বুধবাৰে দক্ষিণ কোৰিয়াৰ ৰাষ্ট্ৰপতি ইউন চুক ইয়লৰ কাৰ্যালয়ত আৰক্ষীয়ে অভিযান চলায় । দেশখনত সামৰিক আইন জাপি দিয়াৰ তদন্তৰ অংশ হিচাপে এই অভিযান চলোৱা হয় । প্ৰতিবেদন অনুসৰি ছিউল মহানগৰ আৰক্ষী আৰু ৰাষ্ট্ৰীয় সংসদৰ আৰক্ষী গাৰ্ডৰ কাৰ্যালয়তো অভিযান চলোৱা হয় । ইফালে ইয়াৰ মাজতে দক্ষিণ কোৰিয়াৰ প্ৰাক্তন প্ৰতিৰক্ষা মন্ত্ৰী কিম ইয়ং হিয়ুনে আত্মহত্যাৰ চেষ্টা চলোৱাৰ বুলি খবৰ প্ৰকাশ পাইছে । অৱশ্যে তেওঁক উদ্ধাৰ কৰা হয় আৰু এতিয়া তেওঁৰ অৱস্থা সুস্থিৰ বুলি জানিব পৰা গৈছে ।
ইয়াৰ পূৰ্বে সামৰিক আইন কাৰ্যকৰী কৰা বিষয়াসকলৰ ওপৰত শাস্তি অব্যাহত আছে । ইয়াৰ অধীনত দক্ষিণ কোৰিয়াৰ ৰাষ্ট্ৰীয় আৰক্ষী সংস্থাৰ আয়ুক্ত জেনেৰেল চ’ জি হো আৰু আৰক্ষী বিষয়া কিম বং ছিকৰ বিৰুদ্ধেও ব্যৱস্থা গ্ৰহণ কৰা হৈছে । দুয়োকে ছিউলৰ নামদাইমুন থানাত আটক কৰি ৰখা হৈছে ।
ৰাজধানী ছিউলত অৱস্থিত সংসদৰ বাহিৰত বৃহৎ সংখ্যক আৰক্ষী বাহিনী নিয়োগ কৰাৰ অভিযোগ উত্থাপন হৈছে দুয়োজন জ্যেষ্ঠ আৰক্ষী বিষয়াৰ বিৰুদ্ধে, যিটো সাংসদসকলক ভিতৰলৈ প্ৰৱেশ কৰাত বাধা দিয়াৰ প্ৰয়াস হিচাপে গণ্য কৰা হৈছে । তাৰ পিছত সাংসদৰ এটা বৃহৎ দলে ৰাষ্ট্ৰপতি ইউনে জাপি দিয়া সামৰিক আইন প্ৰত্যাহাৰ কৰিবলৈ সংসদত ভোট দিব বিচাৰিছিল । কিন্তু আৰক্ষী বাহিনী নিয়োগ কৰাৰ বাবে মূল দুৱাৰেদি প্ৰৱেশ কৰিবলৈ দিয়া নহ’ল । পিছত সাংসদসকলে খিৰিকী আৰু অন্যান্য পথেৰে সংসদত প্ৰৱেশ কৰে ।
এই সমগ্ৰ ঘটনাৰ পিছত ৰাষ্ট্ৰপতি ইউনে তেওঁৰ প্ৰতিৰক্ষা মন্ত্ৰী কিম ইয়ং-হিউনৰ পদত্যাগ গ্ৰহণ কৰে । পিছত সামৰিক আইনৰ সিদ্ধান্তত তেওঁৰ ভূমিকাৰ বাবে গ্ৰেপ্তাৰ হয় । স্থানীয় সংবাদ মাধ্যমৰ মতে, কিম ইয়ং-হিউনৰ ওপৰতো ভ্ৰমণ নিষেধাজ্ঞা আৰোপ কৰা হৈছে আৰু বিষয়টোৰ ওপৰত তদন্ত চলি আছে । এই অভিযানত জড়িত তিনিজন জ্যেষ্ঠ সামৰিক বিষয়াকো শুকুৰবাৰে নিলম্বন কৰে প্ৰতিৰক্ষা মন্ত্ৰালয়ে ।
