ভাৰতীয় দলৰ বেগী বলাৰ যশপ্ৰীত বুমৰাহক আই চি চিৰ ডিচেম্বৰ মাহৰ শ্ৰেষ্ঠ পুৰুষ খেলুৱৈ হিচাপে নিৰ্বাচিত কৰাৰ বিপৰীতে মহিলা শাখাত বিজয়ী হৈছে অষ্ট্ৰেলিয়াৰ এনাবেল ছাথাৰলেণ্ড । অষ্ট্ৰেলিয়াৰ বিৰুদ্ধে পাঁচখন মেচৰ টেষ্ট শৃংখলাত উজ্জ্বল প্ৰদৰ্শন আগবঢ়াইছিল বুমৰাহ আৰু ৯টা ইনিংছত ৩২টা উইকেটৰে সৰ্বাধিক সফল বলাৰ আছিল তেওঁ । এই সময়ছোৱাত বুমৰাহে তিনিবাৰকৈ এটা ইনিংছত ৫ বা তাতকৈ অধিক উইকেট দখল কৰে ।
উৎকৃষ্ট প্ৰদৰ্শনৰ বাবে বুমৰাহক ছিৰিজৰ শ্ৰেষ্ঠ খেলুৱৈ হিচাপেও নিৰ্বাচিত কৰা হয় । এই শৃংখলাত ১-৩ ব্যৱধানত পৰাস্ত হয় ভাৰত, কিন্তু বুমৰাহে বঁটা লাভ কৰিবলৈ সক্ষম হয় । বুমৰাহৰ লগতে মনোনয়ন তালিকাত পেট কামিন্স আৰু দক্ষিণ আফ্ৰিকাৰ ডেন পেটাৰছন আছিল যদিও এই ভাৰতীয় বেগী বলাৰগৰাকীয়ে সকলোকে পিছ পেলাই এই বঁটা লাভ কৰে । এইবাৰ দ্বিতীয়বাৰৰ বাবে আই চি চিৰ পুৰুষৰ শ্ৰেষ্ঠ খেলুৱৈ হিচাপে নিৰ্বাচিত হৈছে বুমৰাহ ।
ব্ৰডাৰ-গাভাস্কাৰ ট্ৰফীত প্ৰভাৱ বিস্তাৰ-
এডিলেইডত খেলা দিবা নৈশ টেষ্টৰ প্ৰথম ইনিংছত চাৰিটা উইকেট দখল কৰি বুমৰাহে ভাৰতক পুনৰ খেলখনলৈ আনিছিল যদিও বেটছমেনৰ দুৰ্বল প্ৰদৰ্শনৰ বাবে দলটো মেচখনত পৰাস্ত হৈছিল । ব্রিছবেনত খেলা তৃতীয় টেষ্টৰ মেচখনত প্রথম ইনিংছত ৬টা আৰু ৯টা উইকেট দখল কৰি ভাৰতক মেচখন ড্ৰ’ কৰাত সহায় কৰে তেওঁ ৷ ইয়াৰ পিছতে মেলবৰ্ণত অনুষ্ঠিত বক্সিং ডে’ টেষ্ট মেচখনৰ প্ৰথম ইনিংছত ৪টা আৰু দ্বিতীয় ইনিংছত ৫টা উইকেট দখল কৰে বুমৰাহে । বেগী বলাৰগৰাকীৰ শক্তিশালী প্ৰদৰ্শনৰ পিছতো এই টেষ্টত ভাৰত ১৮৪ ৰানত পৰাস্ত হয় । এই সময়ছোৱাত তেওঁ টেষ্ট ক্ৰিকেটত গড়ে ২০তকৈ কম গড়ে ২০০ উইকেট সম্পূৰ্ণ কৰা প্ৰথমজন বলাৰ হিচাপে পৰিগণিত হয় ।
ভাৰত-নিউজীলেণ্ডৰ বিৰুদ্ধে ছাথাৰলেণ্ডৰ প্ৰভাৱ-
আনহাতে, স্মৃতি মান্ধানা আৰু ননকুলুলেকো ম্লাবাক এৰি মহিলা শাখাত ছাথাৰলেণ্ডে জয়লাভ কৰে এই খিতাপ । শেহতীয়াকৈ ভাৰত আৰু নিউজীলেণ্ডৰ বিৰুদ্ধে অষ্ট্ৰেলিয়াৰ পৰাজয়ত গুৰুত্বপূৰ্ণ ভূমিকা পালন কৰিছিল ২৩ বছৰীয়া খেলুৱৈগৰাকীয়ে । ভাৰতৰ বিৰুদ্ধে তৃতীয়খন এদিনীয়া খেলত ছাথাৰলেণ্ডে ৯৫টা বলত ১১০ ৰান সংগ্ৰহ কৰি শতক অৰ্জন কৰে । ইয়াৰ উপৰিও তেওঁ ছিৰিজত ৬টা উইকেটো দখল কৰে । ইয়াৰ পাছতে নিউজীলেণ্ডৰ বিৰুদ্ধে ছাথাৰলেণ্ডে নিজৰ ফৰ্ম বজাই ৰাখি শতক অৰ্জন কৰে ।
