মহাৰাষ্ট্ৰ বিধানসভা নিৰ্বাচনৰ ফলাফল ইতিমধ্যে সকলোৱে জানিব পাৰিছে। এই নিৰ্বাচনত, মহাযুতিয়ে এক চমৎকাৰ বিজয় লাভ কৰিছে আৰু মহা বিকাশ আগড়ীয়ে পৰাজয়ৰ সন্মুখীন হ’ব লগা হৈছে।
ইফালে, কোলহাপুৰত বিজয়ৰ পিছতে এক ভয়ংকৰ ঘটনা সংঘটিত হৈছে। নিৰ্বাচনত বিজয় উদযাপনৰ সময়তেই দাউ দাউ কৈ জ্বলি উঠিল মঞ্চ। অগ্নিকাণ্ডটোৰ ফলত বিধায়কসহ কেইবাগৰাকী মহিলা আহত হৈছে।
জানিব পৰা মতে কোলহাপুৰ জিলাৰ চান্দগড় বিধানসভা সমষ্টিৰ পৰা নিৰ্বাচনত জয়ী হোৱা শিৱাজী পাটিলক দলীয় কৰ্মীসকলে সম্বৰ্ধনা জনায়।
চান্দগড় তহচিলৰ মহাগাঁও গাঁৱত যেতিয়া কেইবাগৰাকী মান মহিলাই শিৱাজী পাটিলক আৰতি কৰি আছিল , সেই সময়তে কৰ্মীসকলে ওপৰৰ পৰা তেওঁলোকৰ ওপৰত বৃহৎ পৰিমাণৰ ফাকুৱা পেলাই দিছিল।
যাৰ ফলত ভয়ংকৰ অগ্নিকাণ্ডটো সংঘটিত হয়।তাৰ পিছতেই তেওঁলোকক হাস্পতাললৈ নিয়া হয়।
