ঐতিহাসিক লৰ্ডছ ক্ৰিকেট খেলপথাৰত অনুষ্ঠিত হ’বলগীয়া শৃংখলাৰ তৃতীয়খন এদিনীয়াই হ’ব পাৰে ভাৰতীয় জাৰ্ছীত ‘হিটমেন’ ৰোহিত শৰ্মাৰ অন্তিমখন মেচ

টিম ইণ্ডিয়াৰ প্ৰাক্তন সফল অধিনায়ক তথা তাৰকা বেটছমেন ৰোহিত শৰ্মাৰ এদিনীয়া কেৰিয়াৰক লৈ প্ৰচাৰিত খবৰে বৰ্তমান চৰ্চা লাভ কৰিছে । বিভিন্ন সূত্ৰৰ প্ৰতিবেদন অনুসৰি, অহা ১৯ জুলাই (দেওবাৰ)ত ইংলেণ্ডৰ বিৰুদ্ধে ঐতিহাসিক লৰ্ডছ ক্ৰিকেট খেলপথাৰত অনুষ্ঠিত হ’বলগীয়া শৃংখলাৰ তৃতীয়খন এদিনীয়াই হ’ব পাৰে ভাৰতীয় জাৰ্ছীত ‘হিটমেন’ ৰোহিত শৰ্মাৰ অন্তিমখন মেচ ।

নিৰ্বাচকসকলে ২০২৭ চনৰ এদিনীয়া বিশ্বকাপক লক্ষ্য কৰি এতিয়াৰে পৰা যুৱ খেলুৱৈসকলক প্ৰস্তুত কৰাৰ দীৰ্ঘম্যাদী পৰিকল্পনা হাতত লৈছে । ৰোহিতৰ স্থানত যুৱ অ’পেনাৰ যশস্বী জয়ছোৱালক ধাৰাবাহিকভাৱে সুযোগ দিয়াৰ যো-জা চলিছে । নিৰ্বাচকসকলৰ মতে আগন্তুক ডাঙৰ টুৰ্ণামেণ্টৰ পূৰ্বে জয়ছোৱালে কমেও ২০ খন এদিনীয়া খেলাৰ সুযোগ পাব লাগে ।

ইফালে ফিটনেছ আৰু উৎকৃষ্ট ফৰ্মৰ বাবে ২০২৭ বিশ্বকাপৰ পৰিকল্পনাত বিৰাট কোহলী সুৰক্ষিত স্থানত থকাৰ বিপৰীতে এতিয়া অনিশ্চয়তাৰ আৱৰ্তত ৰোহিত শৰ্মা ।

যুৱ প্ৰজন্মক সুযোগ আৰু অজিত আগৰকাৰৰ ৰোডমেপ

প্ৰকাশিত এক খবৰ অনুসৰি, ভাৰতীয় নিৰ্বাচক সমিতিৰ অধ্যক্ষ অজিত আগৰকাৰ বৰ্তমান টীম ইণ্ডিয়াৰ সৈতে ইংলেণ্ড ভ্ৰমণত আছে । তেওঁ টিম মেনেজমেণ্টৰ ভৱিষ্যতৰ পৰিকল্পনাৰ সৈতে সম্পূৰ্ণ একমত প্ৰকাশ কৰিছে । জানিব পৰা মতে, ২০২৭ এদিনীয়া বিশ্বকাপৰ মূল পৰিকল্পনাত ৰোহিত শৰ্মাৰ নাম ক্ৰমান্বয়ে আঁতৰি গৈছে আৰু নিৰ্বাচকসকলে যুৱ প্ৰজন্মক অধিক প্ৰাধান্য দিব বিচাৰিছে ।

প্ৰশ্নৰ আৱৰ্তত ‘হিটমেন’ৰ শেহতীয়া প্ৰদৰ্শন

বিগত কিছু সময় ধৰি ৰোহিত শৰ্মাৰ এদিনীয়া প্ৰদৰ্শন আশানুৰূপ হোৱা নাই।

-তেওঁ খেলা শেষৰ ৮ খন এদিনীয়া মেচত মাত্ৰ ৩০.১ গড়ে আৰু ৮৮.৬০ ষ্ট্ৰাইক ৰেটেৰে সংগ্ৰহ কৰিছে মাত্ৰ ২৪১ ৰান ।

-এই সময়ছোৱাত তেওঁৰ বেটৰ পৰা কেৱল এটা অৰ্ধশতকহে দেখা গৈছে ।

-আনকি ইংলেণ্ডৰ বিৰুদ্ধে অনুষ্ঠিত দ্বিতীয়খন এদিনীয়াতো তেওঁ মাত্ৰ ৪৭ টা বলত ২৬ ৰান কৰি উইল জেক্সৰ বলত আউট হয় ।

ভাৰতীয় ক্ৰিকেটৰ এক সোণালী যাত্ৰাৰ অন্তিম অধ্যায়

যদি দেওবাৰে লৰ্ডছ ক্ৰীড়াংগনত হ’বলগীয়া মেচখনেই ৰোহিত শৰ্মাৰ শেষ এদিনীয়া মেচ হয়, তেন্তে ই ভাৰতীয় ক্ৰিকেটৰ বাবে এক যুগৰ অৱসান হিচাপে বিবেচিত হ’ব । ৰোহিত শৰ্মাৰ অধিনায়কত্বতে ভাৰতে ২০২৪ চনৰ টি-২০ বিশ্বকাপ আৰু ২০২৫ চনৰ চেম্পিয়ন্স ট্ৰফী জয়ৰ সোৱাদ লাভ কৰিছিল । তেওঁ সদায় ভাৰতীয় ক্ৰিকেট ইতিহাসৰ অন্যতম সফল সীমিত অভাৰৰ অধিনায়ক আৰু সৰ্বকালৰ শ্ৰেষ্ঠ অপেনিং বেটছমেন হিচাপে ক্ৰীড়ানুৰাগীৰ বুকুত চিৰদিন স্মৰণীয় হৈ ৰ’ব ।

লগতে পঢ়ক : আইচিচিৰ ডাঙৰ সিদ্ধান্ত; সলনি হ’ল ২০২৭ ৰ এদিনীয়া বিশ্বকাপৰ ফৰ্মেট

অৱশেষত জয়ৰ মুখ দেখিলে ভাৰতে! ইংলেণ্ডক ৬ উইকেটত হৰুৱাই শৃংখলাত ১-০ৰ অগ্ৰগতি

অৱশেষত অপেক্ষাৰ অন্ত পৰিল । ব্ৰিটেইনৰ মাটিত চলি থকা বহু প্ৰত্যাশিত ইংলেণ্ড ভ্ৰমণত টীম ইণ্ডিয়াই লাভ কৰিলে প্ৰথমটো সোৱাদ লগা জয় । বাৰ্মিংহামৰ ঐতিহাসিক এজবেষ্টন ক্ৰীড়াগণত অনুষ্ঠিত প্ৰথমখন এদিনীয়া মেচত ভাৰতে ঘৰুৱা দল ইংলেণ্ডক ৬ উইকেটত ধূলিসাৎ কৰে । এই গুৰুত্বপূৰ্ণ বিজয়েৰে টীম ইণ্ডিয়াই তিনিখনীয়া এদিনীয়া শৃংখলাটোত ১-০ ব্যৱধানত অগ্ৰগতি লাভ কৰিছে ।

ৰুট-ডছনৰ যুঁজ, বলিংত অক্ষৰৰ তাণ্ডৱ

মেচখনত টছত হাৰি প্ৰথমে বেটিং কৰিবলগীয়া হোৱা ইংলেণ্ড দলে ধুমুহাৰ দৰে আৰম্ভণি কৰিছিল । এটা সময়ত এটাও উইকেট নেহেৰুৱাকৈ ইংলেণ্ডৰ স্কোৰ আছিল ৬১ ৰান । কিন্তু ইয়াৰ পিছতে ভাৰতীয় বলাৰৰ আক্ৰমণৰ সন্মুখত তিষ্ঠিব নোৱাৰি মাত্ৰ ১০৭ ৰানতে দলটোৱে হেৰুৱায় ৬ টাকৈ গুৰুত্বপূৰ্ণ উইকেট । বেন ডাকেট (৪৩) আৰু অধিনায়ক জচ বাটলাৰ (৫) আদি তাৰকাসকল ফ্লপ প্ৰমাণিত হয় ।

অৱশ্যে ইয়াৰ পিছতে ইংলেণ্ডৰ হাল ধৰে অভিজ্ঞ জো ৰুট আৰু লিয়াম ডছনে । দুয়োৰে মাজত সপ্তম উইকেটৰ বাবে গঢ়ি উঠে ১২১ ৰানৰ এক দায়িত্বশীল পাৰ্টনাৰশ্বিপ । জো ৰুটৰ অপৰাজিত ৭৬ ৰান আৰু লিয়াম ডছনৰ ৬৮ ৰানৰ অৰ্ধশতকীয় ইনিংছৰ সহায়ত ইংলেণ্ডে নিৰ্ধাৰিত অভাৰত ২৫৮ ৰান সংগ্ৰহ কৰিবলৈ সক্ষম হয় । ভাৰতৰ হৈ বলিংত চমকপ্ৰদ প্ৰদৰ্শন দাঙি ধৰি স্পীনাৰ অক্ষৰ পেটেলে মাত্ৰ ৬২ ৰান দি সংগ্ৰহ কৰে সৰ্বাধিক ৪টা উইকেট । তদুপৰি প্ৰসিদ্ধ কৃষ্ণা আৰু নৱাগত গুৰনুৰ ব্ৰাৰে লাভ কৰে দুটাকৈ উইকেট ।

ব্যৰ্থ ROKO যুটী

২৫৯ ৰানৰ লক্ষ্য অনুসৰণ কৰিবলৈ ওলাই ভাৰতীয় শিবিৰত আৰম্ভণিতেই মোক্ষম আঘাত লাগে । টীম ইণ্ডিয়াৰ দুই মহীৰূহ ৰোহিত শৰ্মা আৰু বিৰাট কোহলী আজি সম্পূৰ্ণ ব্যৰ্থ হয় । ৰোহিতে ২১ টা বলত ১১ ৰান কৰাৰ বিপৰীতে কোহলীয়ে মাত্ৰ ৫ ৰান কৰি পেভিলিয়নলৈ ওভতে । মাত্ৰ ৪৮ ৰানতে ভাৰতে দুই তাৰকা খেলুৱৈৰ উইকেট হেৰুৱাই বিপদত পৰে ।

গীল-শ্ৰেয়াছৰ প্ৰতিৰোধ আৰু অধিনায়কৰ কঁকালৰ বিষ

দল সংকটত পৰা মুহূৰ্তত প্ৰতিৰোধ গঢ়ি তোলে যুৱ অধিনায়ক শুভমন গীল আৰু শ্ৰেয়াছ আয়াৰে । দুয়োৰে মাজত ১০৯ ৰানৰ গুৰুত্বপূৰ্ণ অংশীদাৰিত্ব গঢ়ি উঠে । সুন্দৰ লয়ত থকা আয়াৰে ৩৫ ৰান কৰি ৰান আউট হোৱাৰ বিপৰীতে শুভমন গীলে ৭৫ টা বলত ৮০ ৰানৰ এক দায়িত্বশীল ইনিংছ খেলে । কিন্তু খেল চলি থকাৰ মাজতে কঁকালৰ তীব্ৰ বিষত আক্ৰান্ত হৈ অধিনায়ক গীল ‘ৰিটায়াৰ্ড হাৰ্ট’ হৈ ক্ৰীড়াংগন এৰিবলৈ বাধ্য হয় ।

অক্ষৰ-সুন্দৰৰ অপৰাজিত শতকীয় যুঁজ আৰু জয়লাভ

শুভমন গিল খেলপথাৰৰ পৰা আঁতৰি যোৱাৰ পিছত মেচৰ হাল ধৰে অলৰাউণ্ডাৰ অক্ষৰ পেটেল আৰু ৱাশ্বিংটন সুন্দৰে । ইংৰাজ বলাৰক নিৰ্দয় প্ৰহাৰ কৰি দুয়োৰে মাজত গঢ়ি উঠে ১০২ ৰানৰ অপৰাজিত শতকীয় পাৰ্টনাৰশ্বিপ । ৱাশ্বিংটন সুন্দৰে ৬৩ টা বলত ৫২ ৰান (৪টা চাৰি, ১টা ছিক্সাৰ) কৰাৰ বিপৰীতে বলিংত ৪টা উইকেট লোৱা অক্ষৰ পেটেলে বেটেৰেও তাণ্ডৱ চলাই ৫২ টা বলত ৫৭ ৰানৰ এক মেচ বিজয়ী ইনিংছ উপহাৰ দিয়ে ।

এই দুয়ো অলৰাউণ্ডাৰৰ অপৰাজিত ধৈৰ্যশীল বেটিঙেৰে ভাৰতে ৪৬ নম্বৰ অভাৰতে ৪ উইকেট হেৰুৱাই লক্ষ্যত উপনীত হয় আৰু ৬ উইকেটত এক সুন্দৰ বিজয় সাব্যস্ত কৰে । মেচখনত অলৰাউণ্ড প্ৰদৰ্শন কৰা অক্ষৰ পেটেলক মেচৰ শ্ৰেষ্ঠ খেলুৱৈ হিচাপে বিবেচিত কৰা হয় ।

লগতে পঢ়ক : ক্ৰিকেটৰ মক্কাত ইতিহাস ৰচিলে ভাৰতীয় মহিলা ক্ৰিকেট দলে, ২৭০ ৰানত ধূলিসাৎ ইংলেণ্ড

ভাৰতীয় মহিলা ক্ৰিকেট দলে লণ্ডনৰ ঐতিহাসিক লৰ্ডছ ক্ৰিকেট গ্ৰেণ্ডত অনুষ্ঠিত একমাত্ৰ মহিলা টেষ্ট মেচখনত ইংলেণ্ডক ২৭০ ৰানৰ বিশাল ব্যৱধানত পৰাস্ত কৰে

ক্ৰীড়া ইতিহাসৰ এক সোণালী অধ্যায় ৰচনা কৰি ভাৰতীয় মহিলা ক্ৰিকেট দলে লণ্ডনৰ ঐতিহাসিক লৰ্ডছ ক্ৰিকেট গ্ৰেণ্ডত অনুষ্ঠিত একমাত্ৰ মহিলা টেষ্ট মেচখনত ইংলেণ্ডক ২৭০ ৰানৰ বিশাল ব্যৱধানত পৰাস্ত কৰে । ১৪২ বছৰীয়া ইতিহাসত লৰ্ডছৰ মাটিত প্ৰথমবাৰৰ বাবে অনুষ্ঠিত হোৱা মহিলা টেষ্টখনক সম্পূৰ্ণৰূপে নিজৰ নামত কৰি হৰমনপ্ৰীত কৌৰ বাহিনীয়ে এক চিৰস্মৰণীয় জয় সাব্যস্ত কৰিলে । বেটিং, বলিং আৰু ফিল্ডিং- প্ৰতিটো বিভাগতে ইংলেণ্ডক তেওঁলোকৰে ঘৰুৱা মাটিত ধূলিসাৎ কৰি ভাৰতে এই ঐতিহাসিক ক্ষণ উদযাপন কৰে ।

ক্ৰিকেটৰ মক্কাত য়াস্তিকা ভাটিয়াৰ ঐতিহাসিক শতক-

এই মেচখনৰ আটাইতকৈ আকৰ্ষণীয় দিশটো আছিল ভাৰতীয় তাৰকা বেটাৰ য়াস্তিকা ভাতিয়াৰ দুৰ্দান্ত বেটিং প্ৰদৰ্শন । লৰ্ডছৰ মাটিত টেষ্ট শতক অৰ্জন কৰা ইতিহাসৰ প্ৰথমগৰাকী মহিলা ক্ৰিকেটাৰ হিচাপে নিজৰ নাম স্বৰ্ণাক্ষৰে লিপিবদ্ধ কৰে য়াস্তিকাই । তেওঁৰ এই অনন্য ইনিংছৰ সহায়ত ভাৰতে দ্বিতীয় ইনিংছত ৭ উইকেটৰ বিনিময়ত ৩৪১ ৰান সংগ্ৰহ কৰি ইনিংছ ঘোষণা কৰে । প্ৰথম ইনিংছৰ ১১৫ ৰানৰ অগ্ৰগতিৰ সৈতে ভাৰতে ইংলেণ্ডৰ সন্মুখত ৪৫৭ ৰানৰ এক কঠিন লক্ষ্য ধাৰ্য কৰিছিল । ইয়াৰ উপৰিও স্মৃতি মন্ধানাৰ ৭০ ৰান আৰু ৰিচা ঘোষৰ অপৰাজিত ৫০ ৰানৰ অৱদানে ঘৰুৱা দলটোক সমগ্ৰ মেচখনতে ত্ৰাহি মধুসূদন সুঁৱৰায় ।

ক্ৰান্তি গৌড় আৰু দীপ্তি শৰ্মাৰ বিধ্বংসী বলিং

প্ৰথম ইনিংছত ভাৰতে সংগ্ৰহ কৰা ২৮৫ ৰানৰ (স্মৃতি মন্ধানা ৮৩, হৰমনপ্ৰীত কৌৰ ৫৮, দীপ্তি শৰ্মা ৫৭) প্ৰত্যুত্তৰত ইংলেণ্ড মাত্ৰ ১৭০ ৰানতে অল-আউট হৈছিল । ভাৰতৰ হৈ অভিষেককাৰী বলাৰ ক্ৰান্তি গৌড়ে প্ৰথম ইনিংছতে ৫ টা উইকেট দখল কৰি ইংলেণ্ডৰ বেটিং লাইন-আপ ধ্বংস কৰে ।

দ্বিতীয় ইনিংছত ৪৫৭ ৰানৰ বিশাল লক্ষ্য অনুসৰণ কৰিবলৈ গৈ ইংলেণ্ডৰ আৰম্ভণি অত্যন্ত শোচনীয় হয় । টেমী বিউমণ্ট শূন্য ৰানতে আৰু বিদায়ী তাৰকা হীদাৰ নাইট অতি কম ৰানতে আউট হয় । ছফী এক্লেষ্টন আৰু এমি জোনছে কিছু যুঁজ দিছিল যদিও ভাৰতীয় স্পীনাৰ দীপ্তি শৰ্মাৰ (৪ উইকেট) স্পীনৰ যাদুৰ সন্মুখত তিষ্ঠিব নোৱাৰি চতুৰ্থ দিনাই ইংলেণ্ডৰ দ্বিতীয় ইনিংছ ১৮৬ ৰানতে সমাপ্ত হয় ।

ইংৰাজ ভূমিত অপৰাজেয় ভাৰত

এই জয়ে ৰেড-বল ক্ৰিকেটত ভাৰতীয় মহিলা দলৰ বৰ্ধিত আধিপত্যক পুনৰবাৰ প্ৰমাণ কৰিলে । বিগত ১১ খন মহিলা টেষ্টৰ ভিতৰত ভাৰতে সাতখনত জয়লাভ কৰাৰ বিপৰীতে মাত্ৰ এখনতহে পৰাজয় বৰণ কৰিছে । উল্লেখনীয় যে, ইংলেণ্ডৰ মাটিত খেলা ১১ খন টেষ্টৰ ভিতৰত ভাৰতীয় দলটো এতিয়াও অপৰাজেয় হৈয়েই আছে । আনহাতে, ইংলেণ্ডৰ দুই অভিজ্ঞ ক্ৰিকেটাৰ হীদাৰ নাইট আৰু টেমী বিউমণ্টৰ বিদায়ী টেষ্টখন তেওঁলোকৰ বাবে এক হতাশাজনক অনুভৱ হিচাপে ৰৈ গ’ল ।

লগতে পঢ়ক : শচীন-বিৰাটেও কৰিব নোৱাৰা কৃতিত্ব অৰ্জন কৰিলে হৰমনপ্ৰীত কৌৰে!

অধিনায়ক হৰমনপ্ৰীতে খেলপথাৰৰ কেউদিশে সুন্দৰ শ্বট খেলাৰ লগতে নিয়মিতভাৱে ষ্ট্ৰাইক ৰোটেট কৰি ইনিংছ আগুৱাই লৈ যায়

ভাৰতীয় মহিলা ক্ৰিকেট দলৰ অধিনায়ক হৰমনপ্ৰীত কৌৰে ইংলেণ্ডৰ বিৰুদ্ধে ঐতিহাসিক লৰ্ডছ ক্ৰিকেট খেলপথাৰত চলি থকা টেষ্ট মেচৰ প্ৰথম দিনাই এক অভূতপূৰ্ব ইতিহাস ৰচনা কৰিছে । ১০ জুলাইত খেলুৱৈগৰাকীয়ে খেলা ৫৮ ৰানৰ এক অনবদ্য ইনিংছে তেওঁক এনে এক অনন্য স্থানত বহুৱালে, যিটো ইয়াৰ পূৰ্বে ভাৰতৰ কোনো পুৰুষ বা মহিলা ক্ৰিকেটাৰে কৰিব পৰা নাছিল ।

৩৭ বছৰীয়া হৰমনপ্ৰীত কৌৰ এতিয়া লৰ্ডছৰ ঐতিহাসিক খেলপথাৰত ক্ৰিকেটৰ তিনিওটা ফৰ্মেট অৰ্থাৎ টেষ্ট, এদিনীয়া আৰু টি-২০ আন্তঃৰাষ্ট্ৰীয় মেচত অৰ্ধশতক অৰ্জন কৰা প্ৰথমগৰাকী ভাৰতীয় ক্ৰিকেটাৰ হৈ পৰিছে । আচৰিত কথাটো হ’ল যে ক্ৰিকেট জগতৰ মহানায়ক শচীন টেণ্ডুলকাৰ, বিৰাট কোহলী বা ৰোহিত শৰ্মাৰ দৰে তাৰকা ক্ৰিকেটাৰেও লৰ্ডছৰ মাটিত এই বিৰল কৃতিত্ব অৰ্জন কৰিবলৈ সক্ষম হোৱা নাই । হৰমনপ্ৰীতে ইয়াৰ পূৰ্বেও এই খেলপথাৰত এদিনীয়া আৰু টি-২০ মেচত ৫০ বা তাতকৈ অধিক ৰানৰ ইনিংছ খেলি থৈছিল ।

টছত হাৰি বেটিং বিপৰ্যয় ভাৰতৰ, মন্ধানা-জেমিমাৰ যুঁজ

মেচখনত টছত হাৰি প্ৰথমে বেটিং কৰিবলৈ নমা ভাৰতীয় দলৰ আৰম্ভণি একেবাৰেই সুখকৰ নাছিল । দলীয় স্ক’ৰ মাত্ৰ ৩৭ ৰান হওতেই ভাৰতে গুৰুত্বপূৰ্ণ দুটা উইকেট হেৰুৱায় । তাৰকা অপেনাৰ শ্বেফালী বাৰ্মা শূণ্য ৰানত আৰু য়স্তিকা ভাটিয়া মাত্ৰ ১২ ৰান কৰি পেভিলিয়নলৈ উভতি যায় ।

প্ৰাৰম্ভিক এই বিপৰ্যয়ৰ পিছত টীম ইণ্ডিয়াৰ ইনিংছ চম্ভালে স্মৃতি মন্ধানা আৰু জেমিমা ৰড্ৰিগেছে । দুয়োগৰাকী বেটাৰে ধৈৰ্যপূৰ্বক খেলি তৃতীয় উইকেটৰ বাবে ৬৪ ৰানৰ এক গুৰুত্বপূৰ্ণ অংশীদাৰিত্ব গঢ়ি তোলে । জেমিমাই ৫ টা চাৰিৰ সহায়ত ৩৮ টা বলত ৩৫ ৰান কৰে যদিও ইংলেণ্ডৰ বলাৰ ইছি ৱঙৰ চিকাৰ হয় তেওঁ ।

মন্ধানা-হৰমনপ্ৰীতৰ খোপনি আৰু ঐতিহাসিক মূহূৰ্ত

জেমিমাৰ বিদায়ৰ পিছত খেলপথাৰত প্ৰৱেশ ঘটে অধিনায়ক হৰমনপ্ৰীত কৌৰৰ । তেওঁ স্মৃতি মন্ধানাৰ সৈতে লগ হৈ ইংলেণ্ডৰ বলাৰসকলৰ ওপৰত ওলোটাই চাপ সৃষ্টি কৰে । চতুৰ্থ উইকেটৰ বাবে দুয়োৰে মাজত ৮৯ ৰানৰ এক গুৰুত্বপূৰ্ণ পাৰ্টনাৰশ্বিপ গঢ়ি উঠে । অধিনায়ক হৰমনপ্ৰীতে খেলপথাৰৰ কেউদিশে সুন্দৰ শ্বট খেলাৰ লগতে নিয়মিতভাৱে ষ্ট্ৰাইক ৰোটেট কৰি ইনিংছ আগুৱাই লৈ যায় ।

শতকৰ দিশে অগ্ৰসৰ হোৱা স্মৃতি মন্ধানা ৮৩ ৰানৰ এক দুৰ্দান্ত ইনিংছ খেলি ইছি ৱঙৰ বলত উইকেটৰ পিছফালে কেচ আউট হয় । মন্ধানা আউট হোৱাৰ পিছতে হৰমনপ্ৰীতে নিজৰ অৰ্ধশতক সম্পূৰ্ণ কৰাৰ লগে লগে লৰ্ডছৰ বুকুত ইতিহাস লিপিৱদ্ধ হয় । অৱশ্যে ৫৮ ৰান কৰাৰ পিছত ইংলেণ্ডৰ ডেৰ্বিউটেণ্ট স্পিনাৰ মেডেলিন ভিলিয়াৰ্ছে ভাৰতীয় অধিনায়কগৰাকীক বোল্ড কৰে ।

দীপ্তি শৰ্মাৰ সংগ্ৰাম আৰু ভাৰতৰ প্ৰথম ইনিংছ

হৰমনপ্ৰীত কৌৰ আউট হোৱাৰ পিছতেই ভাৰতীয় দলৰ বেটিং লাইন আপত হঠাতে খহনীয়া দেখা দিয়ে । ইংলেণ্ডৰ বলাৰসকলে দুৰ্দান্ত প্ৰত্যাৱৰ্তন কৰি ভাৰতৰ বাকী থকা সাতটা উইকেট মাত্ৰ ৮৫ ৰানৰ ভিতৰতে পতন ঘটাই ।

এনে এক কঠিন সময়ত তলৰ ক্ৰমৰ বেটাৰ দীপ্তি শৰ্মাই অকলে সংগ্ৰাম চলাই দলৰ স্ক’ৰ সন্মানজনক স্থিতিলৈ লৈ যায় । দীপ্তিয়ে ৫৭ ৰানৰ এক অতি গুৰুত্বপূৰ্ণ ইনিংছ খেলে আৰু স্নেহ ৰাণাৰ সৈতে মিলি নৱম উইকেটৰ বাবে ৪৫ ৰান যোগ কৰে । দীপ্তিৰ এই যুঁজাৰু ইনিংছৰ বলতেই ভাৰতে প্ৰথম ইনিংছত আটাইকেইটা উইকেট হেৰুৱাই ২৮৫ ৰান সংগ্ৰহ কৰিবলৈ সক্ষম হয় ।

লগতে পঢ়ক : অন্তিম টি-২০ মেচৰ পূৰ্বে হাহাকাৰ! ট্ৰেফিক জামত আৱদ্ধ টিম ইণ্ডিয়া