ভাৰতীয় মূলৰ মহাকাশচাৰী সুনীতা উইলিয়ামছ আৰু তেওঁৰ দলৰ সফল প্ৰত্যাৱৰ্তনত প্ৰধানমন্ত্ৰী নৰেন্দ্ৰ মোদীয়ে আনন্দ প্ৰকাশ কৰিছে । ছ’চিয়েল মিডিয়া প্লেটফৰ্মত তেওঁ লিখিছে ‘ৱেলকাম বেক ক্ৰু-৯! পৃথিৱীয়ে আপোনালোকক মিছ কৰিছিল।’ প্ৰধানমন্ত্ৰী মোদীয়ে ইয়াক সাহস আৰু অভেদ্য মানৱীয় মনোভাৱৰ পৰীক্ষা বুলি অভিহিত কৰে । তেওঁ কয় যে সুনীতা উইলিয়ামছ আৰু ক্ৰু-৯ৰ মহাকাশচাৰীসকলে পুনৰবাৰ প্ৰমাণ কৰিছে যে ‘দৃঢ়তা আৰু ধৈৰ্য্যৰ প্ৰকৃত সংজ্ঞা’ কি ।
প্ৰধানমন্ত্ৰীয়ে মহাকাশ গৱেষণাক কেৱল বৈজ্ঞানিক কৃতিত্বই নহয়, “মানৱ সামৰ্থ্যৰ সীমা অতিক্ৰম কৰি, ডাঙৰ সপোন দেখা আৰু সেইবোৰ পূৰণ কৰাৰ সাহস” কৰাৰ প্ৰেৰণা বুলিও অভিহিত কৰে । সুনীতা উইলিয়ামছক আদৰ্শ আৰু প্ৰেৰণা হিচাপে অভিহিত কৰি তেওঁ কয় যে তেওঁ সমগ্ৰ কেৰিয়াৰত এই আৱেগক মূৰ্ত কৰি ৰাখিছে ।
বিজ্ঞানী আৰু বিশেষজ্ঞসকলৰ কঠোৰ পৰিশ্ৰমৰ প্ৰশংসা কৰে প্ৰধানমন্ত্ৰীয়ে-
এই অভিযান সফল কৰিবলৈ অক্লান্তভাৱে কাম কৰা বিজ্ঞানী আৰু বিশেষজ্ঞসকলকো প্ৰশংসা কৰে প্ৰধানমন্ত্ৰী মোদীয়ে । তেওঁ কয়, ‘ক্ৰু-৯ৰ নিৰাপদে উভতি অহাটো নিশ্চিত কৰিবলৈ দিনে-নিশাই কাম কৰা সকলোৰে বাবে আমি গৌৰৱান্বিত ।’ প্ৰধানমন্ত্ৰীয়ে লগতে কয় যে এই অভিযানে দেখুৱাইছে যে ‘যেতিয়া কাৰিকৰী বিশেষজ্ঞতা, আবেগ আৰু দৃঢ়তা একেলগে আহিব, তেতিয়া অসম্ভৱকো সম্ভৱ কৰি তুলিব পাৰি ।’
সুনীতা উইলিয়ামছক লৈ ভাৰত গৌৰৱান্বিত-
সুনীতা উইলিয়ামছৰ সফলতাক লৈ গৌৰৱ অনুভৱ কৰিছে ভাৰতে । প্ৰধানমন্ত্ৰী মোদীৰ মতে তেওঁৰ যাত্ৰা কেৱল বিজ্ঞানতে সীমাবদ্ধ নহয় বৰঞ্চ ‘এয়া সংগ্ৰাম, নিষ্ঠা আৰু সাহসৰ এক আচৰিত উদাহৰণ যিয়ে আগন্তুক প্ৰজন্মক অনুপ্ৰাণিত কৰি থাকিব ।’
