“APHLCৰ লগত যিয়ে মিত্ৰতা কৰে সি ৰাজনীতিত ডুবিব”- মুখ্যমন্ত্ৰীৰ কটাক্ষ
তেওঁলোকে যিধৰণৰ ৰাজনীতি কৰে, তাৰ দ্বাৰা ধৰ্ণা আৰু প্ৰতিবাদৰে ভৰা পুৰণি কাৰ্বি আংলং পুনৰ ঘূৰি আহিব বুলি মন্তব্য কৰে মুখ্যমন্ত্ৰীয়ে ।
মুখ্যমন্ত্ৰী ড০ হিমন্ত বিশ্ব শৰ্মাই কয় যে যি ৰাজনৈতিক দলে অল পাৰ্টি হিল লিডাৰ্ছ কনফাৰেন্স (APHLC)-ৰ সৈতে মিত্ৰতা কৰিব, সেই দলটো ৰাজনীতিত “ডুব যাব” । মঙলবাৰে বোকাজানত অনুষ্ঠিত হোৱা এক চৰকাৰী অনুষ্ঠানত অংশগ্ৰহণ কৰি সাংবাদিকৰ আগত দাবী কৰে যে পাহাৰীয়া জিলাখনৰ ভোটাৰসকলে APHLC বা তেওঁলোকৰ ৰাজনীতিৰ শৈলীক সমৰ্থন নকৰে । তেওঁ অভিযোগ কৰে যে যদি APHLC পুনৰ সক্ৰিয় হৈ উঠে, তেন্তে কাৰ্বি আংলঙত পুনৰ বন্ধ, প্ৰতিবাদ আৰু অশান্তিৰে ভৰা সেই পুৰণি দিনবোৰ ঘূৰি আহিব ।
মুখ্যমন্ত্ৰীগৰাকীয়ে কয়, ” APHLCৰ সৈতে যি পাৰ্টীয়েই মিত্ৰতা কৰিব, APHLC ডুবিব আৰু লগত যি পাৰ্টীক ল’ব তাকো ডুবাব । কাৰণ ইয়াৰ মানুহে APHLCক ভাল নাপায় । তেওঁলোকে যিধৰণৰ ৰাজনীতি কৰে, তাৰ দ্বাৰা ধৰ্ণা আৰু প্ৰতিবাদৰে ভৰা পুৰণি কাৰ্বি আংলং পুনৰ ঘূৰি আহিব । সেইবাবেই ৰাইজে তেওঁলোকক বা তেওঁলোকক সমৰ্থন কৰা কোনো দলকে ভোট নিদিয়ে ।” তেওঁ আৰু মন্তব্য কৰে যে যিহেতু “যিকোনো সমাজতে বিভিন্ন ধৰণৰ লোক থাকে,” সেয়েহে APHLC-এ কিছু ভোট পাব পাৰে, কিন্তু তেওঁলোকে ব্যাপক জনসমৰ্থন লাভ কৰিব নোৱাৰে ।
মুখ্যমন্ত্ৰীগৰাকীয়ে বোকাজান বিধানসভা সমষ্টিৰ এক কাৰ্যসূচীত অংশগ্ৰহণ কৰি এই মন্তব্য কৰে, য’ত তেওঁ হাজাৰ হাজাৰ মহিলা হিতাধিকাৰীক ‘মুখ্যমন্ত্ৰী মহিলা উদ্যমিতা অভিযান’ৰ অধীনত আৰ্থিক সাহায্যৰ প্ৰথম কিস্তি বিতৰণ কৰে ।
লগতে পঢ়ক : নিৰ্বাচন চলি থকালৈকে জুবিন ক্ষেত্ৰলৈ নাযাওঁ… মুখ্যমন্ত্ৰী হিমন্ত বিশ্ব শৰ্মাৰ মন্তব্য