যুদ্ধবিৰতি ঘোষণা কৰা স্বত্বেও, ইজৰাইল আৰু লেবাননৰ মাজত অৱ্যাহত আছে উত্তেজনা।বৰ্তমানেও ইজৰাইলৰ পৰা আক্ৰমণ অব্যাহত আছে। লেবাননৰ সংবাদ মাধ্যমৰ মতে, দক্ষিণ লেবাননৰ বিণ্ট জেবিল জিলাৰ বেইট লিফ গাঁৱত ইজৰাইলী বিমান আক্ৰমণত চাৰিজন লোক নিহত হোৱাৰ লগতে আন ছয়জন আহত হয়।
শুক্ৰবাৰে, ইজৰাইলী বায়ু সেনাই চিৰিয়া-লেবানিজ সীমান্তৰ ওচৰত বিমান আক্ৰমণ চলাইছিল। আইডিএফে কৈছিল যে ই “অস্ত্ৰ চোৰাং পথ”ক লক্ষ্য কৰি আক্ৰমণটো চলাইছিল। এই পথটো হিজবুল্লাহৰ হৈ অস্ত্ৰ পৰিবহনৰ বাবে ব্যৱহাৰ কৰা হৈছিল।
বিবৃতিটোত কোৱা হৈছে, “এই আক্ৰমণ টো শেহতীয়া সপ্তাহবোৰত আইডিএফৰ দ্বাৰা চিৰিয়া-লেবানিজ সীমান্তত চিৰিয়াৰ শাসনৰ দ্বাৰা পৰিচালিত অস্ত্ৰ চোৰাং সৰবৰাহ পথসমূহ ধ্বংস কৰাৰ এক চলিত প্ৰচেষ্টাৰ অংশ।”
এই আক্ৰমণৰ উদ্দেশ্য আছিল হিজবুল্লাহৰ ইউনিট ৪৪০০ দুৰ্বল কৰা, যাক ইজৰাইলী নাগৰিক আৰু সৈনিকৰ বিৰুদ্ধে ‘সন্ত্ৰাসবাদী আক্ৰমণ’ৰ বাবে ব্যৱহাৰ কৰা হৈছিল।
ইজৰাইল আৰু লেবাননৰ সশস্ত্ৰ গোট হিজবুল্লাহৰ মাজত প্ৰায় ১৪ মাহ ৰ যুঁজ সমাপ্ত কৰাৰ লক্ষ্যৰে ২৭ নৱেম্বৰত আমেৰিকা যুক্তৰাষ্ট্ৰৰ মধ্যস্থতাত যুদ্ধবিৰতি কাৰ্যকৰী হয়।
চুক্তিৰ অধীনত, দুয়োপক্ষই ৬০ দিনৰ বাবে শত্ৰুতাৰ সমাপ্তিৰ বাবে সন্মত হয়, য’ত ইজৰাইলে ক্ৰমান্বয়ে দক্ষিণ লেবাননৰ পৰা নিজৰ বাহিনী প্ৰত্যাহাৰ কৰিব আৰু হিজবুল্লাহ লিটানি নদীৰ উত্তৰে পিছুৱাই যাব।
যুদ্ধবিৰতি ৰক্ষা কৰাৰ পিছতো, দুয়োপক্ষই ইজনে সিজনক আক্ৰমণ অব্যাহত ৰখাৰ বাবে উত্তেজনা অধিক হৈ আছে, যুদ্ধবিৰতি উলংঘনৰ অভিযোগত ইজনে সিজনক দোষাৰোপ কৰিছে। এইটোৱে চুক্তিৰ স্থিৰতাৰ বিষয়ে উদ্বেগ প্ৰকাশ কৰিছে।
