মৃতদেহৰ সৈতে বিবাহপাশত আৱদ্ধ এগৰাকী যুৱতী; প্ৰকাশ কৰিলে হৃদয়বিদাৰক কাহিনী
মৃতদেহৰ সৈতে বিবাহপাশত আৱদ্ধ যুৱতী
শেহতীয়াকৈ পোহৰলৈ অহা এক অপৰাধৰ ঘটনাই সমগ্ৰ দেশকে জোঁকাৰি গৈছে । মহাৰাষ্ট্ৰত সংঘটিত হোৱা এই ঘটনাই স্তম্ভিত কৰি তুলিছে সমগ্ৰ দেশক । হৃদয়বিদাৰক এই প্ৰেম কাহিনীয়ে চকু সেমেকাই তুলিছে দেশবাসীৰ ।
মহাৰাষ্ট্ৰৰ নন্দদত পোহৰলৈ আহিছে এই হৃদয় বিদাৰক ঘটনা । জানিব পৰা মতে ২১ বছৰীয়া এগৰাকী যুৱতীয়ে দাবী কৰিছে যে তেওঁৰ প্ৰেমিক সক্ষম থাট্টেক নিম্নবৰ্ণৰ হোৱাৰ বাবেই তেওঁৰ পৰিয়ালে হত্যা কৰিছিল । ইয়াৰ পিছতে যুৱতীগৰাকীয়ে প্ৰেমিকৰ তেজ শিৰত সানি তেওঁ সমগ্ৰ জীৱন সক্ষমৰ পৰিয়ালৰ লগত থাকিব বুলি ঘোষণা কৰে ।
যুৱতীগৰাকীয়ে কয় যে তেওঁৰ পৰিয়ালে এই সম্পৰ্ক মানি লোৱা নাছিল । প্ৰেমিক সক্ষম আৰু যুৱতীগৰাকী তিনিবছৰ প্ৰেমৰ সম্পৰ্কত থকাৰ পিছত বিবাহপাশত আৱদ্ধ হ’বলৈ আগবাঢ়িছিল । কিন্তু যুৱতীগৰাকীৰ পিতৃ আৰু ভাতৃদ্বয়ে এই সম্পৰ্কৰ বিৰোধিতা কৰিছিল । যুৱতীগৰাকীয়ে কয় যে সক্ষমক হত্যা কৰাৰ দিনা তেওঁৰ ভাতৃয়ে তেওঁক পুৱা থানালৈ লৈ গৈছিল যাতে সক্ষমৰ বিৰুদ্ধে ভুৱা গোচৰ ৰুজু কৰিব পৰা যায় । কিন্তু যুৱতীগৰাকীয়ে তেনে কৰিবলৈ অস্বীকাৰ কৰিছিল ।
লগতে যুৱতীগৰাকীয়ে দাবী কৰে যে আৰক্ষীয়ে তেওঁৰ ভাতৃক কৈছিল যে যদি ইমান সমস্যা হৈছে তেন্তে প্ৰথমে তেওঁক হত্যা কৰি আহক । ইয়াৰ পিছত তেওঁৰ ভাতৃয়ে ইয়াক প্ৰত্যাহ্বান বুলি গণ্য কৰে । সন্ধিয়া প্ৰায় ৫:৩০ বজাত যুৱতীগৰাকীৰ পৰিয়ালৰ লোকে অঞ্চলটোত সক্ষমক প্ৰত্যক্ষ কৰি আক্ৰমণ কৰে ।
অভিযোগ অনুসৰি প্ৰথমে গুলীচালনা কৰি তাৰ পিছত ডাঙৰ শিলেৰে আঘাত কৰি যুৱকজনক আক্ৰমণ কৰা হয় । ফলত থিতাতে যুৱকজনৰ মৃত্যু হয় । গোচৰৰ গুৰুত্ব বিবেচনা কৰি আৰক্ষীয়ে ১২ ঘণ্টাৰ ভিতৰতে যুৱতীগৰাকীৰ পিতৃ, দুই ভাতৃকে ধৰি ৮ জন লোকক গ্ৰেপ্তাৰ কৰে ।
যুৱতীগৰাকীয়ে কয় যে তেওঁৰ পৰিয়ালে সদায়ে তেওঁৰ প্ৰেমিক সক্ষমক ভাবুকি দিছিল আৰু তেওঁৰ জাতিক লৈ অপমান কৰিছিল । তেওঁ অভিযোগ কৰে যে তেওঁৰ পৰিয়ালৰ লোকে সক্ষমক হত্যা কৰাৰ সুযোগ বিচাৰি আছিল । ইফালে এই ঘটনাৰ পিছতে পিতৃ-মাতৃ আৰু ভাতৃৰ মৃত্যুদণ্ডৰ দাবী কৰিছে যুৱতীগৰাকীয়ে ।
লগতে পঢ়ক : দিল্লী আৰক্ষীৰ বিশেষ কোষৰ জালত ৩ সন্ত্ৰাসবাদী