ম্যানমাৰত সংঘটিত হোৱা ভয়াৱহ ভূমিকম্পত মৃত্যু হোৱা লোকৰ সংখ্যা ক্ৰমাগতভাৱে বৃদ্ধি পাইছে । ভূমিকম্পৰ ফলত ভাঙি পৰা অট্টালিকাসমূহৰ পৰা মৃতদেহ আঁতৰোৱাৰ প্ৰক্ৰিয়া অব্যাহত আছে । এই বিধ্বংসী ভূমিকম্পৰ ফলত এতিয়ালৈকে দেশখনত ২৭০০ লোকৰ মৃত্যু হৈছে ।

২৮ মাৰ্চত ম্যানমাৰত ৭.৭ প্ৰাবল্যৰ ভূমিকম্প সংঘটিত হয় । ইয়াৰ পিছত ৬.৪ তীব্ৰতাৰ কঁপনিও অনুভৱ হয় । মাটিৰ পৰা ১০ কিলোমিটাৰ তলত, মাণ্ডলে আৰু ছাগেং চহৰৰ সীমান্তত এই ভূমিকম্পৰ কেন্দ্ৰবিন্দু আছিল । ভূমিকম্পৰ ফলত আন্তঃগাঁথনি, পথ আৰু আৱাসগৃহৰ ব্যাপক ক্ষতিসাধন হয় । ভূমিকম্পৰ কম্পন কেৱল ম্যানমাৰতে নহয়, চুবুৰীয়া দেশতো অনুভূত হৈছিল । থাইলেণ্ডৰ চিয়াং মাই চহৰতো এই ভূমিকম্পৰ ফলত যথেষ্ট ক্ষতিসাধন হয় ।

ম্যানমাৰৰ সামৰিক চৰকাৰৰ মুৰব্বী জ্যেষ্ঠ জেনেৰেল মিন আং হ্লেইঙে ৰাজধানী নেইপিড’ত সাংবাদিকৰ আগত কয় যে এতিয়ালৈকে ২৭১৯ জন লোকৰ মৃতদেহ উদ্ধাৰ হৈছে । আনহাতে ৪,৫২১জন আহত হোৱাৰ বিপৰীতে ৪৪১জন সন্ধানহীন হৈ আছে । উদ্ধাৰকাৰী দল এতিয়াও ভূমিকম্পৰ ফলত ক্ষতিগ্ৰস্ত বহু অঞ্চলত উপস্থিত হোৱা নাই । গতিকে এই সংখ্যা বৃদ্ধি পোৱাৰ সম্ভাৱনা আছে । উদ্ধাৰ অভিযান অব্যাহত আছে ।

ইফালে সাহায্য আৰু উদ্ধাৰ কৰ্মীৰ লগতে স্থানীয় লোকেও নিজৰ আপোনজনক বিচাৰি ধ্বংসাৱশেষ আঁতৰোৱাত ব্যস্ত হৈ পৰিছে । অত্যধিক গৰমৰ বাবে মৃতদেহবোৰৰ পৰা দুৰ্গন্ধ ওলাবলৈ আৰম্ভ কৰিছে । আনকি বতাহত উশাহ লোৱাটোও কঠিন হৈ পৰিছে । পৰিস্থিতি এনেকুৱা হৈ পৰিছে যে প্ৰায় ৩৫ লাখ লোক গৃহহীন হৈ পৰিছে । লগতে চিকিৎসালয়ত স্থানৰ অভাৱ হোৱাৰ লগতে ৰাস্তাত ৰোগীক সাময়িকভাৱে চিকিৎসা প্ৰদান কৰা হৈছে ।

ভাৰতে প্ৰেৰণ কৰিছে সাহাৰ্য-

ভাৰতে প্ৰথমে ম্যানমাৰলৈ সহায়ৰ হাত আগবঢ়াইছিল । অপাৰেচন ব্ৰহ্মাৰ অধীনত দেশখনলৈ সাহায্য সামগ্ৰী আৰু সাহায্য দল প্ৰেৰণ কৰা হৈছে । ২৯ মাৰ্চ (শনিবাৰ) ভাৰতে ম্যানমাৰক সহায় কৰিবলৈ দুখন নৌসেনাৰ জাহাজ প্ৰেৰণ কৰে । ইয়াৰ জৰিয়তে সেনাৰ এখন ক্ষেত্ৰ চিকিৎসালয় স্থাপনৰ বাবেও যোগান আৰু ১১৮ জন চিকিৎসা কৰ্মী প্ৰেৰণ কৰা হয় । এইবোৰৰ মাজেৰে আহতসকলক সহায় কৰাৰ ব্যৱস্থা কৰা হৈছে ।

২৮ মাৰ্চত ম্যানমাৰত সংঘটিত হোৱা বৃহৎ ভূমিকম্পত মৃত্যু হোৱা লোকৰ সংখ্যা ২০৫৬ লৈ বৃদ্ধি পোৱাৰ বিপৰীতে ৩৯০০ৰো অধিক লোক আহত হৈছে বুলি তথ্য প্ৰকাশ পাইছে । লগতে এই ভূমিকম্পত প্ৰায় ২৭০ জন লোক সন্ধানহীন হৈ আছে । ম্যানমাৰৰ শাসকীয় জুন্টা চৰকাৰে সোমবাৰে এই তথ্য প্ৰদান কৰে ।

৭.৭ প্ৰাবল্যৰ এই ভয়াৱহ ভূমিকম্পৰ পিছত ধ্বংসাৱশেষত আবদ্ধ হৈ থকা লোকসকলক উদ্ধাৰৰ বাবে অভিযান অব্যাহত আছে । এই শোকাৱহ দুৰ্ঘটনাত নিহতসকলৰ সন্মানত এক সপ্তাহৰ ৰাষ্ট্ৰীয় শোক কাৰ্যসূচী ঘোষণা কৰিছে চৰকাৰে ।

তিনিদিনৰ মূৰত ধ্বংসাৱশেষৰ পৰা ওলাই আহিল মহিলা-

সোমবাৰে বিষয়াসকলে জনোৱা মতে, মাণ্ডেলেৰ গ্ৰেট ৱাল হোটেলৰ ধ্বংসাৱশেষৰ পৰা এগৰাকী মহিলাক নিৰাপদে উদ্ধাৰ কৰা হয় । তিনিদিনৰ মূৰত কাৰোবাক জীৱিত অৱস্থাত বিচাৰি পোৱাত আশাৰ সৃষ্টি হয় । ম্যানমাৰত থকা চীনৰ দূতাবাসে ফেচবুক পোষ্টযোগে মহিলাগৰাকীৰ অৱস্থা সুস্থিৰ বুলি অৱগত কৰিছে ।

মাণ্ডালে ম্যানমাৰৰ ভূমিকম্পৰ কেন্দ্ৰৰ সমীপত অৱস্থিত আৰু এই ভূমিকম্পই থাইলেণ্ডকে ধৰি কেইবাখনো চুবুৰীয়া দেশতো প্ৰভাৱ পেলাই, যত ৰাজধানী বেংকককে ধৰি বহু অঞ্চলত বিস্তৰ ক্ষয়-ক্ষতিৰ বাতৰি পোৱা গৈছে ।

বেংককত অব্যাহত উদ্ধাৰ অভিযান-

বেংককত উদ্ধাৰ কৰ্মীয়ে নিৰ্মাণৰত আকাশচুম্বী ঘৰৰ ধ্বংসাৱশেষৰ তলত আবদ্ধ হৈ থকা ৭৬ জন লোকক উদ্ধাৰৰ বাবে সোমবাৰেও নিজৰ প্ৰচেষ্টা অব্যাহত ৰাখিছে । ভূমিকম্পৰ প্ৰভাৱত এই অট্টালিকাৰ গঠন ভাঙি পৰে । দেওবাৰলৈকে থাইলেণ্ডত মৃত্যুৰ সংখ্যা ১৮ জন যদিও ধ্বংসাৱশেষৰ পৰা আৰু অধিক মৃতদেহ উদ্ধাৰ হোৱাৰ আশংকা কৰা হৈছে ।

ভাৰতকে ধৰি বহু দেশৰ সাহাৰ্য প্ৰেৰণ-

ম্যানমাৰ ইতিমধ্যে গৃহযুদ্ধৰ বাবে সংকটত পৰিছিল, কিন্তু এতিয়া এই ভূমিকম্পই দেশখনত পৰিস্থিতি আৰু বেয়া কৰি তুলিছে । ভাৰতকে ধৰি বহু দেশ আৰু ৰাষ্ট্ৰসংঘৰ দৰে আন্তঃৰাষ্ট্ৰীয় সংস্থাই এই দুৰ্যোগত ক্ষতিগ্ৰস্ত ২৩ হাজাৰৰো অধিক লোকক সাহায্য প্ৰদানৰ বাবে সাহায্য প্ৰেৰণ কৰিছে ।

ম্যানমাৰৰ ভূমিকম্পত ক্ষতিগ্ৰস্ত লোকক সহায়ৰ বাবে ভাৰত চৰকাৰে আৰম্ভ কৰিছে অপাৰেচন ব্ৰহ্ম । ভুক্তভোগীক সহায় কৰিবলৈ বায়ুসেনাৰ সহায়ত সাহাৰ্য প্ৰেৰণ কৰা হৈছে । এন ডি আৰ এফৰ এটা দলো ম্যানমাৰলৈ প্ৰেৰণ কৰা হৈছে । ইয়াৰ উপৰিও উত্তৰ প্ৰদেশৰ আগ্ৰাৰ ফিল্ড হাস্পতালৰ পৰাও ১১৮ গৰাকী চিকিৎসা কৰ্মীক ম্যানমাৰলৈ প্ৰেৰণ কৰা হৈছে । তদুপৰি এতিয়া নৌসেনাৰ এটা দলে সাহায্য আৰু উদ্ধাৰ সামগ্ৰী লৈ ইয়াংগনলৈ ৰাওনা হৈছে ।

অপাৰেচন ব্ৰহ্মৰ তাৎপৰ্য-

এদিন পূৰ্বে বৈদেশিক মন্ত্ৰালয়ে অপাৰেচন ব্ৰহ্মৰ বিষয়ে তথ্য দিছিল । বৈদেশিক মন্ত্ৰালয়ৰ মুখপাত্ৰ ৰণধীৰ জয়ছোৱালে কৈছিল যে ব্ৰহ্মা সৃষ্টিৰ দেৱতা, সেয়েহে এই অভিযানৰ নাম বিশেষ । তেওঁ কয়, সংকটৰ সময়ত প্ৰথমে সহায় কৰাটো ভাৰতৰ বৈদেশিক নীতিৰ অংশ ।

ভাৰতৰ নীতি হৈছে সংকটৰ সময়ত সহায় কৰা-

বৈদেশিক মন্ত্ৰালয়ৰ তথ্য অনুসৰি ভাৰতে প্রথম প্রতিক্রিয়া প্রদান কৰা দেশ ৷ ম্যানমাৰত যাগী ঘূৰ্ণীবতাহে বিধ্বংসী ৰূপ ধাৰণ কৰাৰ সময়তো ভাৰতে উদ্ধাৰ অভিযান আৰম্ভ কৰিছিল । আমি ম্যানমাৰৰ জনসাধাৰণক সাহায্য, বস্তুগত, মানৱীয় সাহায্য আগবঢ়াইছিলো, কেৱল ম্যানমাৰৰ জনসাধাৰণকে নহয়, ক্ষতিগ্ৰস্ত হোৱা আন বহু দেশো ইয়াৰ দ্বাৰা প্ৰভাৱিত হৈছিল ।

ভূমিকম্পত বেংককত ভাগি পৰিল ৩৩ মহলীয়া অট্টালিকা-

উল্লেখ্য যে ম্যানমাৰত হোৱা ভূমিকম্পৰ বাবে থাইলেণ্ডতো বিপুল ক্ষতিসাধন হৈছে । এটা ভিডিঅ’ত বেংককত ৩৩ মহলীয়া অট্টালিকা ভাঙি পৰা দেখা গৈছে । এই ঘটনাত চীনৰ সংযোগৰ খবৰ আহিছে । এই বিষয়ত থাইলেণ্ড চৰকাৰে তদন্ত আৰম্ভ কৰিছে ।