ভাৰত আৰু অষ্ট্ৰেলিয়াৰ মাজত দ্বিতীয়খন টেষ্ট মেচ ৬ ডিচেম্বৰৰ পৰা ১০ ডিচেম্বৰলৈ এডিলেইডত অনুষ্ঠিত হ’ব । এইখন হ’ব দিবা-নৈশ টেষ্ট মেচ । এই খেলখন ভাৰতীয় সময় অনুসৰি পুৱা ৯:৩০ বজাৰ পৰা অনুষ্ঠিত হ’ব । অনুৰাগীসকলে আগ্ৰহেৰে অপেক্ষা কৰি আছে ভাৰত আৰু অষ্ট্ৰেলিয়াৰ এই টেষ্ট মেচখনৰ বাবে । দিবা-নৈশ টেষ্ট মেচত অষ্ট্ৰেলিয়াৰ ভাল অভিলেখ আছে যদিও ভাৰতীয় দলটোও অতি বিপজ্জনক ফৰ্মত আছে । প্ৰথম টেষ্টত পাৰ্থত ঐতিহাসিক জয়ৰ পিছত এতিয়া এডিলেইডত অনুষ্ঠিত হ’বলগীয়া দিবা-নৈশ টেষ্ট মেচত জয়ী হোৱাৰ বাবে টিম ইণ্ডিয়া শক্তিশালী প্ৰতিদ্বন্দ্বী হিচাপে বিবেচিত হৈছে । ইফালে ভাৰতত এনে ৪ জন বিপজ্জনক খেলুৱৈ আছে যিয়ে দিবা-নৈশ এই টেষ্ট মেচত অকলেই কেংগাৰু দলক বিধ্বস্ত কৰিব পাৰে । জানক এই ৪ জন খেলুৱৈৰ বিষয়ে-
বিৰাট কোহলী-
টিম ইণ্ডিয়াৰ শক্তিশালী বেটছমেন বিৰাট কোহলী পুনৰ ফৰ্মলৈ ঘূৰি আহিছে । ৬ ডিচেম্বৰৰ পৰা এডিলেইডত অনুষ্ঠিত হ’বলগীয়া দিবা-নৈশ টেষ্ট মেচখনত পুনৰ ৰান সংগ্ৰহৰ বাবে সাজু হৈছে বিৰাট কোহলীৰ বেট । দিবা-নৈশ টেষ্ট মেচত বিৰাট কোহলীৰ অভিলেখ অতি উৎকৃষ্ট । বিৰাট কোহলীয়ে এতিয়ালৈকে ৪ খন দিবা-নৈশ টেষ্ট মেচ খেলিছে, য’ত তেওঁ ৪৬.১৬ গড়ে ২৭৭ ৰান সংগ্ৰহ কৰিছে । এই সময়ছোৱাত বিৰাট কোহলীয়ে ১টা শতক আৰু ১টা অৰ্ধশতক অৰ্জন কৰিছে । পাৰ্থত অনুষ্ঠিত হোৱা প্ৰথমখন টেষ্ট মেচত বিৰাট কোহলীয়ে ১৪৩টা বলত ১০০ ৰান সংগ্ৰহ কৰিছিল । এই সময়ছোৱাত বিৰাট কোহলীয়ে ৬৯.৯৩ ষ্ট্ৰাইক ৰেটত বেটিং কৰাৰ লগতে ৮টা চাৰি আৰু ২টা ছয় কোবাই । এডিলেইডত অনুষ্ঠিত হ’বলগীয়া দিবা-নৈশ টেষ্ট মেচখনতো বিৰাট কোহলীয়ে নিজৰ একে ফৰ্ম বজাই ৰাখিব বুলি আশা কৰা হৈছে ।
যশপ্ৰীত বুমৰাহ-
৬ ডিচেম্বৰৰ পৰা এডিলেইডত অনুষ্ঠিত হ’বলগীয়া দিবা-নৈশ টেষ্ট মেচখনত বেগী বলাৰ যশপ্ৰীত বুমৰাহ অষ্ট্ৰেলিয়াৰ দলটোৰ বাবে মূৰৰ কামোৰণি হিচাপে প্ৰমাণিত হ’ব পাৰে । গুলপীয়া বলৰ সৈতে যশপ্ৰীত বুমৰাহৰ বলিং আৰু অধিক মাৰাত্মক হৈ পৰিব, যিটো কেংগাৰুৰ বেটছমেনসকলৰ বাবে এক কঠিন প্ৰত্যাহ্বান হৈ পৰিব । অষ্ট্ৰেলিয়াৰ বিৰুদ্ধে পাৰ্থ টেষ্ট মেচত টিম ইণ্ডিয়াৰ সৰ্ববৃহৎ মেচ উইনাৰ হিচাপে প্ৰমাণিত হ’ল যশপ্ৰীত বুমৰাহ । পাৰ্থ টেষ্টত মুঠ ৮টা উইকেট দখল কৰাৰ লগতে মেচখনৰ শ্ৰেষ্ঠ খেলুৱৈও আছিল যশপ্ৰীত বুমৰাহ । যশপ্ৰীত বুমৰাহৰ বিধ্বংসী বলিং আক্ৰমণৰ বাবে ভাৰতে ২৯৫ ৰাণত এই মেচত জয়লাভ কৰে । পিংক বল টেষ্টত যশপ্ৰীত বুমৰাহৰ বলিং আৰু অধিক চোকা হ’ব । পিংক বল টেষ্টত যশপ্ৰীত বুমৰাৰ ডাঙৰ ভূমিকা থাকিব । ফাষ্ট বল, বিপজ্জনক বাউন্সাৰ আৰু পিন ব্ৰেকিং ইয়ৰ্কাৰ হৈছে যশপ্ৰীত বুমৰাহৰ বলিঙৰ আটাইতকৈ ডাঙৰ গহণা ।
যশস্বী জয়ছোৱাল-
এডিলেইডত অনুষ্ঠিত হ’বলগীয়া দিবা-নৈশ টেষ্টত ভাৰতৰ বিস্ফোৰক বাওঁহতীয়া অ’পেনাৰ যশস্বী জয়ছোৱালে অষ্ট্ৰেলিয়াক ব্যতিব্যস্ত কৰি তুলিব পাৰে । যশস্বী জয়ছোৱাল এজন আগ্ৰাসী বেটছমেন আৰু তেওঁ নিজৰ বিধ্বংসী বেটিঙেৰে এটা অধিবেশনতে টেষ্ট মেচৰ গতিপথ সলনি কৰাত পাকৈত । নিজৰ সামৰ্থৰ বাবেই এডিলেইডত অষ্ট্ৰেলিয়াৰ বিৰুদ্ধে দি্বা-নৈশ টেষ্টত ভাৰতীয় দলৰ বাবে সৰ্ববৃহৎ ‘গেম চেঞ্জাৰ’ হিচাপে প্ৰমাণিত হ’ব পাৰে যশস্বী জয়ছোৱাল । প্ৰথমটো অষ্ট্ৰেলিয়া ভ্ৰমণত শতক অৰ্জন কৰি যশস্বী জয়ছোৱালে সমগ্ৰ বিশ্বক কয় যে তেওঁ এজন বিশ্বমানৰ অপেনিং বেটছমেন । পাৰ্থত অনুষ্ঠিত হোৱা প্ৰথমখন টেষ্ট মেচত যশস্বী জয়ছোৱালে ২৯৭টা বলত ১৬১ ৰান সংগ্ৰহ কৰিছিল । এই সময়ছোৱাত যশস্বী জয়ছোৱালে ৫৪.২১ ষ্ট্ৰাইক ৰেটত বেটিং কৰি ১৫টা চাৰি আৰু ৩টা ছয় কোবাই । বাওঁহতীয়া বেটছমেন যশস্বী জয়ছোৱালে দিবা-নৈশ টেষ্টত অষ্ট্ৰেলিয়াৰ বলাৰ পেট কামিন্স, মিচেল ষ্টাৰ্ক, নাথান লায়ন আৰু স্কট ব’লেণ্ডকো নিৰ্দয় প্ৰহাৰ কৰিব পাৰে ।
ঋষভ পন্ট-
এডিলেইডত অনুষ্ঠিত হ’বলগীয়া দিবা-নৈশ টেষ্টত অষ্ট্ৰেলিয়াৰ বাবে সৰ্বাধিক ভাবুকি কঢ়িয়াই অনা বেটছমেনগৰাকী হৈছে ঋষভ পণ্ট । উইকেটকীপাৰ বেটছমেন ঋষভ পন্ট অষ্ট্ৰেলিয়ান দলৰ বলাৰৰ বাবে ডাঙৰ ভাবুকি হিচাপে প্ৰমাণিত হ’ব পাৰে । ঋষভ পন্টৰ লক্ষ্য হ’ব কেংগাৰুৰ অফ স্পীনাৰ নাথান লায়ন । ঋষভ পণ্টে বিগত সময়ত নাথান লায়নৰ বিৰুদ্ধে বহু ৰান সংগ্ৰহ কৰিছে । অষ্ট্ৰেলিয়াৰ মাটিত টেষ্ট মেচত ঋষভ পন্টৰ অভিলেখ ভাল । অষ্ট্ৰেলিয়াত এই পৰ্যন্ত ৮ খন টেষ্ট মেচ খেলিছে ঋষভ পণ্টে । এই সময়ছোৱাত ঋষভ পন্টে ৬৬২ ৰান সংগ্ৰহ কৰিছে । অষ্ট্ৰেলিয়াৰ মাটিত টেষ্ট মেচত ১ শতক আৰু ২টা অৰ্ধশতক অৰ্জন কৰিছে ঋষভ পন্টে । এডিলেইডত অনুষ্ঠিত হ’বলগীয়া দিবা-নৈশ টেষ্টত টিম ইণ্ডিয়াৰ হৈ সৰ্ববৃহৎ মেচ বিজয়ী হিচাপে প্ৰমাণিত হ’ব পাৰে ঋষভ পণ্ট ।
