ৰোহিত শৰ্মাৰ অধিনায়কত্বত ভাৰতীয় দলটোৱে আজি (৯ মাৰ্চ) আই চি চি চেম্পিয়নছ ট্ৰফী ২০২৫ৰ চূড়ান্ত মেচ খেলিব । এই খেলখন ডুবাই আন্তঃৰাষ্ট্ৰীয় ক্ৰিকেট ষ্টেডিয়ামত নিউজীলেণ্ডৰ বিৰুদ্ধে অনুষ্ঠিত হ’ব । ভাৰতীয় দলটোৱে তৃতীয়বাৰৰ বাবে আৰু নিউজীলেণ্ডে দ্বিতীয়বাৰৰ বাবে চেম্পিয়নছ ট্ৰফীৰ খিতাপ দখল কৰাৰ লক্ষ্য ৰাখিব ।

এদিনীয়া ফৰ্মেটত খেলা এই চেম্পিয়নছ ট্ৰফী ২০২৫ত ভাৰতীয় দলটো অতি উত্তম ফৰ্মত আছে আৰু এখনো মেচত পৰাস্ত হোৱা নাই । ইতিমধ্যে গ্ৰুপ পৰ্যায়ৰ অন্তিমখন খেলত নিউজীলেণ্ডক পৰাস্ত কৰা ভাৰতীয় দলটোৱে পুনৰ একে আত্মবিশ্বাসেৰে খেলপথাৰত প্ৰৱেশ কৰিব ।

বৰ্তমান টিম ইণ্ডিয়াত বেটিঙৰ পৰা আৰম্ভ কৰি বলিংলৈকে এনে বহু খেলুৱৈ আছে, যিসকলৰ শেষ বলতো বিপক্ষ দলৰ পৰা জয় কাঢ়ি লোৱাৰ ক্ষমতা আছে । আজি আমি এনে টপ-৫ গৰাকী খেলুৱৈৰ কথা ক’ম ।

অ’পেনিঙৰ পৰাই বলাৰসকলক প্ৰহাৰ কৰিবলৈ আৰম্ভ কৰে গীলে-

চেম্পিয়নছ ট্ৰফী ২০২৫ত ভাৰতীয় দলৰ সহ অধিনায়ক অ’পেনাৰ শুভমন গীল বৰ্তমান প্ৰচণ্ড ফৰ্মত আছে । তেওঁ অ’পেনিঙৰ পৰাই বলাৰসকলক প্ৰহাৰ কৰিবলৈ আৰম্ভ কৰে । গীলে এতিয়ালৈকে ৪খন মেচত ১৫৭ ৰান সংগ্ৰহ কৰি ৫২.৩৩ৰ আকৰ্ষণীয় গড় লাভ কৰিছে । এই সময়ছোৱাত তেওঁ শতক অৰ্জন কৰিছে । তেওঁৰ সৰ্বোত্তম স্ক’ৰ হৈছে অপৰাজিত ১০১ ৰান । গীলৰ সৈতে অ’পেনিংত দায়িত্ব লয় অধিনায়ক ৰোহিত শৰ্মাই ।

খেলখনক একপক্ষীয় কৰি তোলিব পাৰে বিৰাট কোহলীয়ে-

এই প্ৰতিযোগিতাখনত বিৰাট কোহলীয়ে দৰ্শনীয় বেটিং কৰিছে । বৰ্তমান তেওঁ ৪খন মেচত ২১৭ ৰান সংগ্ৰহ কৰি ভাৰতৰ হৈ সৰ্বাধিক ৰান সংগ্ৰহকাৰী হৈ আছে । কোহলীৰ গড় হৈছে ৭২.৩৩ । তেওঁ এটা অৰ্ধ শতক আৰু এটা শতক অৰ্জন কৰিছে । কোহলীয়ে পাকিস্তানৰ বিৰুদ্ধে ১০০ ৰানৰ অপৰাজিত ইনিংছ খেলি মেচখন একপক্ষীয় কৰি তুলিছিল । আনহাতে ছেমি ফাইনেলত অষ্ট্ৰেলিয়াৰ বিৰুদ্ধে ৮৪ ৰান সংগ্ৰহ কৰে কোহলীয়ে ।

এক্স ফেক্টৰ বুলি প্ৰমাণিত হয় হাৰ্দিক পাণ্ডিয়া-

ফাষ্ট বলিং অলৰাউণ্ডাৰ হাৰ্দিক পাণ্ডিয়া ভাৰতীয় দলৰ এক্স ফেক্টৰ হিচাপে প্ৰমাণিত হৈছে । তেওঁৰ বাবেই ভাৰতীয় দলটোৱে এতিয়ালৈকে এজন বিশেষজ্ঞ বেগী বলাৰ মহম্মদ ছামিৰ সৈতে মেচ খেলি আহিছে । বলিংত দলক শক্তি প্ৰদান কৰে পাণ্ডিয়াই । লগতে বেটিং কৰাৰ সময়ত তেওঁ মিডল অৰ্ডাৰত আহি বিপক্ষ দলৰ বলিং আক্ৰমণ ওফৰাই দিয়ে ।

পাণ্ডিয়াই এতিয়ালৈকে চেম্পিয়নছ ট্ৰফী ২০২৫ ছিজনত ৪ খন মেচ খেলিছে, য’ত তেওঁ ৩ টা ইনিংছত ৮১ ৰান সংগ্ৰহ কৰিছে । তেওঁৰ সৰ্বোত্তম স্ক’ৰ হৈছে ৪৫ ৰান । বলিংত তেওঁ ৪টা উইকেট দখল কৰিছে । তেওঁৰ সৰ্বোত্তম প্ৰদৰ্শন ৩১ ৰানত ২ টা উইকেট ।

কিৱিৰ বিৰুদ্ধে নিজৰ শক্তি প্ৰদৰ্শন কৰিছে বৰুণে-

চলিত চেম্পিয়নছ ট্ৰফীত অভিষেক ঘটাৰ লগে লগে আলোড়নৰ সৃষ্টি কৰা মিষ্ট্ৰী স্পীনাৰ বৰুণ চক্ৰৱৰ্তী চৰ্চাত আছে । প্ৰতিযোগিতাখনত ২ খন মেচ খেলি ৭ টা উইকেট দখল কৰিছে তেওঁ । প্ৰথমখন মেচতে বৰুণে ৫টা উইকেট দখল কৰে । এই মেচখন আছিল নিউজীলেণ্ডৰ বিৰুদ্ধে । এই মেচত বৰুণে ৫ গৰাকী কিৱি বেটছমেনৰ উইকেট দখল কৰে তেওঁ । এতিয়া ফাইনেলত বৰুণৰ পৰা সতৰ্ক হ’ব লাগিব নিউজীলেণ্ড ।

প্ৰতিযোগিতাখনত ছামীয়েও নিজৰ ক্ষমতা প্ৰদৰ্শন কৰিছে-

ভাৰতীয় বেগী বলাৰ মহম্মদ ছামীয়ে চেম্পিয়নছ ট্ৰফী ২০২৫ ছিজনত নিজৰ ক্ষমতা প্ৰদৰ্শন কৰিছে । বৰ্তমান তেওঁ ৪ খন মেচত ৮ টা উইকেট দখল কৰি ভাৰতৰ হৈ সৰ্বাধিক উইকেট দখল কৰা বলাৰত পৰিণত হৈছে । পাৱাৰ-প্লেত উইকেট লোৱাৰ লগতে বিপক্ষ দলৰ বেটিং মেৰুদণ্ড ভাঙি দিয়াৰ ক্ষমতা আছে ছামীৰ । বাংলাদেশৰ বিৰুদ্ধে খেলখনত ৫৩ ৰানত ৫টা উইকেট দখল কৰে ছামীয়ে ।

ৰোহিত শৰ্মাৰ নেতৃত্বাধীন ভাৰতীয় দলটোৱে একেৰাহে দ্বিতীয়বাৰৰ বাবে আই চি চি খিতাপ দখল কৰাৰ পৰা মাত্ৰ এখোজ দূৰত আছে । দেওবাৰে চেম্পিয়নছ ট্ৰফীৰ ফাইনেলত ভাৰতে নিউজীলেণ্ডৰ বিৰুদ্ধে খেলিব । এই প্ৰতিযোগিতাত ভাৰতে এই পৰ্যন্ত উজ্জ্বল প্ৰদৰ্শন আগবঢ়াইছে আৰু একেৰাহে চাৰিখন মেচত জয়লাভ কৰি খিতাপ মেচৰ বাবে যোগ্যতা অৰ্জন কৰিছে । যোৱা বছৰ টি-২০ বিশ্বকাপ খিতাপ দখল কৰা টিম ইণ্ডিয়াই এতিয়া একেৰাহে দ্বিতীয়বাৰৰ বাবে আই চি চি খিতাপ দখল কৰাৰ ওচৰ চাপিছে ।

শক্তিশালী প্ৰতিদ্বন্দ্বী হিচাপে প্ৰৱেশ কৰিব ভাৰত-

ভাৰতে শক্তিশালী প্ৰতিদ্বন্দ্বী হিচাপে এই মেচত প্ৰৱেশ কৰিব যদিও কিৱি দলকো ওলাই কৰিব নোৱাৰি । ডুবাইত লক্ষ্য অনুসৰণ কৰি এই প্ৰতিযোগিতাত ভাৰতে উজ্জ্বল প্ৰদৰ্শন আগবঢ়াইছে । ভাৰতে চাৰিখন মেচৰ ভিতৰত তিনিখন খেলতে লক্ষ্য অনুসৰণ কৰি জয়লাভ কৰিছে আৰু এই ক্ষেত্ৰত বিৰাট কোহলী আৰু শ্ৰেয়াছ আয়াৰৰ অৱদান গুৰুত্বপূৰ্ণ । নিউজীলেণ্ডৰ বিৰুদ্ধে মেচখনত স্পীনাৰ বৰুণ চক্ৰৱৰ্তীয়ে ৫টা উইকেট দখল কৰিছিল যাৰ বাবে দলটোৱে সফলতা লাভ কৰাত সফল হৈছিল ।

নিউজীলেণ্ডৰ কঠিন প্ৰত্যাহ্বান-

নিউজীলেণ্ড ভাৰতৰ বাবে সদায় কঠিন প্ৰত্যাহ্বান হিচাপে প্ৰমাণিত হৈছে আৰু ভাৰতৰ বিৰুদ্ধে আই চি চি প্ৰতিযোগিতাত ১০-৬ ব্যৱধানত জয়ৰ অভিলেখ আছে । আই চি চিৰ নকআউট পৰ্যায়ত ভাৰতৰ বিৰুদ্ধে চাৰিখন খেলৰ ভিতৰত তিনিখন খেলত জয়লাভ কৰিছে নিউজীলেণ্ডে । যদি ভাৰত আৰু পাকিস্তানৰ মাজৰ মেচ খেলা খেলপথাৰখনতে ফাইনেল খেল হয়, তেন্তে চাৰিওজন স্পীনাৰে কিৱি দলটোক তেওঁলোকৰ স্পীনৰ জালত বেয়াকৈ আৱদ্ধ কৰি ৰাখিব পাৰে ।

প্ৰতিযোগিতাখনত অপৰাজিত হৈ থকা ভাৰতীয় দলটোৱে জয়ৰ ধাৰা অব্যাহত ৰাখিবলৈ আৰু ১২ বছৰৰ পাছত চেম্পিয়নছ ট্ৰফীৰ খিতাপ দখল কৰিবলৈ চেষ্টা কৰিব । জানক চেম্পিয়নছ ট্ৰফী ২০২৫ত ভাৰতৰ যাত্ৰাৰ সবিশেষ…

বাংলাদেশক পৰাস্ত কৰি আৰম্ভ চেম্পিয়নছ ট্ৰফীৰ যাত্ৰা-

পেচাৰ মহম্মদ ছামীৰ চমৎকাৰ বলিং প্ৰদৰ্শন আৰু সহ-অধিনায়ক শুভমন গীলৰ বিস্ফোৰক শতকৰ পাছত ভাৰতে চেম্পিয়নছ ট্ৰফীৰ উদ্বোধনী মেচত বাংলাদেশক ছয় উইকেটত পৰাস্ত কৰি প্ৰতিযোগিতাখনৰ বিজয়ী আৰম্ভণি কৰে । ছামীৰ নেতৃত্বত ভাৰতীয় বলাৰসকলে উজ্জ্বল প্ৰদৰ্শন আগবঢ়াই বাংলাদেশক ৪৯.৪ অভাৰত ২২৮ ৰানত সীমাবদ্ধ কৰি ৰাখে ।

প্ৰত্যুত্তৰত ভাৰতে ৪৬.৩ অভাৰত ৪টা উইকেটত ২৩১ ৰান সংগ্ৰহ কৰি মেচখনত জয়লাভ কৰে । গীলে ৯টা চাৰি আৰু দুটা ৬ৰ সহায়ত ১২৯টা বলত অপৰাজিত ১০১ ৰান সংগ্ৰহ কৰে । বাংলাদেশৰ হৈ তৌহীদ হৃদয়ে শতক অৰ্জন কৰি দলটোক সন্মানজনক স্ক’ৰলৈ আগবঢ়াই নিয়াৰ বিপৰীতে গীলেও এদিনীয়া কেৰিয়াৰৰ অষ্টমটো শতক অৰ্জন কৰি ভাৰতক জয়ৰ দিশে আগুৱাই লৈ যায় । শেষত কে এল ৰাহুলে গীলক দলক জয়ৰ দিশে আগুৱাই নিয়াত সহাঁৰি দিছিল ।

ডিফেণ্ডিং চেম্পিয়ন পাকিস্তানক দেখুৱালে প্ৰস্থানৰ পথ-

আই চি চি টুৰ্ণামেণ্টত পাকিস্তানৰ বাবে দুঃস্বপ্ন হৈ থকা বিৰাট কোহলীয়ে পুনৰবাৰ ইতিহাসৰ পুনৰাবৃত্তি কৰি ভাৰতক অপৰাজিত শতকৰে পাকিস্তানৰ বিৰুদ্ধে ছয় উইকেটৰ জয়ৰ দিশত আগুৱাই লৈ যায় । ইয়াৰ লগে লগে টিম ইণ্ডিয়াই চেম্পিয়নছ ট্ৰফীৰ ছেমি ফাইনেলত প্ৰৱেশ কৰে । ইয়াৰ লগে লগে বিৰাটে আই চি চি প্ৰতিযোগিতাত পঞ্চমবাৰৰ বাবে প্লেয়াৰ অৱ দ্য মেচৰ বঁটা লাভ কৰে ।

বিৰাটৰ বাহিৰে আন কোনো খেলুৱৈয়ে আই চি চি প্ৰতিযোগিতাত একেটা প্ৰতিদ্বন্দ্বী দলৰ বিৰুদ্ধে তিনিটাতকৈ অধিক প্লেয়াৰ অৱ দ্য মেচৰ বঁটা লাভ কৰিব পৰা নাই । জয়ৰ বাবে ২৪২ ৰানৰ লক্ষ্য খেদি কিছুদিনৰ পৰা দুৰ্বল ফৰ্মৰ সৈতে যুঁজি থকা কোহলীয়ে সঠিক সময়ত আৰু সঠিক প্ৰতিপক্ষৰ বিৰুদ্ধে পুনৰ ফৰ্মলৈ ঘূৰি আহি ১১১টা বলত ৭টা চাৰিৰ সহায়ত অপৰাজিত ১০০ ৰান সংগ্ৰহ কৰে । আনহাতে শ্ৰেয়াছ আয়াৰে ৬৭টা বলত ৫৬ ৰান সংগ্ৰহ কৰি ৫টা চাৰি আৰু এটা ছয়ৰে ৪২.৩ অভাৰত ভাৰতক জয়ৰ সোৱাদ প্ৰদান কৰে । ভাৰতৰ জয়ৰ লগে লগে পাকিস্তানৰ যাত্ৰাৰ অন্ত পৰে ।

নিউজীলেণ্ডৰ বিৰুদ্ধে স্পীনাৰৰ শক্তিশালী প্ৰদৰ্শন-

গ্ৰুপ এ-ৰ অন্তিমখন খেলত স্পীনাৰ বৰুণ চক্ৰৱৰ্তীৰ শক্তিশালী প্ৰদৰ্শনেৰে নিউজীলেণ্ডৰ বিৰুদ্ধে ৪৪ ৰানত জয়লাভ কৰে ভাৰতে । গ্ৰুপ পৰ্যায়ত ভাৰতৰ অপৰাজিত দৌৰ অব্যাহত থকাৰ সময়তে দলটোৱে তিনিওখন মেচতে জয়লাভ কৰি গ্ৰুপ এ-ৰ শীৰ্ষত স্থান দখল কৰে । ভাৰতৰ হৈ বৰুণে উজ্জ্বল প্ৰদৰ্শন আগবঢ়াই ১০ অভাৰত ৪২ ৰানত ৫টা উইকেট দখল কৰে । চেম্পিয়নছ ট্ৰফীৰ অভিষেক মেচত ভাৰতীয় যিকোনো বলাৰৰ এইটোৱেই আছিল সৰ্বোত্তম প্ৰদৰ্শন ।

এইখন চেম্পিয়নছ ট্ৰফীত বৰুণৰ প্ৰথমখন মেচ আছিল আৰু তেওঁ জিলিকিবলৈ সফল হৈছিল । এই ক্ষেত্ৰত বৰুণে ২০০৫ চনত ডুবাইত বাংলাদেশৰ বিৰুদ্ধে ৫৩ ৰানত ৫টা উইকেট দখল কৰা বেগী বলাৰ মহম্মদ ছামীক অতিক্ৰম কৰে । প্ৰথমে বেটিং কৰি ভাৰতে শ্ৰেয়াছ আয়াৰৰ অৰ্ধশতকৰে ৫০ অভাৰত ৯ উইকেটত ২৪৯ ৰান সংগ্ৰহ কৰে । লক্ষ্য খেদি নিউজীলেণ্ডৰ হৈ কেন উইলিয়ামছনে ৮১ ৰান সংগ্ৰহ কৰে যদিও ৪৫.৩ অভাৰত ২০৫ ৰান সংগ্ৰহ কৰি অল আউট হৈ পৰাস্ত  হয় দলটো ।

কেংগাৰুৰ বিৰুদ্ধে ল’লে মধুৰ প্ৰতিশোধ-

ছেমি ফাইনেলত অষ্ট্ৰেলিয়াৰ মুখামুখি হৈছিল ভাৰত । অষ্ট্ৰেলিয়াৰ দলটোৱে গ্ৰুপ বি-ত দ্বিতীয় স্থান লাভ কৰিছিল । বলাৰৰ পাছত ভাৰতীয় দলটোৱে বিৰাট কোহলীৰ নেতৃত্বত বেটছমেনৰ শক্তিশালী প্ৰদৰ্শনৰ বাবে ছেমি ফাইনেলত অষ্ট্ৰেলিয়াক চাৰি উইকেটত পৰাস্ত কৰি চেম্পিয়নছ ট্ৰফীৰ ফাইনেলত প্ৰৱেশ কৰে । ভাৰতীয় দলটোৱে প্ৰতিযোগিতাখনত অপৰাজিত হৈ ফাইনেলত প্ৰৱেশ কৰে ।

এই মেচখনত অষ্ট্ৰেলিয়াৰ অধিনায়ক ষ্টিভ স্মিথে প্ৰথমে বেটিং কৰাৰ সিদ্ধান্ত লৈ ৪৯.৩ অভাৰত ২৬৪ ৰান সংগ্ৰহ কৰে । লক্ষ্য খেদি কোহলীয়ে পুনৰবাৰ চেজ মাষ্টাৰ বুলি প্ৰমাণ কৰে, ৫টা চাৰিৰ সহায়ত ৯৮ বলত ৮৪ ৰান সংগ্ৰহ কৰে ভাৰতে । লগে লগে ভাৰতে ৪৮.১ অভাৰত ৬ উইকেটত ২৬৭ ৰান সংগ্ৰহ কৰি মেচখন জয় কৰে ।

ইয়াৰ লগে লগে ভাৰতে ২০২৩ চনৰ এদিনীয়া বিশ্বকাপৰ ফাইনেলত অষ্ট্ৰেলিয়াৰ হাতত পৰাজয়ৰ প্ৰতিশোধ লয় । এই জয়েৰে ক্ৰমাগত তৃতীয়বাৰৰ বাবে সীমিত অভাৰৰ ফৰ্মেটত আই চি চি প্ৰতিযোগিতাৰ ফাইনেলত প্ৰৱেশ কৰিবলৈ সক্ষম হৈছে ভাৰত  । ইয়াৰ পূৰ্বে ভাৰতে ২০২৩ চনৰ এদিনীয়া বিশ্বকাপ, ২০২৪ চনৰ টি-২০ বিশ্বকাপৰ ফাইনেলত প্ৰৱেশ কৰিছিল আৰু এতিয়া চেম্পিয়নছ ট্ৰফীৰ খিতাপৰ মেচতো প্ৰৱেশ কৰিবলৈ সক্ষম হৈছে । একে সময়তে টিম ইণ্ডিয়াই একেৰাহে তৃতীয়বাৰৰ বাবে চেম্পিয়নছ ট্ৰফীৰ ফাইনেলত প্ৰৱেশ কৰিছে । ইয়াৰ পূৰ্বে দলটোৱে ২০১৩ আৰু ২০১৭ চেম্পিয়নছ ট্ৰফীৰ ফাইনেলতো প্ৰৱেশ কৰিছিল ।

৯ মাৰ্চত ভাৰত আৰু নিউজীলেণ্ডৰ মাজত অনুষ্ঠিত হ’ব চেম্পিয়নছ ট্ৰফীৰ খিতাপৰ মেচ । ছেমি ফাইনেলত ভাৰতে অষ্ট্ৰেলিয়াক পৰাস্ত কৰাৰ বিপৰীতে নিউজীলেণ্ডে দক্ষিণ আফ্ৰিকাক পৰাস্ত কৰি খিতাপ মেচত প্ৰৱেশ কৰিছে । ২৫ বছৰৰ পাছত পুনৰবাৰ এই দুয়োটা দলে আই চি চিৰ সীমিত অভাৰৰ ফৰ্মেটত খিতাপৰ মেচত মুখামুখি হ’ব ।

আঠ দিনৰ ভিতৰত দ্বিতীয়বাৰৰ বাবে মুখামুখি হ’ব-

চেম্পিয়নছ ট্ৰফীত গ্ৰুপ এ-ত আছিল ভাৰত আৰু নিউজীলেণ্ড । গ্ৰুপ পৰ্যায়ৰ অন্তিমখন মেচত ভাৰতে নিউজীলেণ্ডক পৰাস্ত কৰিছিল আৰু এতিয়া আঠ দিনৰ ব্যৱধানৰ অন্তত দুয়োটা দল আকৌ এবাৰ মুখামুখি হ’ব । আই চি চি টুৰ্ণামেণ্টৰ ফাইনেলত ভাৰত আৰু নিউজীলেণ্ডৰ দলৰ মাজত দুবাৰকৈ সংঘৰ্ষ হৈছে । শেষবাৰৰ বাবে দুয়োটা দলে ২০২১ চনত বিশ্ব টেষ্ট চেম্পিয়নশ্বিপ (ডব্লিউ টি চি)ৰ ফাইনেলত খেলিছিল । বৰষুণৰ বাবে ৬ দিন চলি থকা খিতাপ মেচখনত নিউজীলেণ্ডে ভাৰতৰ ওপৰত প্ৰভাৱ বিস্তাৰ কৰিছিল আৰু কিৱি দলে ভাৰতীয় দলটোক ৮ উইকেটত পৰাস্ত কৰিছিল ।

২৫ বছৰ পূৰ্বে ভাৰতৰ সপোন ভংগ কৰিছিল কিৱি দলে-

উল্লেখ্য যে আই চি চিৰ সীমিত অভাৰৰ ফৰ্মেটৰ ফাইনেলত দুয়োটা দলে শেষবাৰৰ বাবে ২০০০ চনত আই চি চি নকআউট ট্ৰফী (বৰ্তমান চেম্পিয়নছ ট্ৰফী)ত খেলিছিল । সেই সময়ত নিউজীলেণ্ডে ভাৰতক চাৰি উইকেটত পৰাস্ত কৰি খিতাপ দখল কৰিছিল । সেই মেচখনত গংগুলীৰ ১১৭ ৰান আৰু শচীন টেণ্ডুলকাৰৰ ৬৯ ৰানৰ বাবেই সৌৰভ গাংগুলীৰ নেতৃত্বত ভাৰতীয় দলটোৱে ৫০ অভাৰত ৬ উইকেটত ২৬৪ ৰান সংগ্ৰহ কৰে । ইয়াৰ প্ৰতিক্ৰিয়া স্বৰূপে ষ্টিফেন ফ্লেমিংৰ অধিনায়কত্বত থকা নিউজীলেণ্ড দলে সফলতাৰে লক্ষ্যত উপনীত হয় । কিৱিৰ হৈ ক্ৰীছ কেয়াৰ্নে ১১৩টা বলত অপৰাজিত ১০২ ৰান সংগ্ৰহ কৰি ভাৰতৰ পৰা জয় কাঢ়ি লয় ।

আই চি চিৰ খিতাপৰ বাবে দীৰ্ঘদিন ধৰি অপেক্ষা কৰি আছে নিউজীলেণ্ডে-

তেতিয়াৰ পৰা নিউজীলেণ্ডে কেতিয়াও আই চি চিৰ হোৱাইট বল প্ৰতিযোগিতাত জয়ী হোৱা নাই । নিউজীলেণ্ড দলটোৱে ২০১৫ আৰু ২০১৯ৰ এদিনীয়া বিশ্বকাপৰ ফাইনেলত প্ৰৱেশ কৰিছিল যদিও দুয়োবাৰেই পৰাজয়ৰ সন্মুখীন হৈছিল । এতিয়া তেওঁলোকে ৰোহিত শৰ্মা নেতৃত্বাধীন ভাৰতীয় দলৰ বিৰুদ্ধে আন এখন ফাইনেলত মুখামুখি হ’ব, যিয়ে প্ৰতিযোগিতাখনত অপৰাজিত হৈ খিতাপ মেচত প্ৰৱেশ কৰিছে ।

২ মাৰ্চত একেখন ডুবাই আন্তঃৰাষ্ট্ৰীয় ক্ৰিকেট ষ্টেডিয়ামতে ভাৰত আৰু নিউজীলেণ্ডৰ মাজত এখন খেল অনুষ্ঠিত হৈছিল, য’ত ভাৰতে নিউজীলেণ্ডৰ সন্মুখত ২৫০ ৰানৰ লক্ষ্য নিৰ্ধাৰণ কৰি দিছিল । এই মেচত বৰুণ চক্ৰৱৰ্তীৰ নেতৃত্বত ভাৰতীয় স্পীনাৰৰ শক্তিশালী প্ৰদৰ্শনৰ বাবে টিম ইণ্ডিয়াই লক্ষ্য ৰক্ষা কৰাত সফল হয় । চেম্পিয়নছ ট্ৰফীৰ প্ৰথমখন মেচ খেলা বৰুণে ৫টা উইকেট দখল কৰে আৰু নিউজীলেণ্ড পৰাজয়ৰ সন্মুখীন হয় ।