অষ্ট্ৰেলিয়া ভ্ৰমণত দ্বিতীয়বাৰৰ বাবে পৰাজয়ৰ সন্মুখীন হোৱা ভাৰতীয় দলৰ বিশ্ব টেষ্ট চেম্পিয়নশ্বিপ (ডব্লিউ টি চি)ৰ ফাইনেলত প্ৰৱেশৰ সম্ভাৱনাত আঘাত হানিছে । মেলবৰ্ণত চতুৰ্থখন টেষ্টত পৰাস্ত হোৱাৰ পিছত পাঁচখনীয়া খেলৰ বৰ্ডাৰ-গাভাস্কাৰ ট্ৰফীত ভাৰত ১-২ ব্যৱধানত পিছ পৰি আছে । যদিহে দলটো শৃংখলাত পৰাস্ত হ’ব নিবিচাৰে তেন্তে যিকোনো মূল্যৰ বিনিময়ত ৩ জানুৱাৰীৰ পৰা ছিডনীত অনুষ্ঠিত হ’বলগীয়া পঞ্চমখন খেলত জয়ী হ’ব লাগিব ।
জয়ৰ বাবে ৩৪০ ৰানৰ লক্ষ্য অনুসৰণ কৰি ভাৰতে দ্বিতীয় ইনিংছত ১৫৫ ৰানতে আটাইকেইটা উইকেট হেৰুৱাই । আজি ভাৰতীয় দলটোৱে লক্ষ্য লাভ কৰিছিল যদিও দলটোৱে তিনিটা অধিবেশনো খেলাত ব্যৰ্থ হয় আৰু আটাইকেইটা উইকেট হেৰুৱাই পৰাজয় স্বীকাৰ কৰে । এয়া ১৩ বছৰৰ পাছত মেলবৰ্ণত অনুষ্ঠিত টেষ্টত টিম ইণ্ডিয়াৰ পৰাজয় । ইয়াৰ পূৰ্বে ২০১১ চনত ভাৰতীয় দলটোৱে পৰাজয়ৰ সন্মুখীন হৈছিল । মেলবৰ্ণ ক্ৰিকেট খেলপথাৰ (এম চি জি) ভাৰতৰ বাবে এক অভেদ্য দুৰ্গ হৈ আছিল যদিও ৰোহিত শৰ্মাৰ নেতৃত্বাধীন দলটোৱে এই ধাৰা ভংগ কৰে ।
কিছুদিনৰ পৰা টেষ্টত ভাৰতৰ প্ৰদৰ্শন অত্যন্ত হতাশাজনক আৰু ইয়াৰ বহু কাৰণ আছে । অষ্ট্ৰেলিয়া ভ্ৰমণতো একেধৰণৰ প্ৰদৰ্শনেই দেখা গৈছে । বৰ্ডাৰ-গাভাস্কাৰ ট্ৰফীত ভাৰতে সংগ্ৰাম কৰিবলগীয়া হোৱাৰ কাৰণবোৰ কি কি জানো আহক…
দল হিচাপে খেলাত ব্যৰ্থ-
চলিত শৃংখলাত দল হিচাপে খেলাত ব্যৰ্থ হয় ভাৰতীয় দল । এতিয়ালৈকে চাৰিখন টেষ্ট মেচত প্ৰতিখন টেষ্টত মাত্ৰ এজন বা দুজন খেলুৱৈয়েহে ভাল প্ৰদৰ্শন কৰিছে । পাৰ্থত যশস্বী জয়ছোৱাল, কে এল ৰাহুল আৰু বিৰাট কোহলীয়ে ভাল প্ৰদৰ্শন কৰাৰ বিপৰীতে দ্বিতীয় টেষ্টত নীতিশ ৰেড্ডীয়ে কঠিন ইনিংছ খেলাৰ বিপৰীতে আন সকলো বেটছমেনে শোচনীয় প্ৰদৰ্শন আগবঢ়াই । ব্রিছবেনত খেলা তৃতীয়খন টেষ্টত কে এল ৰাহুল আৰু ৰবীন্দ্র জাডেজাই ভাৰতীয় ইনিংছ চম্ভালিছিল ৷ একে সময়তে মেলবৰ্ণত যশস্বী, নীতিশ আৰু ৱাশ্বিংটন সুন্দৰে প্ৰথম ইনিংছত ভাল প্ৰদৰ্শন কৰাৰ বিপৰীতে দ্বিতীয় ইনিংছত যশস্বী উজলি উঠে ।
আন বলাৰৰ পৰা সমৰ্থন নাপালে বুমৰাহ-
ভাৰতীয় দলৰ তাৰকা বেগী বলাৰ যশপ্ৰীত বুমৰাহ ভাৰতীয় দলৰ একমাত্ৰ খেলুৱৈ যিয়ে শৃংখলাৰ চাৰিওখন মেচতে প্ৰভাৱ বিস্তাৰ কৰে । শেহতীয়াকৈ ২০০ টা টেষ্ট উইকেট সম্পূৰ্ণ কৰা বুমৰাহৰ ফৰ্ম উৎকৃষ্ট । অৱশ্যে আটাইখেইখন টেষ্টতে বুমৰাহে দলৰ আন বলাৰসকলৰ পৰা প্ৰয়োজনীয় সমৰ্থন লাভ কৰাত ব্যৰ্থ হয় । মেলবৰ্ণ টেষ্টত মহম্মদ ছিৰাজে কিছু উন্নত প্ৰদৰ্শন আগবঢ়াইছিল যদিও ছিৰিজত ভাৰতীয় আন বলাৰৰ প্ৰদৰ্শন বুমৰাহৰ স্তৰত দেখিবলৈ পোৱা নগ’ল ।
ৰোহিত আৰু বিৰাটে বেটৰ পৰা অহা নাই ৰান-
দলটোৰ অভিজ্ঞ দুগৰাকী খেলুৱৈ অধিনায়ক ৰোহিত শৰ্মা আৰু বিৰাট কোহলীৰ পৰা যথেষ্ট আশা আছিল যদিও দুয়োৰে বেটৰ পৰা ৰান অহা নাই । কোহলীয়ে এটা শতকৰে শৃংখলা আৰম্ভ কৰিছিল আৰু তেওঁৰ ফৰ্ম অব্যাহত থাকিব যেন লাগিছিল । অষ্ট্ৰেলিয়াত কোহলীৰ অভিলেখ ভাল যদিও পাৰ্থ টেষ্টৰ পাছত তেওঁ ডাঙৰ ইনিংছ খেলিব পৰা নাই । একে সময়তে এইবাৰ অধিনায়ক ৰোহিতৰ ফৰ্ম বেয়া হোৱাৰ বাবে এতিয়ালৈকে সমগ্ৰ ছিৰিজত তেওঁক সংগ্ৰাম কৰা দেখা গৈছে । ৰোহিত আৰু কোহলীৰ সমৰ্থনৰ অভাৱো ভাৰতৰ দুৰ্বল প্ৰদৰ্শনৰ কাৰণ হৈ পৰিছে ।
পেণ্টৰ মেচ সজাগতাৰ অভাৱ, একেৰাহে বেয়া শ্বট খেলি আউট-
বিগত অষ্ট্ৰেলিয়া ভ্ৰমণত নায়ক হৈ পৰা ভাৰতীয় উইকেটকীপাৰ বেটছমেন ঋষভ পণ্টে এইবাৰ ভাল প্ৰদৰ্শন কৰিবলৈ সক্ষম হোৱা নাই । পণ্টক মেচ সজাগতাৰ অভাৱ আৰু প্ৰয়োজন অনুসৰি শ্বট নিৰ্বাচন কৰিবলৈ অক্ষম দৰে দেখা গৈছে । পণ্টৰ দুৰ্বল শ্বটক লৈ প্ৰশ্ন উত্থাপন কৰিছিল কিংবদন্তি ভাৰতীয় বেটছমেন সুনীল গাভাস্কাৰে আৰু প্ৰথম ইনিংছত আউট হোৱাৰ ধৰণত তেওঁ অতিশয় বিচলিত হৈছিল ।
ৰোহিতৰ কৌশলত ত্ৰুটি-
অধিনায়ক ৰোহিতৰ কৌশল তথা ৰণনীতিৰ অভাৱ দেখা গৈছে । মেঘময় পৰিস্থিতিত টছত জয়ী হোৱাৰ পিছত প্ৰথমে বলিং কৰাৰ সিদ্ধান্ত লোৱাই হওক বা দুজন স্পীনাৰ খেলাইও তেওঁলোকক কম বলিং কৰোৱাই হওক, এই ভ্ৰমণত ৰোহিতৰ অধিনায়কত্বক লৈ প্ৰশ্ন উত্থাপন হৈছে । চতুৰ্থ টেষ্টত ভাৰতে ৰবীন্দ্ৰ জাডেজা আৰু ৱাশ্বিংটন সুন্দৰৰ ৰূপত দুজন স্পীনাৰক দলত স্থান দিছিল যদিও তেওঁলোকক বেছি বল কৰিবলৈ দিয়া নাছিল ।
