ভাৰত-পাকিস্তানৰ উত্তেজনাৰ বাবে পিছুৱাই দিয়া হৈছিল আই পি এল ২০২৫ । ইয়াৰ পিছত বহু বিদেশী খেলুৱৈ নিজৰ দেশলৈ উভতি যায় । এতিয়া ১৭ মে’ৰ পৰা পুনৰ আৰম্ভ হ’ব আই পি এল । ইয়াৰ মাজতে খবৰ আহিছিল যে আই পি এল ২০২৫ৰ বাকী থকা মেচবোৰত অষ্ট্ৰেলিয়াৰ খেলুৱৈয়ে খেলিব নোৱাৰিব । এতিয়া এই সন্দৰ্ভত ক্ৰিকেট অষ্ট্ৰেলিয়াই এটা ডাঙৰ আপডেট দিছে । ক্ৰিকেট অষ্ট্ৰেলিয়াৰ এই সিদ্ধান্তই আই পি এল দলসমূহক যথেষ্ট সকাহ দিব ।

মঙলবাৰে ক্ৰিকেট অষ্ট্ৰেলিয়াই কয় যে যদি অষ্ট্ৰেলিয়াৰ খেলুৱৈয়ে আই পি এল খেলিবলৈ যাব বিচাৰে তেন্তে যাব পাৰে । তেওঁলোকক ব’ৰ্ডে ৰখাব নোৱাৰে । তেওঁলোক যাব বিচাৰে নে নাযায় সেয়া খেলুৱৈৰ ওপৰত নিৰ্ভৰশীল । উল্লেখ্য যে অষ্ট্ৰেলিয়াই জুন মাহত বিশ্ব টেষ্ট চেম্পিয়নশ্বিপৰ ফাইনেল খেলিব লাগিব । এনে পৰিস্থিতিত এই খিতাপ মেচৰ বাবেও প্ৰস্তুতি চলাব লাগিব । এই কাৰণতে কোৱা হৈছিল যে আই পি এলৰ বাকী থকা মেচসমূহ কেংগাৰু খেলুৱৈসকলৰ বাবে খেলাটো কঠিন হ’ব ।

ক্ৰিকেট অষ্ট্ৰেলিয়াই আই পি এললৈ ঘূৰি অহা খেলুৱৈসকলৰ ব্যক্তিগত সিদ্ধান্তক সন্মান জনাইছে । সোমবাৰে বি চি চি আইয়ে সিদ্ধান্ত লয় যে ১৭ মে’ৰ পৰা ৬টা স্থানত পুনৰ আৰম্ভ হ’ব আই পি এলৰ এই ছিজন । ৩ জুনত অনুষ্ঠিত হ’ব লীগৰ ফাইনেল । প্লে অফৰ খেলৰ স্থান এতিয়াও ঘোষণা কৰা হোৱা নাই ।

ইয়াৰ ফলত অষ্ট্ৰেলিয়া আৰু দক্ষিণ আফ্ৰিকাৰ টেষ্ট ক্ৰিকেটাৰসকলৰ বাবে এক দ্বিধাদ্বন্দ্বৰ সৃষ্টি হৈছে কিয়নো অহা ১১ জুনৰ পৰা লৰ্ডছত দুয়োটা দলৰ মাজত ডব্লিউ টি চি ফাইনেল অনুষ্ঠিত হ’ব । এটা বিবৃতিত ক্ৰিকেট অষ্ট্ৰেলিয়াই কয় যে শনিবাৰৰ পৰা আই পি এল পুনৰ আৰম্ভ হোৱাৰ ঘোষণাৰ পিছত ক্ৰিকেট অষ্ট্ৰেলিয়াই সিদ্ধান্ত লৈছে যে খেলুৱৈসকলে ভাৰতলৈ উভতি যোৱা বা নোযোৱাৰ ব্যক্তিগত সিদ্ধান্তক সন্মান কৰিব । ইয়াত আৰু কোৱা হৈছে যে, আমি নিৰাপত্তাৰ ব্যৱস্থাৰ সন্দৰ্ভত বি চি চি আই আৰু অষ্ট্ৰেলিয়া চৰকাৰৰ সৈতে যোগাযোগত আছো ।

ভাৰতীয় মহিলা দলৰ পূৰ্বে পুৰুষ ক্ৰিকেট দলে অষ্ট্ৰেলিয়া ভ্ৰমণ কৰিব । পুৰুষৰ দলটোৱে চলিত বৰ্ষৰ শেষৰ ফালে অষ্ট্ৰেলিয়ালৈ ভ্ৰমণত সীমিত অভাৰৰ শৃংখলা খেলিব । ক্ৰিকেট অষ্ট্ৰেলিয়াই এই ভ্ৰমণ নিশ্চিত কৰিছে । ভাৰতীয় পুৰুষ দলটোৱে অষ্ট্ৰেলিয়াৰ বিৰুদ্ধে তিনিখন এদিনীয়া আৰু ৫ খন টি-২০ মেচ ধাৰাবাহিকভাৱে খেলিব । ভাৰতীয় দলটোৱে ৮টা ভিন্ন স্থানত এই মেচসমূহ খেলিব ।

১৯ অক্টোবৰৰ পৰা হ’ব আৰম্ভ-

১৯ অক্টোবৰৰ পৰা ৮ নৱেম্বৰলৈ ভাৰত আৰু অষ্ট্ৰেলিয়াৰ মাজত অনুষ্ঠিত হ’ব সীমিত অভাৰৰ শৃংখলা । অষ্ট্ৰেলিয়াৰ গুৰুত্ব টি-২০ ক্ৰিকেটৰ ওপৰত । কিয়নো অহা বছৰ অনুষ্ঠিত হ’ব টি-২০ বিশ্বকাপৰ । ক্ৰিকেট অষ্ট্ৰেলিয়াই অক্টোবৰ মাহত নিউজীলেণ্ডত আৰু ফেব্ৰুৱাৰী মাহত পাকিস্তানৰ বিৰুদ্ধে টি-২০ শৃংখলা খেলিব বুলিও জনাইছে । ২০২৫–২৬ ছিজনত অষ্ট্ৰেলিয়াৰ দলটোৱে সকলোতে খেলিব ।

বৰ্ডাৰ-গাভাস্কাৰ শৃংখলাৰ সময়ত অভিলেখ ভংগ হৈছিল-

২০২৪-২৫ চনৰ পাঁচখন টেষ্টৰ বৰ্ডাৰ-গাভাস্কাৰ ট্ৰফীৰ পিছত পুনৰ অষ্ট্ৰেলিয়া ভ্ৰমণ কৰিব ভাৰতীয় দলে । বৰ্ডাৰ-গাভাস্কাৰ ট্ৰফীৰ সময়ত অষ্ট্ৰেলিয়াত দৰ্শকৰ সংখ্যাই নতুন অভিলেখ গঢ়িছিল । ক্ৰিকেট অষ্ট্ৰেলিয়াৰ মুখ্য কাৰ্যবাহী টড গ্ৰীনবাৰ্গে কয় যে আমি যোৱা গ্ৰীষ্মকালত ইন-গ্ৰাউণ্ড উপস্থিতি, টিভি দৰ্শক আৰু ডিজিটেল এংগেজমেণ্টৰ বাবে অসংখ্য অভিলেখ ভংগ কৰিছিলো আৰু আমি নিশ্চিত যে এই অবিশ্বাস্য অভিলেখ সমগ্ৰ ছিজনটোত অব্যাহত থাকিব ।

ভাৰত আৰু অষ্ট্ৰেলিয়াৰ মাজত সীমিত অভাৰৰ শৃংখলাৰ সূচী এনেধৰণৰ…

এদিনীয়া শৃংখলা :

প্ৰথম এদিনীয়া- ১৯ অক্টোবৰ, পাৰ্থ

২য় এদিনীয়া- ২৩ অক্টোবৰ, এডিলেইড

তৃতীয় এদিনীয়া- ২৫ অক্টোবৰ, ছিডনী

টি২০ ছিৰিজ :

১ম টি২০- ২৯ অক্টোবৰ, কেনবেৰা

২য় টি২০- ৩১ অক্টোবৰ, মেলবৰ্ণ

৩য় টি২০- ০২ নৱেম্বৰ, হোবাৰ্ট

৪ৰ্থ টি২০- ০৬ নৱেম্বৰ, গোল্ড কোষ্ট

৫ম টি২০- ০৮ নৱেম্বৰ, ব্রিজবেন

ডুবাইত ভাৰতে নিজৰ শক্তি প্ৰদৰ্শন কৰি চেম্পিয়নছ ট্ৰফী ২০২৫ৰ ছেমি ফাইনেলত অষ্ট্ৰেলিয়াক পৰাস্ত কৰে । এই জয়েৰে টিম ইণ্ডিয়াই ফাইনেলত প্ৰৱেশ কৰিছে । এই জয়েৰে অষ্ট্ৰেলিয়াৰ বিৰুদ্ধে এদিনীয়া বিশ্বকাপ ২০২৩ৰ পৰাজয়ৰ প্ৰতিশোধ ল’লে ৰোহিত শৰ্মাৰ নেতৃত্বাধীন ভাৰতীয় দলটোৱে । ছেমি ফাইনেলত ভাৰতৰ জয়ৰ আঁৰত তিনিটা গুৰুত্বপূৰ্ণ কাৰণ আছিল । ইয়াৰ আটাইতকৈ ডাঙৰ কাৰণ আছিল বিৰাট কোহলীৰ প্ৰদৰ্শন ।

প্ৰথমে বেটিং কৰি অষ্ট্ৰেলিয়াই ২৬৪ ৰান সংগ্ৰহ কৰে । ইয়াৰ প্ৰত্যুত্তৰত ভাৰতে ৪৮.১ অভাৰত ৬টা উইকেট হেৰুৱাই মেচখনত জয়লাভ কৰে । ভাৰতৰ জয়ত গুৰুত্বপূৰ্ণ ভূমিকা পালন কৰিছিল বলাৰসকলে । তেওঁলোকৰ প্ৰদৰ্শন ভাৰতৰ বিজয়ৰ এক ডাঙৰ কাৰক হৈ পৰিল । অষ্ট্ৰেলিয়াৰ অ’পেনাৰ ট্ৰেভিছ হেডে বিস্ফোৰক বেটিং কৰিছিল । কিন্তু বৰুণ চক্ৰৱৰ্তীয়ে তেওঁক পেভিলিয়নৰ বাট দেখুৱাই । ইয়াৰ পিছত মহম্মদ ছামীয়ে ষ্টিভ স্মিথৰ উইকেট দখল কৰে । ৭৩ ৰান সংগ্ৰহ কৰি পেভিলিয়নলৈ উভতি আহে স্মিথ । এই খেলুৱৈসকল যদি আৰু অধিক সময় ক্ৰীজত থাকিলহেঁতেন তেন্তে স্ক’ৰ আৰু ডাঙৰ হোৱাৰ সম্ভাৱনা আছিল ।

ভাৰতৰ বাবে গেম চেঞ্জাৰ হিচাপে প্ৰমাণিত হ’ল বিৰাট কোহলী-

কোহলীৰ ইনিংছ ভাৰতৰ জয়ৰ এক ডাঙৰ কাৰক হৈ পৰে । ৮ ৰান সংগ্ৰহ কৰি আউট হৈছিল অ’পেনাৰ শুভমন গীল । অধিনায়ক ৰোহিত শৰ্মাই ২৮ ৰান সংগ্ৰহ কৰি পেভিলিয়নলৈ উভতি আহে । এনে পৰিস্থিতিত কোহলীয়ে ইনিংছৰ দায়িত্ব লয় । তেওঁ ৯৮টা বলৰ সন্মুখীন হৈ ৮৪ ৰান সংগ্ৰহ কৰে । বিৰাটৰ এই ইনিংছত আছিল ৫টা চাৰি ।

নিজৰ শক্তি দেখুৱালে শ্ৰেয়াছ আয়েৰ আৰু হাৰ্দিক পাণ্ডিয়াই-

আয়েৰ আৰু বিৰাটৰ মাজত ৯১ ৰানৰ অংশীদাৰিত্ব আছিল । এই অংশীদাৰিত্বৰ সময়ত শ্ৰেয়াছে ৪৫ ৰান বৰঙণি আগবঢ়ায় । দুয়োজনে একেলগে টিম ইণ্ডিয়াৰ ইনিংছ সুস্থিৰ কৰি তুলিছিল । ইয়াৰ পিছত পাণ্ডিয়াই শেষ ফালে পৰিবেশ সলনি কৰে । বিস্ফোৰক প্ৰদৰ্শনেৰে ভাৰতক জয়ৰ ওচৰলৈ লৈ গ’ল হাৰ্দিকে । পাণ্ডিয়াই ২৪টা বলত ২৮ ৰান সংগ্ৰহ কৰে ।

কেতিয়া আৰু কাৰ বিৰুদ্ধে ফাইনেলত প্ৰতিদ্বন্দ্বিতা কৰিব ভাৰতে-

ভাৰত আৰু অষ্ট্ৰেলিয়াৰ মাজত মঙলবাৰে ডুবাইত অনুষ্ঠিত হয় প্ৰতিযোগিতাৰ প্ৰথমখন ছেমি ফাইনেল । এতিয়া ৯ মাৰ্চত প্ৰতিযোগিতাখনৰ অন্তিমখন তথা ফাইনেল মেচ খেলিব টিম ইণ্ডিয়াই । দ্বিতীয় ছেমি ফাইনেলত জয়ী হোৱা দলটো ফাইনেলত প্ৰৱেশ কৰিব । বুধবাৰে লাহোৰত নিউজীলেণ্ড আৰু দক্ষিণ আফ্ৰিকাৰ মাজত অনুষ্ঠিত হ’ব দ্বিতীয়খন ছেমি ফাইনেল ।