অৰুণাচল প্ৰদেশৰ মুখ্যমন্ত্ৰী পেমা খাণ্ডুৱে শনিবাৰে ব্ৰহ্মপুত্ৰ নদীত ৰাফ্টৰ বাবে এক ঐতিহাসিক অভিযানৰ ফ্লেগ অফ কৰে । ১৪ জানুৱাৰীৰ পৰা অৰুণাচল প্ৰদেশৰ গেলিঙৰ পৰা আৰম্ভ কৰি ১৪ ফেব্ৰুৱাৰীত অসমৰ ধুবুৰী-হাটশিঙিমাৰীত সামৰণি পৰিব এই অভিযান । এই অনুষ্ঠানৰ আয়োজন কৰিছে নেচনেল ইনষ্টিটিউট অৱ মাউণ্টেইনিং এণ্ড এডভেঞ্চাৰ স্পৰ্টছে ।
গুৱাহাটীত প্ৰতিৰক্ষা মন্ত্ৰালয়ৰ মুখপাত্ৰ লেফটেনেণ্ট কৰ্ণেল মহেন্দ্ৰ ৰাৱাটে প্ৰকাশ কৰা অনুসৰি ব্ৰহ্মপুত্ৰ নদীৰ ৯১৬ কিলোমিটাৰ দূৰত্ব অতিক্ৰম কৰিব লগা এয়া এনেধৰণৰ প্ৰথমটো যাত্ৰা । ই ইয়াৰ সৌন্দৰ্য আৰু প্ৰত্যাহ্বানমূলক ৰেপিড প্ৰদৰ্শন কৰিব । এই অভিযানৰ লক্ষ্য হৈছে দুঃসাহসিক পৰ্যটনক প্ৰসাৰিত কৰা, পৰিৱেশ সজাগতাক উৎসাহিত কৰা আৰু যুৱক-যুৱতীসকলক দুঃসাহসিক ক্ৰীড়াত অংশগ্ৰহণৰ বাবে অনুপ্ৰাণিত কৰা ।
ইটানগৰস্থিত মুখ্যমন্ত্ৰীৰ বাসগৃহত অনুষ্ঠিত এক অনুষ্ঠানত নিমাছৰ সঞ্চালক কৰ্ণেল ৰণবীৰ সিং জামৱালে মুখ্যমন্ত্ৰী পেমা খাণ্ডুক অভিযানৰ উদ্দেশ্য, প্ৰত্যাহ্বান আৰু আশা কৰা ধৰণৰ ফলাফলৰ বিষয়ে অৱগত কৰে । জামৱাল নিমাছৰ উপ-সভাপতিও । মুখ্যমন্ত্ৰীয়ে সমগ্ৰ দলটোৰ সৈতে মত বিনিময় কৰি শুভেচ্ছা জনায় আৰু প্ৰত্যাহ্বানমূলক অভিযানৰ সফলতাৰ ওপৰত আস্থা প্ৰকাশ কৰে । লগতে দলটোক ঘূৰি আহিলে আদৰিবলৈ আগ্ৰহী বুলিও কয় ।
এই ঐতিহাসিক অভিযানে মানৱ আত্মাৰ অজেয় শক্তিৰ সাক্ষ্যই নহয়, ভাৰতত নদী ৰাফটিঙক দুঃসাহসিক ক্ৰীড়া হিচাপে প্ৰচাৰ কৰাৰ ক্ষেত্ৰতো উল্লেখযোগ্য অৱদান আগবঢ়াব ।
