দক্ষিণ কোৰিয়াৰ দক্ষিণ অঞ্চলত সংঘটিত হোৱা বনজুয়ে বিধ্বংসী ৰূপ ধাৰণ কৰিছে । এই বনজুইত এতিয়ালৈকে ২৬ জন লোকৰ মৃত্যু হৈছে । আনহাতে তিনিশৰো অধিক অট্টালিকা আৰু অন্যান্য গঠন ধ্বংস হৈছে । ধাৰাবাহিকভাৱে বৃদ্ধি পোৱা বনজুইৰ বাবে ২৪ হাজাৰৰো অধিক লোকে নিৰাপদ ঠাই বিচাৰি ঘৰৰ পৰা ওলাই আহিবলগীয়া হৈছে । জানিব পৰা মতে মৃতসকলৰ ভিতৰত এজন পাইলটো আছে । জুই নিয়ন্ত্ৰণৰ প্ৰয়াসত তেওঁৰ হেলিকপ্টাৰ দুৰ্ঘটনাগ্ৰস্ত হয় । ইয়াৰ উপৰিও প্ৰচণ্ড বতাহৰ ফলত জুইৰ শিখা বৃদ্ধি পোৱাত জুইত আবদ্ধ হৈ চাৰিজন অগ্নিনিৰ্বাপক বাহিনীৰ কৰ্মীৰ লগতে অন্য শ্ৰমিকৰ মৃত্যু হয় ।

জানিব পৰা মতে, জুই নিৰ্বাপন আৰু উদ্ধাৰৰ বাবে হাজাৰ হাজাৰ জোৱান আৰু হেলিকপ্টাৰ নিয়োগ কৰা হৈছে । কোৰিয়া বন সেৱাৰ মুৰব্বী লিম ছাং-ছেপে কয় যে বৃহস্পতিবাৰে কিছু পৰিমাণে বৰষুণৰ সম্ভাৱনা আছিল যদিও জুই নিৰ্বাপনৰ বাবে সেয়া যথেষ্ট নহয় ।

চৰকাৰী দুৰ্যোগ সঁহাৰি কেন্দ্ৰই জনোৱা মতে, বনজুইৰ ফলত দক্ষিণ-পূবৰ ৩৫,৮১০ হেক্টৰ (৮৮,৪৮৮ একৰ) ভূমি জ্বলি গৈছে । এতিয়ালৈকে দেশৰ ভিতৰতে এইটোৱেই আটাইতকৈ ডাঙৰ বনজুই বুলি অনুমান কৰা হৈছে । এই ঘটনাত আহত হৈছে ৩০ জন লোক । জুই নিয়ন্ত্ৰণৰ বাবে ৯ হাজাৰৰো অধিক লোক আৰু প্ৰায় ১২০খন হেলিকপ্টাৰ সংগঠিত কৰা হৈছে ।

ভাৰপ্ৰাপ্ত ৰাষ্ট্ৰপতি হান ডাক-ছুৱে কয় যে ক্ষতিৰ পৰিমাণ বৃদ্ধি পাইছে । এনে লোকচান আমি আগতে কেতিয়াও দেখা নাই । আমি আমাৰ সকলো সামৰ্থ্য জুই নিৰ্বাপনৰ ওপৰত কেন্দ্ৰিত কৰিছো । কোৰিয়া বন সেৱাই বৃদ্ধি কৰিছে অগ্নিকাণ্ডৰ সতৰ্কবাণী । স্থানীয় চৰকাৰসমূহক জৰুৰীকালীন সঁহাৰিৰ বাবে অধিক শ্ৰমিক নিয়োগ কৰিবলৈ কোৱা হৈছে, বনাঞ্চল আৰু উদ্যানসমূহত প্ৰৱেশৰ নিষেধাজ্ঞা কঠোৰ কৰিবলৈ কোৱা হৈছে, আৰু সামৰিক ইউনিটসমূহক লাইভ ফায়াৰ অনুশীলন বন্ধ কৰাৰ পৰামৰ্শ দিয়া হৈছে ।

বুধবাৰে নিশা প্ৰচণ্ড বতাহৰ ফলত অগ্নিকাণ্ড সংঘটিত হোৱাৰ পিছত দক্ষিণ-পূব আন্দোঙৰ দুখন গাঁও খালী কৰাৰ নিৰ্দেশ দিয়ে কৰ্তৃপক্ষই । প্ৰথমে অগ্নিনিৰ্বাপক বাহিনীয়ে নিয়ন্ত্ৰণলৈ আনে । কিন্তু বতাহৰ বাবে পুনৰ জুই জ্বলি উঠিল । বিষয়াসকলে জনোৱা মতে, অগ্নিকাণ্ডত ঘৰ-দুৱাৰ, কাৰখানা, বাহন আৰু কিছুমান ঐতিহাসিক অট্টালিকা ধ্বংস হয় । উইছংৰ গৌনছা মন্দিৰ কমপ্লেক্সৰ ৩০টা অট্টালিকাৰ ভিতৰত প্ৰায় ২০টা অট্টালিকা জ্বলি গৈছে । এইবোৰ আছিল সপ্তম শতিকাৰ অট্টালিকা ।

দেশত সামৰিক আইন জাপি দিয়াৰ বিতৰ্কিত প্ৰচেষ্টাক লৈ ৰাজনৈতিক সংকটৰ মাজতে দক্ষিণ কোৰিয়াৰ ৰাষ্ট্ৰীয় সংসদে ৰাষ্ট্ৰপতি ইউন চুক ইয়নক পদৰ পৰা অপসাৰণৰ বাবে শনিবাৰে ভোটদান কৰে । ভোটদানৰ অন্তত বিৰোধী দল ডেম’ক্ৰেটিক পাৰ্টিৰ নেতা পাৰ্ক চান-ডাইয়ে কয় যে আজিৰ মহাভিযোগ ৰাইজৰ বাবে এক বৃহৎ জয় ।

দৰাচলতে দক্ষিণ কোৰিয়াত সামৰিক আইন জাপি দিয়া কাৰ্য আৰু এই সিদ্ধান্ত বাতিলৰ পিছত ৰাষ্ট্ৰপতিগৰাকীয়ে জনসাধাৰণৰ ক্ষোভৰ সন্মুখীন হৈছে । ইতিমধ্যে ব্যাপক ক্ষোভৰ পিছত ৰাষ্ট্ৰপতি ইউন চুক ইয়নৰ চীফ অব ষ্টাফকে ধৰি কেইবাগৰাকীও শীৰ্ষ কেবিনেট সহায়কে পদত্যাগ কৰিছে । ইয়াৰ পিছতে সংসদত ৰাষ্ট্ৰপতিৰ বিৰুদ্ধে মহাভিযোগৰ প্ৰস্তাৱ দাখিল কৰা হয় । এই প্ৰস্তাৱ গৃহীত হোৱাৰ পিছত ইয়নক ৰাষ্ট্ৰপতি পদৰ পৰা অপসাৰণ কৰা হয় ।

২০৪ জন সংসদৰ সমৰ্থনত গৃহীত মহাভিযোগ প্ৰস্তাৱটো চিউলৰ সংসদ ভৱনৰ বাহিৰত হাজাৰ হাজাৰ প্ৰতিবাদকাৰী সমবেত হৈ বেনাৰ প্ৰদৰ্শন ইয়লক অপসাৰণৰ দাবীত শ্ল’গান দি থকাৰ সময়তে গৃহীত হয় । ৰাষ্ট্ৰপতিগৰাকী অপসাৰিত হোৱাৰ খবৰ প্ৰকাশ পোৱাৰ লগে লগে উল্লাসিত হৈ পৰে প্ৰতিবাদকাৰীসকল ।

প্ৰধানমন্ত্ৰীয়ে ভাৰপ্ৰাপ্ত ৰাষ্ট্ৰপতিৰ ভূমিকা পালন কৰিব-

ইয়ন এই পদৰ পৰা অপসাৰিত হোৱাৰ পিছত প্ৰধানমন্ত্ৰী হান ডাক-ছুৱে ভাৰপ্ৰাপ্ত ৰাষ্ট্ৰপতিৰ ভূমিকা গ্ৰহণ কৰিব । এতিয়া দক্ষিণ কোৰিয়াৰ সাংবিধানিক আদালতে ইয়নৰ শাস্তি সন্দৰ্ভত আলোচনা কৰি ১৮০ দিনৰ ভিতৰত ৰায়দান কৰিব । যদি আদালতে তেওঁক অপসাৰণৰ সমৰ্থন কৰে তেন্তে ইয়ন দক্ষিণ কোৰিয়াৰ ইতিহাসত দ্বিতীয়জন ৰাষ্ট্ৰপতি হিচাপে পৰিগণিত হ’ব যাৰ বিৰুদ্ধে মহাভিযোগ প্ৰস্তাৱ সফলতাৰে গৃহীত হৈছে । ইয়াৰ লগতে তেওঁক অপসাৰণৰ ৬০ দিনৰ ভিতৰত ৰাষ্ট্ৰপতি নিৰ্বাচন অনুষ্ঠিত কৰাটো বাধ্যতামূলক ।