চেম্পিয়নছ ট্ৰফী ২০২৫ৰ ফাইনেলত ভাৰতীয় ক্ৰিকেট দলটোৱে শক্তিশালী প্ৰদৰ্শন আগবঢ়াই । টিম ইণ্ডিয়াই নিউজীলেণ্ডক ৪ উইকেটত পৰাস্ত কৰি এই খিতাপ দখল কৰে । এতিয়া ভাৰতীয় ক্ৰিকেট নিয়ন্ত্ৰণ ব’ৰ্ডে টিম ইণ্ডিয়াৰ বাবে পুৰস্কাৰ ঘোষণা কৰিছে । বি চি চি আইয়ে সমগ্ৰ দলটোৰ বাবে ঘোষণা কৰিছে নগদ ধনৰ পুৰস্কাৰ । এই ধনৰাশি খেলুৱৈৰ লগতে প্ৰশিক্ষক আৰু সহায়ক কৰ্মচাৰীকো দিয়া হ’ব । বি চি চি আইয়ে বৃহস্পতিবাৰে ছ’চিয়েল মিডিয়াৰ জৰিয়তে এই তথ্য প্ৰদান কৰে ।
বি চি চি আইয়ে নিজৰ অফিচিয়েল ৱেবছাইটৰ জৰিয়তে কৈছে, ”ভাৰতীয় ক্ৰিকেট নিয়ন্ত্ৰণ বোৰ্ডে আই চি চি চেম্পিয়নছ ট্ৰফী ২০২৫ত টীম ইণ্ডিয়াৰ বিজয়ত ৫৮ কোটি টকাৰ নগদ বঁটা ঘোষণা কৰিছে ।” এই ধন খেলুৱৈৰ লগতে কোচিং আৰু সহায়ক ষ্টাফ, নির্বাচনী সমিতিৰ সদস্যসকলকো দিয়া হ’ব ।
নগদ ধনৰ পুৰস্কাৰ কেনেকৈ বিতৰণ কৰা হ’ব ?
খেলুৱৈৰ দৰমহা গ্ৰেড অনুসৰি দিয়া হয় । এ প্লাছ গ্ৰেডৰ খেলুৱৈৰ দৰমহা সৰ্বাধিক । কিন্তু পুৰস্কাৰৰ ধনৰ কথা বেলেগ । বি চি চি আইয়ে খেলুৱৈসকলক কেনেদৰে নগদ পুৰস্কাৰ দিব সেই সন্দৰ্ভত কোনো আনুষ্ঠানিক তথ্য নাই । কিন্তু সকলো খেলুৱৈকে সমান টকা দিব পাৰে বৰ্ডে ।
ফাইনেলত ভাৰতৰ প্ৰদৰ্শন-
চেম্পিয়নছ ট্ৰফী ২০২৫ৰ ছেমি ফাইনেলত অষ্ট্ৰেলিয়াক পৰাস্ত কৰে টিম ইণ্ডিয়াই । ইয়াৰ পিছত দলটোৱে ফাইনেলতো উজ্জ্বল প্ৰদৰ্শন আগবঢ়াই নিউজীলেণ্ডৰ বিৰুদ্ধে জয়লাভ কৰে । প্ৰথমে বেটিং কৰি নিউজীলেণ্ডে ২৫১ ৰান সংগ্ৰহ কৰে । এই সময়ছোৱাত ডেৰিল মিচেলে ৬৩ ৰানৰ ইনিংছ খেলে । ইয়াৰ প্ৰত্যুত্তৰত ভাৰতে ৪৯ অভাৰত বিজয় লক্ষ্যত উপনীত হয় । ফাইনেলত ৰোহিতে ৭৬ ৰানৰ উজ্জ্বল ইনিংছ খেলে । শ্ৰেয়াছ আয়েৰে ৪৮ ৰানৰ বৰঙণি আগবঢ়ায় ।
