সাতখন দেশৰ ছুপাৰ গ্ৰুপ জি-৭
জি-৭ অৰ্থাৎ “গ্ৰুপ অব্ ছেভেন” কেৱল সাতখন উন্নত দেশৰ গোট নহয়, বৰঞ্চ বিশ্ব ৰাজনীতি, অৰ্থনীতি আৰু নিৰাপত্তাৰ সৈতে জড়িত সিদ্ধান্তৰ বাবে এক শক্তিশালী মঞ্চ । ২০২৫ চনত কানাডাই আয়োজন কৰা জি-৭ সন্মিলনে পুনৰবাৰ বিশ্বক দেখুৱাই দিলে যে এই মঞ্চই বিশ্বৰ সিদ্ধান্তক কিমান গভীৰভাৱে প্ৰভাৱিত কৰে ।
গতিকে জানক জি-৭ কি, ই কিয় গঠন হ’ল, ই কেনেকৈ কাম কৰে আৰু এই গোটৰ বিশ্বত কি প্ৰভাৱ পৰে ।
জি-৭ৰ গঠন আৰু উদ্দেশ্য
১৯৭৩–৭৪ চনৰ অৰ্থনৈতিক মন্দাৱস্থা আৰু তেলৰ সংকটৰ সৈতে বিশ্বই যুঁজি থকাৰ সময়তে ১৯৭৫ চনত এই গোটৰ আৰম্ভ হৈছিল । তেতিয়া আমেৰিকা, ফ্ৰান্স, জাৰ্মানী, ইটালী, জাপান আৰু ব্ৰিটেইনে মিলি এই গোট গঠন কৰিছিল, যাতে বিশ্ব অৰ্থনৈতিক নীতিৰ সমন্বয় সাধন কৰিব পৰা যায় । ১৯৭৬ চনত কানাডাই যোগদান কৰাৰ পিছত এই গোটটোক জি-৭ বুলি কোৱা হৈছিল । ইয়াৰ মূল উদ্দেশ্য হৈছে উন্নত দেশসমূহৰ মাজত অৰ্থনৈতিক স্থিতিশীলতা বজাই ৰখা আৰু বিশ্বজনীন প্ৰত্যাহ্বানসমূহৰ উমৈহতীয়া সমাধান বিচাৰি উলিওৱা ।
মূল কামবোৰ কি ?
এই গোট এতিয়া কেৱল অৰ্থনৈতিক বিষয়ত সীমাবদ্ধ হৈ থকা নাই । এই গোটটোৱে বিশ্ব পৰ্যায়ৰ বহু গুৰুত্বপূৰ্ণ ক্ষেত্ৰত সক্ৰিয় ভূমিকা পালন কৰি আছে । ই বাণিজ্য, বিনিয়োগ আৰু বিত্তীয় নীতিৰ জৰিয়তে বিশ্ব অৰ্থনীতিক দিশ নিৰ্দেশনা দিয়ে, আনহাতে আন্তঃৰাষ্ট্ৰীয় নিৰাপত্তাৰ ক্ষেত্ৰত যুদ্ধ, সন্ত্ৰাসবাদ আৰু পাৰমাণৱিক ভাবুকিৰ দৰে প্ৰত্যাহ্বানৰ সৈতে মোকাবিলা কৰাৰ কৌশল প্ৰণয়ন কৰে ।
ইয়াৰ উপৰিও জলবায়ু পৰিৱৰ্তন আৰু পৰিৱেশ সুৰক্ষাৰ বাবে বিশ্বব্যাপী নিয়ম নিৰ্ধাৰণ, বিশ্ব স্বাস্থ্য সংকট (যেনে মহামাৰী)ৰ প্ৰতি দ্ৰুত সঁহাৰি আৰু কৃত্ৰিম বুদ্ধিমত্তাৰ দৰে আধুনিক প্ৰযুক্তিৰ ক্ষেত্ৰতো এই গোটৰ মূল ভূমিকা আছে ।
বিশ্বত প্ৰভাৱ কি ?
বিশেষকৈ উন্নয়নশীল দেশসমূহৰ বাবে বিশ্বৰ দিশ নিৰ্ধাৰণত এই গোটৰ সিদ্ধান্তই গুৰুত্বপূৰ্ণ ভূমিকা পালন কৰে । ইয়াৰ অৰ্থনৈতিক নীতিয়ে বিশ্বৰ বজাৰ, মুদ্ৰাস্ফীতি আৰু বাণিজ্যৰ ওপৰত গভীৰ প্ৰভাৱ পেলায় । নিৰাপত্তাৰ ক্ষেত্ৰত এই গোটটোৱে ইউক্ৰেইনৰ সংকটৰ দৰে যুদ্ধ আৰু আন্তঃৰাষ্ট্ৰীয় সংঘাতত সক্ৰিয় ভূমিকা পালন কৰে । প্ৰযুক্তিগত আৰু পৰিৱেশ বিষয়ত এই গ্ৰুপে পৰিৱেশ চুক্তি আৰু ডিজিটেল শাসনৰ দৰে বিষয়ত দিশ নিৰ্ধাৰণ কৰে । লগতে চীন আৰু ৰাছিয়াৰ দৰে বিশ্ব শক্তিৰ ওপৰত ৰাজনৈতিক আৰু কূটনৈতিক হেঁচা সৃষ্টি কৰি ভাৰসাম্য গঢ়ি তুলিবলৈ চেষ্টা কৰে ।
লগতে পঢ়ক : ইৰাণৰ বিৰুদ্ধে যুঁজত ইজৰাইলৰ পক্ষত জি-৭ দেশ; পশ্চিম এছিয়াৰ অস্থিৰতাৰ মূল কাৰণ তেহৰাণ বুলি অভিহিত
