পেনাৰ যশস্বী জয়ছোৱালে কিছু ভাল শ্বট দিয়াৰ লগতে ভাৰতীয় বলাৰৰ বিৰুদ্ধে আগ্ৰাসী স্থিতি গ্ৰহণ কৰে । বলিংত হৰ্ষিত ৰানা, আকাশ দীপ, য়শ দয়াল, ৰবীন্দ্ৰ জাডেজা, ৰবিচন্দ্ৰন অশ্বিন আৰু ৱাশ্বিংটন সুন্দৰৰ স্পীন ট্ৰাইঅ’ৰ লগতে কিছু থ্ৰ’ডাউন বিশেষজ্ঞও আছিল । ভাৰতীয় বেগী বলিঙৰ অগ্ৰণী যুটি যশপ্ৰীত বুমৰাহ আৰু মহম্মদ ছিৰাজৰ লগতে বেগী বলিং অলৰাউণ্ডাৰ নীতিশ কুমাৰ ৰেড্ডীয়ে বিশেষ ঘাম বাহিৰ কৰা নাছিল ।