প্লাণ্টটো সম্পূৰ্ণৰূপে জলমগ্ন হোৱাৰ বাবে তাত মজুত থকা প্ৰায় ৩,০০০ এলপিজি চিলিণ্ডাৰ পাতালগংগা নদীৰ তীব্ৰ সোঁতত উটি গৈছে

মহাৰাষ্ট্ৰৰ ৰায়গড় জিলাত ধাৰাসাৰ বৰষুণৰ ফলত সৃষ্টি হোৱা বান পৰিস্থিতিয়ে এতিয়া এক ভয়ানক ৰূপ ধাৰণ কৰিছে । জিলাখনত অৱস্থিত হিন্দুস্তান পেট্ৰ’লিয়াম কৰ্পৰেচন লিমিটেড (HPCL)ৰ পাতালগংগা এলপিজি বটলিং প্লাণ্টত পানী সোমোৱাত এক অভাৱনীয় ঘটনা সংঘটিত হৈছে । প্লাণ্টটো সম্পূৰ্ণৰূপে জলমগ্ন হোৱাৰ বাবে তাত মজুত থকা প্ৰায় ৩,০০০ এলপিজি চিলিণ্ডাৰ পাতালগংগা নদীৰ তীব্ৰ সোঁতত উটি গৈছে । এই চিলিণ্ডাৰসমূহৰ ভিতৰত গেছ ভৰ্তি আৰু খালী- দুয়োবিধ চিলিণ্ডাৰেই আছিল বুলি জানিব পৰা গৈছে ।

নদীৰ বুকুত হাজাৰ হাজাৰ গেছ চিলিণ্ডাৰ উটি যোৱা এই দৃশ্যই এতিয়া সমগ্ৰ অঞ্চলটোতে তীব্ৰ আতংকৰ সৃষ্টি কৰিছে । পৰিস্থিতিৰ প্ৰতি লক্ষ্য ৰাখি স্থানীয় প্ৰশাসনে নদীৰ পাৰৰ বাসিন্দাসকলৰ বাবে এক জৰুৰী সতৰ্কবাণী জাৰি কৰিছে ।

জিলাধিপতিৰ জৰুৰী আহ্বান: চিলিণ্ডাৰ স্পৰ্শ নকৰিব!

ৰায়গড় জিলাৰ জিলাধিপতিয়ে স্থানীয় ৰাইজক উদ্দেশ্যি এক বিশেষ অনুৰোধ জনাইছে । তেওঁ কয় যে নদীৰ পাৰত বা সুঁতিত উটি অহা কোনো চিলিণ্ডাৰেই যেন কোনো লোকে স্পৰ্শ নকৰে, তুলি নলয় অথবা নিজৰ ঘৰলৈ লৈ নাযায় ।

ছচিয়েল মিডিয়াত তীব্ৰ প্ৰতিক্ৰিয়া: ‘পুষ্পা ৩.০’ৰ সৈতে তুলনা

এই চাঞ্চল্যকৰ ঘটনাৰ ভিডিঅ’ এতিয়া ছচিয়েল মিডিয়াত বহুলভাৱে ভাইৰেল হৈ পৰিছে । ‘এক্স’ (পূৰ্বৰ টুইটাৰ) মাধ্যমৰ এজন ব্যৱহাৰকাৰীয়ে নদীৰ পানীত চিলিণ্ডাৰ উটি যোৱাৰ ভিডিঅ’ শ্বেয়াৰ কৰি ইয়াক চলচ্চিত্ৰ ‘পুষ্পা’ৰ দৃশ্যৰ সৈতে তুলনা কৰিছে । তেওঁ লিখিছে- “এয়া একেবাৰে ‘পুষ্পা ৩.০’ৰ দৰে দৃশ্য । মহাৰাষ্ট্ৰৰ বানপানীৰ পানী গেছ চিলিণ্ডাৰৰ গুডাম পালেগৈ । কেৱল পাৰ্থক্য ইয়াতেই যে ইয়াত চন্দনে কাঠ নহয়, বৰঞ্চ এলপিজি চিলিণ্ডাৰহে উটি গৈছে ।”

কেৱল ধেমালি বা কৌতূকতে ক্ষান্ত থকা নাই নেটিজেনসকল । বহুতে এই ঘটনাক লৈ চৰকাৰী ব্যৱস্থা আৰু সুৰক্ষা পৰিকল্পনাক তীব্ৰ সমালোচনা কৰিছে । বৰ্তমান প্ৰশাসন আৰু HPCL কৰ্তৃপক্ষই যুদ্ধকালীন তৎপৰতাৰে নদীৰ বুকুত উটি যোৱা চিলিণ্ডাৰসমূহ উদ্ধাৰ কৰাৰ বাবে অভিযান আৰম্ভ কৰিছে । বান পৰিস্থিতি সম্পূৰ্ণ নিয়ন্ত্ৰণলৈ নোযোৱা পৰ্যন্ত নদীৰ কাষৰীয়া অঞ্চলৰ লোকসকলক সজাগ আৰু সতৰ্ক হৈ থাকিবলৈ নিৰ্দেশ দিয়া হৈছে ।

লগতে পঢ়ক : প্ৰকৃতিৰ সংহাৰী ৰূপ! ধাৰাসাৰ বৰষুণ আৰু ভূমিস্খলনত স্তব্ধ জনজীৱন

এজন প্ৰাক্তন থানা প্ৰভাৰীসহ ৯ গৰাকী আৰক্ষী কৰ্মীক আদালতে যাৱজ্জীৱন কাৰাদণ্ডৰ শাস্তি বিহিছে

মহাৰাষ্ট্ৰৰ ৱাশ্বিম জিলা আদালতৰ এক ঐতিহাসিক ৰায় । আৰক্ষীৰ জিম্মাত হোৱা এক নিৰ্মম হত্যাকাণ্ডৰ গোচৰত আদালতৰ মজিয়াত দোষী সাব্যস্ত হ’ল খাকী পোছাকধাৰী । এজন প্ৰাক্তন থানা প্ৰভাৰীসহ ৯ গৰাকী আৰক্ষী কৰ্মীক আদালতে যাৱজ্জীৱন কাৰাদণ্ডৰ শাস্তি বিহিছে । ১৫ বছৰীয়া এক দীৰ্ঘদিনীয়া আইনী যুঁজৰ অন্তত অৱশেষত ন্যায় পালে এজন দুৰ্ভগীয়া মৃত যুৱকৰ বৃদ্ধ পিতৃ-মাতৃয়ে ।

নিশা ৩ বজাত ঘৰৰ পৰা উঠাই আনিছিল আৰক্ষীয়ে

এই জঘন্য ঘটনাটো সংঘটিত হৈছিল আজিপৰা প্ৰায় ১৫ বছৰ পূৰ্বে, ১০ মে’ত মহাৰাষ্ট্ৰৰ ৰিচোড আৰক্ষী থানাত । আৰক্ষীয়ে নিশা প্ৰায় ৩ বজাত পাৰ্ধী সম্প্ৰদায়ৰ বেগ্যা পাৱাৰ নামৰ এজন যুৱকক কেৱল সোধা-পোছা কৰাৰ নামত তেওঁৰ ঘৰৰ পৰা উঠাই আনিছিল । কিন্তু থানালৈ অনাৰ পিছতেই আৰক্ষীৰ লোকসকলে যুৱকজনৰ ওপৰত চলাইছিল অমানুষিক অত্যাচাৰ । জিম্মাতে নিৰ্মম প্ৰহাৰৰ ফলত থিতাতে মৃত্যু হৈছিল নিৰ্দোষ যুৱকজনৰ । জানিব পৰা মতে, মৃত যুৱকজনৰ বিৰুদ্ধে পূৰ্বৰ কোনো অপৰাধমূলক ৰেকৰ্ড নাছিল আৰু ঘটনাৰ মাত্ৰ এবছৰ পূৰ্বেহে তেওঁৰ বিবাহ সম্পন্ন হৈছিল ।

এজাহাৰ ল’বলৈ অমান্তি হৈছিল আৰক্ষী

পুত্ৰৰ আকস্মিক মৃত্যুৰ পিছত যেতিয়া বৃদ্ধ পিতৃ-মাতৃয়ে ন্যায় বিচাৰি ৰিচোড আৰক্ষী থানাত উপস্থিত হৈছিল, তেতিয়া তেওঁলোকক সহযোগিতা কৰাৰ বিপৰীতে খেদিহে পঠিওৱা হৈছিল । আনকি যিগৰাকী থানা প্ৰভাৰীৰ নাম এজাহাৰত আছিল, তেওঁ নিজেই গোচৰ ৰুজু কৰিবলৈ স্পষ্টভাৱে অস্বীকাৰ কৰিছিল । যুৱকজন পাৰ্ধী সম্প্ৰদায়ৰ হোৱাৰ বাবে এই ঘটনাৰ বিৰুদ্ধে সমগ্ৰ অঞ্চলটোত তীব্ৰ প্ৰতিবাদ আৰু গণ-বিক্ষোভ গঢ়ি উঠিছিল । পৰৱৰ্তী সময়ত মৰণোত্তৰ আৰু চিকিৎসা পৰীক্ষাত প্ৰকাশ পাইছিল যে আৰক্ষীৰ মাৰধৰৰ ফলত যুৱকজনৰ শৰীৰৰ কেইবাডালো গুৰুত্বপূৰ্ণ হাড় ভাঙি গৈছিল ।

চিআইডি-ৰ সূক্ষ্ম তদন্ত আৰু চাৰ্জশ্বীট

গোচৰটোৰ গুৰুত্ব আৰু সংবেদনশীলতা লক্ষ্য কৰি ইয়াৰ তদন্তৰ দায়িত্ব চিআইডি বিষয়া আনৱাৰ শ্বেখক অৰ্পণ কৰা হয় । চিআইডি বিষয়াগৰাকীয়ে অত্যন্ত সততা আৰু সূক্ষ্মতাৰে ঘটনাৰ প্ৰতিটো দিশ পৰীক্ষা কৰি আদালতত এক শক্তিশালী অভিযোগনামা দাখিল কৰে । এই চাৰ্জশ্বীটত বেগ্যা পাৱাৰৰ ওপৰত আৰক্ষী থানাত কেনেকৈ আৰু কিমান নৃশংসভাৱে থাৰ্ড ডিগ্ৰী প্ৰয়োগ কৰা হৈছিল, তাৰ পুংখানুপুংখ বিৱৰণ দাঙি ধৰা হৈছিল ।

১৫ বছৰৰ অন্তত কাৰাগাৰলৈ খাকী পোছাকধাৰী গুণ্ডা

ৱাশ্বিম জিলা সত্ৰ আদালতৰ ন্যায়াধীশ ঝাপাটেই সমগ্ৰ সাক্ষ্য-প্ৰমাণৰ ভিত্তিত ঐতিহাসিক ৰায়দান কৰি তদানীন্তন ৰিচোড থানাৰ প্ৰভাৰী মহাদেৱ মাণিক ধাণ্ডে আৰু আন ৮ গৰাকী আৰক্ষী কৰ্মীক দোষী সাব্যস্ত কৰে । উল্লেখ্য যে, এই ৯ জন অভিযুক্তৰ ভিতৰত দুজন আৰক্ষী কৰ্মীয়ে ইতিমধ্যে চাকৰিৰ পৰা অৱসৰো গ্ৰহণ কৰিছে । আদালতৰ ৰায়ৰ পিছতেই সকলোকে প্ৰথমে ৱাশ্বিম কাৰাগাৰ আৰু পৰৱৰ্তী সময়ত অমৰাৱতী কেন্দ্ৰীয় কাৰাগাৰলৈ স্থানান্তৰ কৰাৰ ব্যৱস্থা কৰা হৈছে ।

ইফালে আদালতৰ এই ৰায়দানৰ পিছত  কান্দি কান্দি সন্তোষ প্ৰকাশ কৰে যুৱকগৰাকীৰ বৃদ্ধ পিতৃ-মাতৃয়ে ।

লগতে পঢ়ক : স্কুল বাছৰ ওপৰত গছ বাগৰি ছাত্ৰৰ কৰুণ ঘটনা, হাহাকাৰ পৰিস্থিতি

বিয়াৰ নিমন্ত্ৰণ পত্ৰত কিয় ছপা কৰিব লাগিব দৰা-কইনাৰ জন্ম তাৰিখ? জানক এই গুৰুত্বপূৰ্ণ খবৰটো-

বাল্য বিবাহৰ দৰে সামাজিক ব্যাধিক সমূলঞ্চে নিৰ্মূল কৰাৰ লক্ষ্যৰে মহাৰাষ্ট্ৰ চৰকাৰে এক বিশেষ পদক্ষেপ গ্ৰহণৰ পৰিকল্পনা কৰিছে । ৰাজ্যখনত এতিয়াৰে পৰা বিবাহৰ নিমন্ত্ৰণী পত্ৰত দৰা আৰু কইনাৰ জন্ম তাৰিখ ছপা কৰাটো বাধ্যতামূলক কৰাৰ কথা বিবেচনা কৰিছে চৰকাৰে । ৰাজ্যিক শিশু অধিকাৰ আয়োগৰ পৰামৰ্শ মৰ্মে এই প্ৰস্তাৱটো চৰকাৰে পৰীক্ষা-নিৰীক্ষা কৰি আছে ।

চৰকাৰৰ পৰিকল্পনা আৰু প্ৰস্তুতি

মহিলা আৰু শিশু কল্যাণ মন্ত্ৰী অদিতি টাটকাৰে বিধানসভাত এই কথা সদৰি কৰে । তেওঁ জনোৱা মতে, এই প্ৰস্তাৱটো কাৰ্যকৰী কৰাৰ পূৰ্বে গ্ৰামোন্নয়ন বিভাগ আৰু আইন বিভাগৰ সৈতে উচ্চস্তৰীয় পৰামৰ্শ চলাই থকা হৈছে । ইতিমধ্যে ৰাজস্থানত এই ব্যৱস্থা কাৰ্যকৰী হৈ থকাৰ পৰিপ্ৰেক্ষিতত মহাৰাষ্ট্ৰ চৰকাৰে সেই সন্দৰ্ভত তথ্য সংগ্ৰহ কৰিছে । প্ৰয়োজন হ’লে বৰ্তমানৰ আইনী কাঠামোত সংশোধনী অনাৰ কথাও মন্ত্ৰীগৰাকীয়ে প্ৰকাশ কৰিছে ।

সক্ৰিয় হৈছে প্ৰশাসন

বাল্য বিবাহ নিষিদ্ধকৰণ আইন, ২০০৬-ৰ অধীনত ৰাজ্য চৰকাৰে বলবৎকৰণ প্ৰক্ৰিয়া অধিক শক্তিশালী কৰিছে । জিলা আৰু গাওঁ পৰ্যায়ৰ শিশু সুৰক্ষা সমিতিৰ লগতে অংগনৱাড়ী কৰ্মীসকলে বাল্য বিবাহ ৰোধ কৰিবলৈ দিনে-নিশাই কাম কৰি আছে । ফলস্বৰূপে, বিগত কেইবছৰমানত বাল্য বিবাহ প্ৰতিৰোধৰ হাৰ দ্ৰুতগতিত বৃদ্ধি পাইছে । চৰকাৰী তথ্য অনুসৰি, ২০২৪-২৫ বৰ্ষত ১,৪৯৫টা বাল্য বিবাহ বন্ধ কৰিবলৈ সক্ষম হৈছে প্ৰশাসনে ।

লক্ষ্য: ১০% ৰ তললৈ বাল্য বিবাহৰ হাৰ

বৰ্তমান মহাৰাষ্ট্ৰত বাল্য বিবাহৰ হাৰ ১৯.৬%, যিটো ৰাষ্ট্ৰীয় গড় ২০.১% তকৈ কিছু কম । অহা পাঁচ বছৰৰ ভিতৰত এই হাৰ ১০% ৰ তললৈ নমাই অনাটোৱেই চৰকাৰৰ মূল লক্ষ্য ।

লগতে পঢ়ক : ভাৰতলৈ আহিব ৰাষ্ট্ৰপতি ড’নাল্ড ট্ৰাম্প; আমেৰিকাৰ বৈদেশিক মন্ত্ৰী ৰুবিঅ’ৰ ঘোষণা