মহাৰাষ্ট্ৰৰ ৰাজনীতিয়ে এক বৃৎহ পৰিৱৰ্তনৰ দিশে আগবাঢ়িছে । অজিত পাৱাৰৰ মৃত্যুৰ পিছতে এতিয়া তেওঁৰ উত্তৰাধিকাৰক লৈ চৰ্চা তীব্ৰতৰ হৈ পৰিছে ।

বাৰামাটি বিমান দুৰ্ঘটনাত মহাৰাষ্ট্ৰৰ উপ-মুখ্যমন্ত্ৰী তথা এন চি পি নেতা অজিত পাৱাৰৰ মৃত্যুত মহাৰাষ্ট্ৰৰ ৰাজনীতি বৃৎহ পৰিৱৰ্তনৰ দিশে আগবাঢ়িছে । ২৮ জানুৱাৰীত সংঘটিত হোৱা দুৰ্ঘটনাৰ পিছত চৰকাৰী আৰু সাংগঠনিক দুয়োটা পৰ্যায়তে ডাঙৰ ডাঙৰ সিদ্ধান্তৰ সন্দৰ্ভত আলোচনা আৰম্ভ হৈছে । ইয়াৰ ভিতৰত আটাইতকৈ ডাঙৰ প্ৰশ্নটো হ’ল এন চি পিৰ ভৱিষ্যতৰ দিশ আৰু মহাযুতি চৰকাৰৰ পৰৱৰ্তী উপ-মুখ্যমন্ত্ৰী কোন হ’ব ।

অজিত পাৱাৰৰ মৃত্যুৰ পিছত এন চি পিৰ ভিতৰত নতুন নেতৃত্বৰ ছবিৰ উত্থাপন ঘটিছে । জানিব পৰা মতে দলটোৰ নেতৃত্ব এতিয়া পৰিয়ালৰ দুজন সদস্যৰ ওপৰত নিৰ্ভৰশীল । অজিত পাৱাৰৰ পত্নী সুনেত্ৰা পাৱাৰক উপ-মুখ্যমন্ত্ৰীৰ পদৰ বাবে বিবেচনা কৰা হৈছে । ডাঙৰ পুত্ৰ পাৰ্থ পাৱাৰক সংসদীয় দায়িত্ব দি ৰাজ্যসভালৈ পঠোৱাৰ কথাও চৰ্চা চলিছে । এন চি পি মহাযুতি চৰকাৰতে থাকিব বুলিও অনুমান কৰা হৈছে । এই ইংগিতসমূহে স্পষ্ট কৰি দিছে যে এন চি পিৰ দুয়োটা ফৈদৰ একত্ৰীকৰণ সন্দৰ্ভত আলোচনা এতিয়াৰ বাবে স্থগিত ৰখা হৈছে ।

সুনেত্ৰা পাৱাৰ বৰ্তমান ৰাজ্যসভাৰ সাংসদ আৰু ২০২৪ চনত তেওঁ সক্ৰিয় নিৰ্বাচনী ৰাজনীতিত প্ৰৱেশ কৰিছিল । তেওঁ যদি উপ-মুখ্যমন্ত্ৰী হয় তেন্তে মহাৰাষ্ট্ৰত এই পদত অধিষ্ঠিত হোৱা প্ৰথমগৰাকী মহিলা হ’ব । ইফালে অজিত পাৱাৰৰ জ্যেষ্ঠ পুত্ৰ পাৰ্থ পাৱাৰক ৰাজ্যসভাৰ বাবে বিবেচনা কৰা হৈছে । পাৰ্থ পাৱাৰে ২০১৯ চনত মাৱল লোকসভাৰ আসনত প্ৰতিদ্বন্দ্বিতা কৰিছিল, কিন্তু পৰাস্ত হৈছিল । অজিত পাৱাৰৰ মৃত্যুৰ পাছত সাংগঠনিক আৰু ৰাজনৈতিক দুয়োটা স্তৰৰ দায়িত্ব এতিয়া সুনেত্ৰা আৰু পাৰ্থৰ ওপৰত নিৰ্ভৰ কৰিছে । কোৱা হৈছে যে চৰকাৰৰ ভিতৰত ক্ষমতাৰ ভাৰসাম্য আৰু আগন্তুক ৰাজনৈতিক কৌশললৈ লক্ষ্য ৰাখি এই সিদ্ধান্ত লোৱা হৈছে ।

ইফালে শনিবাৰে ​​দুপৰীয়া ২ বজাত এন চি পিৰ বিধায়িনী দলৰ বৈঠক আহ্বান কৰা হৈছে । এই বৈঠকখন অতি গুৰুত্বপূৰ্ণ বুলি বিবেচিত হৈছে, কিয়নো ইয়াত নেতৃত্ব আৰু ভৱিষ্যতৰ ৰাজনৈতিক কৌশলৰ বিষয়ে আনুষ্ঠানিকভাৱে আলোচনা হোৱাৰ সম্ভাৱনা আছে ।

লগতে পঢ়ক : ‘অসমৰ পৰা এজন এজনকৈ বিদশী বহিষ্কাৰ কৰা হ’ব’; ডিব্ৰুগড়ৰ পৰা অবৈধ বিদেশীক হুংকাৰ গৃহমন্ত্ৰী অমিত শ্বাহৰ

বিমান দুৰ্ঘটনাত অজিত পাৱাৰৰ মৃত্যুত মহাৰাষ্ট্ৰৰ লগতে সমগ্ৰ দেশে শোক প্ৰকাশ কৰাৰ সময়তে এই ঘটনাক লৈ ৰাজনীতিও তীব্ৰতৰ হৈ পৰিছে । কেইবাজনো বিৰোধী নেতাই বিমান দুৰ্ঘটনাৰ তদন্তৰ দাবী জনাইছে ।

বিমান দুৰ্ঘটনাত মহাৰাষ্ট্ৰৰ উপ-মুখ্যমন্ত্ৰী অজিত পাৱাৰৰ মৃত্যুত মহাৰাষ্ট্ৰৰ লগতে সমগ্ৰ দেশে শোক প্ৰকাশ কৰাৰ সময়তে এই ঘটনাক লৈ ৰাজনীতিও তীব্ৰতৰ হৈ পৰিছে । কেইবাজনো বিৰোধী নেতাই এই শোকাৱহ বিমান দুৰ্ঘটনাক লৈ উদ্বেগ প্ৰকাশ কৰি তদন্তৰ দাবী জনাইছে । পশ্চিম বংগৰ মুখ্যমন্ত্ৰী মমতা বেনাৰ্জীয়ে বিষয়টোৰ উচ্চ পৰ্যায়ৰ তদন্তৰ দাবী জনাইছে । একেদৰে জম্মু-কাশ্মীৰৰ মুখ্যমন্ত্ৰী ওমৰ আব্দুল্লা, আপৰ সাংসদ সঞ্জয় সিং আৰু প্ৰাক্তন মুখ্যমন্ত্ৰী তথা সমাজবাদী পাৰ্টিৰ মুৰব্বী অখিলেশ যাদৱেও মমতাৰ সুৰত সুৰ মিলাই এই ঘটনাৰ তদন্তৰ দাবী কৰিছে ।

মমতা বেনাৰ্জীৰ এই মন্তব্যৰ প্ৰত্যুত্তৰ জনাই বিজেপিৰ সাংসদ জগন্নাথ সৰকাৰে কয় যে, “এই দুৰ্ঘটনাটো মৰ্মান্তিক । দেশৰ বাবে ই এক বৃহৎ ক্ষতি, গতিকে ই এক চিন্তাৰ বিষয় । ইয়াৰ তদন্তত কোনো সমস্যা নাই । এই দুৰ্ঘটনা সন্দৰ্ভত আমি বেছি মন্তব্য কৰা উচিত নহয় ।”

মমতা বেনাৰ্জীক তীক্ষ্ণ সমালোচনা ফাড়নৱীছৰ-

মমতা বেনাৰ্জীৰ মন্তব্য সন্দৰ্ভত মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফাড়নৱীছে কয়, “এয়া অতি দুখজনক । জ্যেষ্ঠ নেতা শৰদ পাৱাৰে নিজেই স্পষ্টকৈ উল্লেখ কৰিছে যে এটা দুৰ্ঘটনা আৰু এটা কৰুণ মৃত্যুক ৰাজনীতিকৰণ কৰা উচিত নহয় । মই গভীৰ দুখ প্ৰকাশ কৰিছো যে আমি এনে এটা পৰ্যায়ত উপনীত হ’লোঁ য’ত কাৰোবাৰ মৃত্যুক লৈয়ো ইমান লেতেৰা আৰু সস্তীয়া ৰাজনীতি চলি আছে । মই গভীৰ দুখ পাইছো যে, মমতা দিদিয়ে ৰাজনীতিৰ ইমান তলৰ পৰ্যায়লৈ নামি গৈছে । তেওঁ এনে মন্তব্য কৰা উচিত নাছিল । মহাৰাষ্ট্ৰৰ এগৰাকী অতি জনপ্ৰিয় আৰু মানৱদৰদী ৰাজনৈতিক নেতাৰ নেতাৰ মৃত্যুত এনে ৰাজনীতি কৰাটো ভুল কথা ।“

ৰাজনৈতিক মন্তব্য কৰাটো দুৰ্ভাগ্যজনক : শিন্দে

মহাৰাষ্ট্ৰৰ উপ-মুখ্যমন্ত্ৰী একনাথ শিন্দেই এই কৰুণ বিমান দুৰ্ঘটনা সন্দৰ্ভত কয় যে, “যেতিয়া মই এই দুৰ্ভাগ্যজনক দুৰ্ঘটনাৰ বিষয়ে জানিব পাৰিলোঁ, তেতিয়া বিশ্বাস কৰিব পৰা নাছিলো । এজন দয়ালু, স্পষ্টবাদী আৰু কঠোৰ পৰিশ্ৰমী নেতা এতিয়া আমাৰ লগত নাই । আমি এটা দল হিচাপে কাম কৰি আছিলো । এই ঘটনাৰ বিষয়ে কোনো ৰাজনৈতিক মন্তব্য কৰাটো দুৰ্ভাগ্যজনক ।”

শিৱসেনা নেতাৰ সমালোচনা-

মমতা বেনাৰ্জীৰ বক্তব্যক লৈ শিৱসেনাৰ নেত্ৰী চাইনা এন চিয়ে কয় যে কাৰোবাৰ মৃত্যুত ৰাজনীতি খেলিব নালাগে । তদন্তৰ প্ৰয়োজন, কিন্তু তেওঁ যি ষড়যন্ত্ৰ ৰচনা কৰিছে সেয়া কেৱল তেওঁৰ নিম্নস্তৰৰ ৰাজনীতি । সমগ্ৰ ৰাজ্যই অজিত দাদাক শ্ৰদ্ধাঞ্জলি জনাইছে ।

লগতে পঢ়ক : “এয়া দুৰ্ঘটনা, ষড়যন্ত্ৰ নহয়,কোনো ৰাজনীতি হ’ব নালাগে”;অজিত পাৱাৰৰ মৃত্যুক লৈ শাৰদ পাৱাৰৰ প্ৰথম প্ৰতিক্ৰিয়া