লণ্ডনত অনুষ্ঠিত হোৱা ফিটনেছ টেষ্টত উত্তীৰ্ণ বিৰাট কোহলী
ভাৰতৰ কিংবদন্তি খেলুৱৈ বিৰাট কোহলীয়ে ফিটনেছ টেষ্টত উত্তীৰ্ণ হ’লেও কোহলীৰ ফিটনেছ টেষ্ট আন খেলুৱৈৰ দৰে বেংগালুৰুত নহয় লণ্ডনতহে কৰা হৈছিল।
বিৰাট কোহলীয়ে ফিটনেছ টেষ্টত উত্তীৰ্ণ হ’লেও এতিয়া লণ্ডনত ফিটনেছ টেষ্ট দিয়াৰ সন্দৰ্ভত বিতৰ্কৰ সৃষ্টি হৈছে। য’ত ভাৰতীয় খেলুৱৈসকলৰ অধিকাংশই ফিটনেছ টেষ্টৰ বাবে বেংগালুৰুৰ নেচনেল ক্ৰিকেট একাডেমী (এনচিএ)লৈ গৈছিল আনহাতে বিৰাট কোহলী আছিল একমাত্ৰ খেলুৱৈ যিয়ে লণ্ডনত এই পৰীক্ষাত অংশগ্ৰহণ কৰিছিল, য’ত তেওঁ বৰ্তমান পৰিয়ালৰ সৈতে বসবাস কৰি আছে।
কোহলীয়ে ভাৰতৰ ক্ৰিকেট নিয়ন্ত্ৰণ ব’ৰ্ড (বিচিচিআই)ৰ পৰা বিশেষ অনুমতি লৈ যুক্তৰাজ্যত নিজৰ ফিটনেছ টেষ্টত অৱতীৰ্ণ হৈছিল, আনহাতে দলটোৰ আন বেছিভাগ খেলুৱৈয়ে ফিটনেছ টেষ্টৰ বাবে বেংগালুৰুত উপস্থিত হৈছিল।
যদিও কোহলীয়ে পৰীক্ষাত উত্তীৰ্ণ হৈছিল, তথাপিও লণ্ডনত অনুষ্ঠিত হ’বলগীয়া বাধ্যতামূলক ফিটনেছ পৰীক্ষাৰ বাবে তেওঁক বিশেষ ৰেহাই দিয়া উচিত নেকি সেই লৈ বিতৰ্ক আৰম্ভ হৈছে।
আচলতে বিৰাট আছিল একমাত্ৰ খেলুৱৈ যাৰ পৰীক্ষা দেশৰ বাহিৰত কৰা হৈছিল। আন কোনো খেলুৱৈয়ে এনে ৰেহাই বিচৰা নাছিল।
যেতিয়া বিচিচিআইৰ এজন বিষয়াক বিৰাটৰ বিষয়ৰ সন্দৰ্ভত সোধা হৈছিল, তেওঁ ক’লে যে কোহলীয়ে নিশ্চয় বিচিচিআইক এনে ৰেহাইৰ বাবে অনুৰোধ কৰিছিল আৰু অনুমতি বিচাৰিছিল।
আনহাতে প্ৰতিবেদনত উল্লেখ কৰা হৈছিল যে এতিয়াও জানিব পৰা হোৱা নাই যে একেধৰণৰ ৰেহাই বিচৰা আন কোনো খেলুৱৈক এনে ৰেহাই দিব পাৰি নেকি।তাকে লৈ এতিয়া বিতৰ্ক আৰম্ভ হৈছে।
লগতে পঢ়ক: হকী এছিয়া কাপ ২০২৫ : কাজাখস্তানক পৰাস্ত কৰিলে ভাৰতীয় দলে, ৩ গৰাকী খেলুৱৈৰ হেট্ৰিক
