ম্যানমাৰত সংঘটিত হোৱা ভয়ংকৰ ভূমিকম্পৰ পিছত পৰিস্থিতি ভয়াৱহ হৈ পৰিছে । ভাৰতে এই কঠিন সময়ত ম্যানমাৰৰ প্ৰতি সহমৰ্মিতা প্ৰকাশ কৰাৰ লগতে সকলো ধৰণৰ সহায়ৰ আশ্বাস দিছে । প্ৰধানমন্ত্ৰী নৰেন্দ্ৰ মোদীয়ে এক্সত পোষ্ট কৰি জনাইছে যে, ম্যানমাৰৰ জ্যেষ্ঠ জেনেৰেল এইচ.ই. মিন আং হিলিঙৰ সৈতে তেওঁ কথা পাতিছে ।
প্ৰধানমন্ত্ৰীয়ে ভয়াৱহ ভূমিকম্পত প্ৰাণ আৰু সা-সম্পত্তিৰ ক্ষতিত গভীৰ শোক প্ৰকাশ কৰি কয় যে ভাৰতে এক ঘনিষ্ঠ বন্ধু আৰু প্ৰতিবেশী হিচাপে এই কঠিন সময়ত ম্যানমাৰৰ জনসাধাৰণৰ সৈতে দৃঢ়তাৰে থিয় দিছে । অপাৰেচন ব্ৰহ্মৰ অধীনত ক্ষতিগ্ৰস্ত অঞ্চললৈ দুৰ্যোগ সাহায্য সামগ্ৰী, মানৱীয় সাহায্য, অনুসন্ধান আৰু উদ্ধাৰকাৰী দল দ্ৰুতগতিত প্ৰেৰণ কৰা হৈছে ।
অপাৰেচন ব্ৰহ্মৰ অধীনত সাহায্য অভিযান আৰম্ভ-
ভাৰতে অপাৰেচন ব্ৰহ্মৰ অধীনত ক্ষতিগ্ৰস্ত অঞ্চললৈ দুৰ্যোগ সাহায্য সামগ্ৰী, মানৱীয় সাহায্য, অনুসন্ধান আৰু উদ্ধাৰকাৰী দল প্ৰেৰণ কৰি সাহায্যৰ দ্ৰুত যোগান নিশ্চিত কৰিছে । ভাৰতীয় দলসমূহে সাহায্য অভিযানত সক্ৰিয়ভাৱে কাম কৰিব, যাতে সৰ্বাধিক সংখ্যক লোকক নিৰাপদে উলিয়াই আনিব পৰা যায় আৰু প্ৰয়োজনীয় সহায় আগবঢ়াব পৰা যায় । এই শোকাৱহ পৰিস্থিতিৰ পিছত দুয়োখন দেশৰ মাজত সমন্বয় অব্যাহত আছে, আৰু ভাৰতে সম্ভৱপৰ সকলো সাহায্য আগবঢ়াবলৈ সাজু হৈ আছে ।
শুকুৰবাৰে ম্যানমাৰত সংঘটিত হোৱা ৭.৭ আৰু ৬.৪ প্ৰাবল্যৰ দুটা ভূমিকম্পক লৈ উদ্বেগ প্ৰকাশ কৰি প্ৰধানমন্ত্ৰী নৰেন্দ্ৰ মোদীয়ে দক্ষিণ-পূব এছিয়াৰ দেশ আৰু থাইলেণ্ডলৈ হাত আগবঢ়াই সহায়ৰ আশ্বাস দিয়ে আৰু সকলোৰে সুৰক্ষা আৰু মংগলৰ বাবে প্ৰাৰ্থনা কৰে ।
ইনষ্টাগ্ৰামত এটা পোষ্টত প্ৰধানমন্ত্ৰী মোদীয়ে কয়, “ম্যানমাৰ আৰু থাইলেণ্ডৰ ভূমিকম্পৰ পিছৰ পৰিস্থিতিক লৈ মই চিন্তিত । সকলোৰে সুৰক্ষা আৰু মংগলৰ বাবে প্ৰাৰ্থনা কৰিছো । ভাৰতে সম্ভৱপৰ সকলো সহায় আগবঢ়াবলৈ সাজু । এই সন্দৰ্ভত আমি আমাৰ বিষয়াসকলক সাজু থাকিবলৈ অনুৰোধ জনাইছো । লগতে বৈদেশিক মন্ত্ৰালয়ক ম্যানমাৰ আৰু থাইলেণ্ড চৰকাৰৰ সৈতে যোগাযোগত থাকিবলৈ কোৱা হৈছে ।”
ম্যানমাৰত ভূমিকম্পৰ বিধ্বংসী ৰূপ-
ম্যানমাৰ আৰু চুবুৰীয়া দেশ থাইলেণ্ডত ক্ৰমে ৭.৭ আৰু ৭.২ প্ৰাবল্যৰ শক্তিশালী ভূমিকম্পই অট্টালিকা, দলং আৰু বৌদ্ধ মঠ ধ্বংস কৰে । ম্যানমাৰত কমেও এহাজাৰ জন লোকৰ মৃত্যু হৈছে, য’ত আটাইতকৈ বেছি ক্ষতিগ্ৰস্ত চহৰ দুখনৰ ছবি আৰু ভিডিঅ’ত ব্যাপক ক্ষতিসাধনৰ দৃশ্য পৰিলক্ষিত হৈছে । থাইলেণ্ডৰ ৰাজধানী বেংককত ভূমিকম্পৰ ফলত নিৰ্মাণৰত এটা ওখ অট্টালিকা ভাঙি পৰাত কমেও ১০ জন লোকৰ মৃত্যু হয় ।
