চীনৰ বৈদেশিক মন্ত্ৰালয়ে ৰাছিয়াত অনুষ্ঠিত ব্ৰিকছ সন্মিলনত প্ৰধানমন্ত্ৰী নৰেন্দ্ৰ মোদী আৰু ৰাষ্ট্ৰপতি জি জিনপিঙৰ মাজত সম্ভাৱ্য বৈঠক সম্পৰ্কীয় প্ৰশ্নসমূহ খাৰিজ কৰিছে । মুখপাত্ৰ লিন জিয়ানে কয় যে যদি নতুন কিবা আছে, তেওঁলোকে সংবাদ মাধ্যমক অৱগত কৰিব । দুয়োজন শীৰ্ষ নেতাই মঙলবাৰৰ পৰা আৰম্ভ হোৱা সন্মিলনত অংশগ্ৰহণ কৰিব ।
প্ৰধানমন্ত্ৰী মোদীৰ কাজান ভ্ৰমণৰ পূৰ্বে বৈদেশিক সচিব বিক্ৰম মিশ্ৰীয়ে আজি নতুন দিল্লীত সংবাদ মাধ্যমক অৱগত কৰে যে ভাৰত আৰু চীনৰ আলোচনাপন্থীয়ে পূব লাডাখত প্ৰকৃত নিয়ন্ত্ৰণ ৰেখাত টহল দিয়াৰ ক্ষেত্ৰত এক চুক্তিত উপনীত হৈছে । অৱশ্যে এই চুক্তি সন্দৰ্ভত বেইজিঙৰ পৰা এতিয়ালৈকে কোনো সঁহাৰি পোৱা নাই । ২০২০ চনৰ জুন মাহত গালৱান উপত্যকাত সংঘটিত হিংসাত্মক সংঘৰ্ষৰ পিছত ভাৰত আৰু চীনৰ মাজত সম্পৰ্ক যথেষ্ট অৱনতি ঘটিছিল । দশক দশকৰ পিছত এইটোৱেই আছিল আটাইতকৈ গুৰুতৰ সামৰিক সংঘাত ।
যোৱা সপ্তাহত চীনে ঘোষণা কৰিছিল যে জি জিনপিঙে ব্ৰিকছ শীৰ্ষ সন্মিলনত অংশগ্ৰহণ কৰিব, য’ত তেওঁ অন্যান্য দলৰ সৈতে কাম কৰি বৈশ্বিক দক্ষিণৰ বাবে এক নতুন যুগৰ সূচনা কৰিব । ব্ৰিকছৰ প্ৰতিষ্ঠাপক সদস্যসকলৰ ভিতৰত আছে ব্ৰাজিল, ৰাছিয়া, ভাৰত, চীন আৰু দক্ষিণ আফ্ৰিকা । আনহাতে শেহতীয়াকৈ ইজিপ্ত, ইথিওপিয়া, ইৰাণ, চৌদি আৰব আৰু সংযুক্ত আৰব আমিৰশ্বাহীক নতুন সদস্য হিচাপে অন্তৰ্ভুক্ত কৰা হৈছে ।
চলিত বৰ্ষৰ ব্ৰিকছ সন্মিলনৰ বিষয়বস্তু হৈছে ‘ন্যায্য বিশ্ব উন্নয়ন আৰু নিৰাপত্তাৰ বাবে বহুপক্ষীয়তাবাদ শক্তিশালী কৰা’ । চীনৰ বৈদেশিক মন্ত্ৰালয়ৰ মুখপাত্ৰ মাও নিঙে কয় যে জি জিনপিঙে সৰু-বৰ গোটৰ বৈঠক আৰু ব্ৰিকছ প্লাছৰ আলোচনাত অংশগ্ৰহণ কৰিব । তেওঁ লগতে কয় যে জিনপিঙে অন্যান্য নেতাৰ সৈতে আন্তঃৰাষ্ট্ৰীয় অংশীদাৰ, ব্ৰিকছৰ ব্যৱহাৰিক সহযোগিতা, ব্ৰিকছৰ সম্প্ৰসাৰণ আৰু আছিয়ানৰ স্বাৰ্থৰ গুৰুত্বপূৰ্ণ বিষয়সমূহৰ বিষয়ে আলোচনা কৰিব ।
