সন্ত্ৰাসবাদ মানৱতাৰ শত্ৰু

জি-৭ সন্মিলনত সন্ত্ৰাসবাদক লৈ বিশ্ব সম্প্ৰদায়ক বাৰ্তা প্ৰেৰণ কৰিছে প্ৰধানমন্ত্ৰী মোদীয়ে । এই বিশেষ অনুষ্ঠানত তেওঁ কয় যে সন্ত্ৰাসবাদ হৈছে মানৱতাৰ শত্ৰু । ই গণতান্ত্ৰিক ব্যৱস্থা থকা সেই সকলো দেশৰ বিৰুদ্ধে । মঙলবাৰে কানাডাৰ কানানাস্কিছত অনুষ্ঠিত হোৱা জি-৭ সন্মিলনৰ আঁৰত দক্ষিণ কোৰিয়া, মেক্সিকো, দক্ষিণ আফ্ৰিকা আৰু অষ্ট্ৰেলিয়াৰ নেতৃত্বক সাক্ষাৎ কৰে প্ৰধানমন্ত্ৰী মোদীয়ে । প্ৰকাশিত বাতৰি অনুসৰি জি-৭ সন্মিলনত অংশগ্ৰহণৰ বাবে কানানাস্কিছত উপস্থিত হোৱা প্ৰধানমন্ত্ৰী মোদীয়ে লি জে-ম্যুঙৰ সৈতেও আলোচনাত মিলিত হয় ।

কানাডাত জি-৭ৰ বৈঠকৰ সময়ত প্ৰধানমন্ত্ৰী নৰেন্দ্ৰ মোদীয়ে পাকিস্তানৰ বিৰুদ্ধে চোকা মন্তব্য কৰে । পহলগাম আক্ৰমণৰ কথা উল্লেখ কৰি তেওঁ কয় যে সন্ত্ৰাসবাদৰ ক্ষেত্ৰত দ্বৈত মানদণ্ডৰ কোনো স্থান থাকিব নালাগে । ২২ এপ্ৰিলত সংঘটিত সন্ত্ৰাসবাদী আক্ৰমণ কেৱল পহলগামৰ আক্ৰমণ নহয়, প্ৰতিজন ভাৰতীয়ৰ আত্মা, পৰিচয় আৰু মৰ্যাদাৰ ওপৰত আক্ৰমণ কৰা বুলিও তেওঁ কয় । তেওঁ আৰু কয় যে এয়া সমগ্ৰ মানৱতাৰ ওপৰত আক্ৰমণ ।

জি-৭ সন্মিলনৰ আঁৰত প্ৰধানমন্ত্ৰী মোদীয়ে কানাডাৰ প্ৰধানমন্ত্ৰী মাৰ্ক কাৰ্নীৰ সৈতেও দ্বিপাক্ষিক বৈঠকত মিলিত হয় । এই সময়ত প্ৰধানমন্ত্ৰী মোদীয়ে দুয়োখন দেশৰ সম্পৰ্কৰ ওপৰত গুৰুত্ব আৰোপ কৰি কয় যে ভাৰত আৰু কানাডাৰ সম্পৰ্ক বহু দিশত অতি গুৰুত্বপূৰ্ণ । কানাডাৰ বহু কোম্পানীৰ ভাৰতত বিনিয়োগ আছে । ভাৰতৰ জনসাধাৰণৰ কানাডাৰ মাটিতো বৃহৎ বিনিয়োগ আছে । গণতান্ত্ৰিক মূল্যবোধৰ প্ৰতি উৎসৰ্গিত কানাডা আৰু ভাৰতে একেলগে গণতন্ত্ৰ আৰু মানৱতাক শক্তিশালী কৰিব লাগিব ।

লগতে পঢ়ক : প্ৰধানমন্ত্ৰী মোদী আৰু মাৰ্ক কাৰ্নীৰ বৈঠক; কি কি বিষয়ৰ ওপৰত হ’ল আলোচনা ?

আজিৰে পৰা তিনিখন দেশ ভ্ৰমণত প্ৰধানমন্ত্ৰী মোদী

১৫ৰ পৰা ১৯ জুনত বিদেশ ভ্ৰমণত থাকিব প্ৰধানমন্ত্ৰী নৰেন্দ্ৰ মোদী । এই সময়ছোৱাত তেওঁ চাইপ্ৰাছ, কানাডা আৰু ক্ৰ’ৱেচিয়া ভ্ৰমণ কৰিব । অপাৰেচন সিন্দুৰৰ পিছত প্ৰধানমন্ত্ৰী মোদীৰ এই প্ৰথম বিদেশ ভ্ৰমণক দ্বিপাক্ষিক সম্পৰ্ক বৃদ্ধি আৰু ইউৰোপীয় সংঘ আৰু ভূমধ্যসাগৰীয় অঞ্চলৰ সৈতে ভাৰতৰ সম্পৰ্ক সুদৃঢ় কৰাৰ ক্ষেত্ৰত গুৰুত্বপূৰ্ণ বুলি বিবেচিত হৈছে । কানাডাত অনুষ্ঠিত হোৱা জি-৭ সন্মিলনত অংশগ্ৰহণ কৰাৰ উপৰিও তেওঁ প্ৰধানমন্ত্ৰী মাৰ্ক কাৰ্নীৰ সৈতেও দ্বিপাক্ষিক বৈঠকত মিলিত হ’ব ।

বৈদেশিক পৰিক্ৰমা মন্ত্ৰালয়ে জনোৱা মতে, এই ভ্ৰমণৰ প্ৰথম পৰ্যায়ত প্ৰধানমন্ত্ৰীগৰাকীয়ে চাইপ্ৰাছত উপস্থিত হ’ব । ১৫-১৬ জুন তাৰিখৰ এই ভ্ৰমণ চাইপ্ৰাছৰ ৰাষ্ট্ৰপতি নিকোছ ক্রিষ্টোডুলিডেছৰ আমন্ত্ৰণত হৈছে । দুই দশকৰ পিছত ভাৰতীয় প্ৰধানমন্ত্ৰীৰ এয়া প্ৰথমবাৰৰ বাবে চাইপ্ৰাছ ভ্ৰমণ । ৰাজধানী নিকোছিয়াত প্ৰধানমন্ত্ৰী আৰু ৰাষ্ট্ৰপতি ক্রিষ্টোডুলিডেছৰ মাজত আলোচনা অনুষ্ঠিত হ’ব ৷ লিমাছলত উদ্যোগীসকলক সম্বোধন কৰিব তেওঁ ।

জি-৭ শীৰ্ষ সন্মিলনত একেৰাহে ষষ্ঠবাৰৰ বাবে প্ৰধানমন্ত্ৰীৰ অংশগ্ৰহণ-

ইয়াৰ পাছতে কানাডাৰ প্ৰধানমন্ত্ৰী মাৰ্ক কাৰ্নীৰ আমন্ত্ৰণত ১৬-১৭ জুনত অনুষ্ঠিত হ’বলগীয়া জি-৭ সন্মিলনত অংশগ্ৰহণ কৰিব নৰেন্দ্ৰ মোদীয়ে । ইয়াৰ মাজতে কানাডাৰ কানানাস্কিছ ভ্ৰমণ কৰিব প্ৰধানমন্ত্ৰীগৰাকীয়ে । জি-৭ শীৰ্ষ সন্মিলনত প্ৰধানমন্ত্ৰীয়ে একেৰাহে ষষ্ঠবাৰৰ বাবে অংশগ্ৰহণ কৰিব । এই সন্মিলনত প্ৰধানমন্ত্ৰী মোদীয়ে জি-৭ দেশৰ নেতা, অন্যান্য আমন্ত্ৰিত আউটৰিচ দেশ আৰু আন্তঃৰাষ্ট্ৰীয় সংস্থাৰ মুৰব্বীৰ সৈতে আলোচনাত মিলিত হ’ব । এই সময়ত প্ৰধানমন্ত্ৰী মোদীয়ে শক্তি সুৰক্ষা, প্ৰযুক্তি আৰু উদ্ভাৱনকে ধৰি বিশ্বব্যাপী গুৰুত্বপূৰ্ণ বিষয়সমূহৰ ওপৰত মত বিনিময় কৰিব, বিশেষকৈ এ আই শক্তিৰ সংযোগ আৰু কোৱাণ্টামৰ সৈতে জড়িত বিষয়সমূহৰ ওপৰত । এই সন্মিলনৰ সময়ত প্ৰধানমন্ত্ৰীয়ে কেইবাখনো দ্বিপাক্ষিক বৈঠকতো অংশগ্ৰহণ কৰিব ।

ভাৰতৰ প্ৰধানমন্ত্ৰীৰ প্ৰথম ক্ৰ’ৱেচিয়া ভ্ৰমণ-

ভ্ৰমণৰ অন্তিম পৰ্যায়ত প্ৰধানমন্ত্ৰী মোদীয়ে ক্ৰ’ৱেচিয়াৰ প্ৰধানমন্ত্ৰী আন্দ্ৰেজ প্লেংকভিচৰ আমন্ত্ৰণত ১৮ জুনত ক্ৰ’ৱেচিয়ালৈ আনুষ্ঠানিক ভ্ৰমণ কৰিব । ভাৰতৰ প্ৰধানমন্ত্ৰীৰ এয়া প্ৰথম ক্ৰ’ৱেচিয়া ভ্ৰমণ হ’ব, যিটো দ্বিপাক্ষিক সম্পৰ্কৰ এক গুৰুত্বপূৰ্ণ মাইলৰ খুঁটি হিচাপে প্ৰমাণিত হ’ব । প্ৰধানমন্ত্ৰী মোদী আৰু প্ৰধানমন্ত্ৰী প্লেংকভিচে দ্বিপাক্ষিক আলোচনাত মিলিত হ’ব । ক্ৰ’ৱেচিয়াৰ ৰাষ্ট্ৰপতি জোৰাণ মিলানোভিচক সাক্ষাৎ কৰিব প্ৰধানমন্ত্ৰী মোদীয়ে । ক্ৰ’ৱেচিয়া ভ্ৰমণে ইউৰোপীয় সংঘৰ অংশীদাৰ দেশসমূহৰ সৈতে ভাৰতৰ সম্পৰ্ক আৰু অধিক শক্তিশালী কৰাৰ প্ৰতিশ্ৰুতিও প্ৰকাশ কৰিব ।

লগতে পঢ়ক : ৫ দিন, ৩খন দেশ আৰু জি-৭ শীৰ্ষ সন্মিলন…; মেগা কূটনৈতিক যাত্ৰা প্ৰধানমন্ত্ৰী মোদীৰ