সোমবাৰে গভীৰ নিশা আইন মন্ত্ৰালয়ে গেজেট অধিসূচনা জাৰি কৰি কয় যে ৰাষ্ট্ৰপতি দ্ৰৌপদী মুৰ্মুৱে নিৰ্বাচন আয়ুক্ত জ্ঞানেশ কুমাৰক দেশৰ পৰৱৰ্তী মুখ্য নিৰ্বাচনী আয়ুক্ত আৰু হাৰিয়ানাৰ মুখ্য সচিব ড০ বিবেক যোশীক নিৰ্বাচন আয়ুক্ত হিচাপে নিযুক্তি দিছে । নতুন আইনৰ অধীনত নিযুক্তি পোৱা প্ৰথমজন মুখ্য নিৰ্বাচনী আয়ুক্ত হিচাপে পৰিগণিত হৈছে জ্ঞানেশ কুমাৰ । ১৮ ফেব্ৰুৱাৰীত অৱসৰ গ্ৰহণ কৰা ৰাজীৱ কুমাৰৰ ঠাইত তেওঁ স্থলাভিসিক্ত হৈছে । প্ৰধানমন্ত্ৰীৰ নেতৃত্বত গঠিত উচ্চ পৰ্যায়ৰ কমিটীৰ বৈঠকৰ কেইঘণ্টামান পিছতে এই নিযুক্তি দিয়া হয় ।
প্ৰধানমন্ত্ৰী মোদীৰ উপৰিও চি ই চি নিৰ্বাচন কৰা তিনিজনীয়া পেনেলত কেন্দ্ৰীয় গৃহমন্ত্ৰী অমিত শ্বাহ আৰু লোকসভাৰ বিৰোধী দলপতি ৰাহুল গান্ধীও আছিল । ৰাহুল গান্ধীয়ে চৰকাৰক কয় যে নতুন নিযুক্তি প্ৰক্ৰিয়াক প্ৰত্যাহ্বান জনোৱা আবেদনসমূহৰ সন্দৰ্ভত উচ্চতম ন্যায়ালয়ে সিদ্ধান্ত নোলোৱালৈকে চি ই চিৰ নিযুক্তি পিছুৱাই দিব লাগে । জ্ঞানেশ কুমাৰৰ কাৰ্যকাল ২০২৯ চনৰ ২৬ জানুৱাৰীলৈ চলিব । পৰৱৰ্তী লোকসভা নিৰ্বাচনৰ সময়সূচী ঘোষণা কৰাৰ পিছতহে তেওঁ অৱসৰ ল’ব বুলি আশা কৰা হৈছে ।
জ্ঞানেশ কুমাৰ ১৯৮৮ চনৰ বেটচৰ আই এ এছ বিষয়া-
১৯৮৮ চনৰ বেটচৰ কেৰেলা কেডাৰৰ আই এ এছ বিষয়া জ্ঞানেশ কুমাৰৰ জন্ম হৈছিল ১৯৬৪ চনৰ ২৭ জানুৱাৰীত উত্তৰ প্ৰদেশৰ আগ্ৰাত । বাৰাণসীৰ কুইনছ কলেজ আৰু লক্ষ্ণৌৰ কেলভিন তালুকেদাৰ কলেজৰ পৰাই তেওঁ শিক্ষা গ্ৰহণ কৰিছিল । ইয়াৰ পিছত আই আই টি কানপুৰৰ পৰা চিভিল ইঞ্জিনিয়াৰিঙত বি টেক, আই চি এফ এ আইৰ পৰা বিজনেছ ফাইনেন্সত স্নাতকোত্তৰ আৰু হাৰ্ভাৰ্ড বিশ্ববিদ্যালয়ৰ পৰা পৰিৱেশ অৰ্থনীতিত স্নাতকোত্তৰ ডিগ্ৰী লাভ কৰে । তেওঁ এৰ্নাকুলামৰ সহকাৰী সংগ্ৰাহক, আদুৰৰ উপ সংগ্ৰাহক, কেৰালা ৰাজ্যিক অনুসূচিত জাতি আৰু অনুসূচিত জনজাতি উন্নয়ন নিগমৰ পৰিচালন সঞ্চালক, কেৰালাৰ কোচিন পৌৰ নিগমৰ পৌৰ আয়ুক্ত হিচাপে কাৰ্যনিৰ্বাহ কৰিছিল । আন বহু পদতো তেওঁ কাৰ্যনিৰ্বাহ কৰিছিল ।
কেৰালা চৰকাৰৰ সচিব হিচাপে জ্ঞানেশ কুমাৰে বিত্ত সম্পদ, ফাষ্ট-ট্ৰেক প্ৰকল্প আৰু ৰাজহুৱা কাম-কাজ বিভাগ আদি বিভিন্ন বিভাগ চম্ভালিছিল । ভাৰত চৰকাৰত তেওঁ প্ৰতিৰক্ষা মন্ত্ৰালয়ৰ যুটীয়া সচিব, গৃহ পৰিক্ৰমা মন্ত্ৰালয়ৰ যুটীয়া সচিব আৰু অতিৰিক্ত সচিব, সংসদীয় পৰিক্ৰমা মন্ত্ৰালয়ৰ সচিব আৰু সহযোগিতা মন্ত্ৰালয়ৰ সচিব হিচাপে কাম কৰাৰ অভিজ্ঞতা আছে তেওঁৰ । ২০২৪ চনৰ ৩১ জানুৱাৰীত ভাৰত চৰকাৰৰ সমবায় সচিব হিচাপে অৱসৰ গ্ৰহণ কৰি ২০২৪ চনৰ ১৪ মাৰ্চত ভাৰতীয় নিৰ্বাচন আয়োগত নিৰ্বাচন আয়ুক্ত হিচাপে নিযুক্তি লাভ কৰে তেওঁ ।
